1 Di kɔwɛntɛ nɔnle kamɛ di lɛlɛɛ nwu nkpo kamɛ, di Yuda ɔka Sedekia sɛka ole lɛlɛɛ naafa kasɔkakyekɔ yi, ɔlaabuɛtɛtɛ Asur obisuɔtɔbi Hanania wɔ niakye ni Gibeon, labuɛ aatɔkɔ mi di SAATE nwu leyo kamɛ di olebatatɛ ku batii nwu bamuu anu alɛ: 2 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Kamafee Babel ɔka simu owoso nwu. 3 Di alɛɛ anyɔ kamɛ yi, kamakplesa SAATE nwu leyo asaa ya amuu di Babel ɔka Nebukadnesar ladieko ni ninfũ aayɔ aasifiko ni Babel n-wako lɛba le mmle. 4 Kamakplesa kafɔɔ Yuda ɔka Yehoiakim obisuɔtɔbi Konia ku balanle bamba ba niakye ni Yuda, mba niasifi ni Babel n-wako lɛba le mmle, diekye kamafee Babel ɔka simu owoso nwu.’ " SAATE nwu niebuɛ.

5 Ni di ɔlaabuɛtɛtɛ Yeremia ladiki ɔlaa wɔ di ɔlaabuɛtɛtɛ Hanania labuɛ ni kanya di olebatatɛ ku batii ba bamuu niayila ni di SAATE nwu leyo anu nɛ. 6 Ni aabuɛ alɛ, "Diwa kaanya! SAATE nwu abla nkpo! SAATE nwu ata ɔlaa wɔ fatoobuɛ fɛɛtɛ ni diwa kaanya alɛ aakplesa SAATE nwu leyo asaa ku balanle nwu bamuu ankyeko Babel anwako lɛba le mmle. 7 Kafɔɔ yi, kyɔɔ atoko faanu ɔlaa wɔ kamabuɛ nkpee fɔ ni di atoko kamɛ ku batii nwu bamuu atoko kamɛ: 8 Ɔlaababuɛtɛtɛ ba nintoole ni afɔ ku ami katũ bɛɛbafe ni labuɛ kakpɛ ɔkpɛ, ɔlaa kpile otũ ku ofiɛ kpile sɛlaa baatɛ di nsɔ kpinwu ku sɛkanlekɔ kplɛ suoto. 9 Kafɔɔ ɔlaabuɛtɛtɛ wɔ nimbuɛ atoko ɔkyɛ ole ɔlaa antɛ ni yi, babanyɔɔ fɛ nwaako otii wɔ di SAATE nwu lekpee nii, nse ɔlaa obuɛ ɔtɛ nɔɔ nwu lɛwa kaanya."

10 Ninfɛ di ɔlaabuɛtɛtɛ Hanania ladiki simu owoso nwu di ɔlaabuɛtɛtɛ Yeremia simu aafefee nɛ, 11 ni aabuɛ di batii nwu bamuu anu alɛ, "Nnya ɔlaa wɔ di SAATE nwu kobuɛ ni alɛ: ‘Nkpo okle kamafee Babel ɔka Nebukadnesar simu owoso nwu ndiki di nnle nwu mmuu simu di alɛɛ anyɔ kamɛ nɛ.’ " Ni di ɔlaabuɛtɛtɛ Yeremia layefe osuku nɔɔ aasifi nɛ.

12 Di obe kakuu sɛmaa di ɔlaabuɛtɛtɛ Hanania lafee ni simu owoso nwu aadiki ni di ɔlaabuɛtɛtɛ Yeremia simu yi, ni di SAATE nwu ɔlaa lawa kuata Yeremia alɛ: 13 "Tɔɔkyɛ faalaatɔkɔ Hanania falɛ, ‘Nnya ɔlaa wɔ di SAATE nwu kobuɛ ni alɛ: Owoso simu owoso fatoofee, kafɔɔ lɛbɔɔsaa simu owoso fabawɛ di nwu nkpo kanya. 14 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Kamayɔ lɛbɔɔsaa simu owoso nkpee di nnle be mmle mmuu simu, ninta ma mansumu Babel ɔka Nebukadnesar, babasumu nwɔ kafɔɔ. Kamatɔɔ osie bia di lepoo kamɛ babɔkɛɛ suoto.’ "

15 Ni di ɔlaabuɛtɛtɛ Yeremia latɔkɔ ɔlaabuɛtɛtɛ Hanania alɛ, "Hanania, kyɔɔ atoko! SAATE nwu diekpee fɔ, kafɔɔ fatɔɔkyɔnkyɔ kale ka mmle falɛ batika disi di sɛlaa ku afunu suoto. 16 Nkpo oso, nnya ɔlaa wɔ di SAATE nwu kobuɛ ni alɛ: ‘Nfɛ kɔwa fɔ ɔbadiki di kasɔ suoto. Fabakpi di lɛlɛɛ le mmle kamɛ, diekye feebuɛ ɔtaka oyila ɔlaa di SAATE nwu suoto.’ "

17 Ni di ɔlaabuɛtɛtɛ Hanania lakpi di lɛlɛɛ nwu kɔwɛntɛ kuɛnsinle kamɛ nɛ.