1 Oo SAATE, fate tinini obe lele,

nse lɛyɔ ɔlaa lɛtɛ di anu lɛfɔ.

Kafɔɔ kamakakatɛko fɔ di ditinini lɛfɔ suoto:

Obe oso di siensietɛ nwu sisuku n-lɛ ɔkyɛ?

Obe oso di asaa n-lɛ ɔkyɛ anta amumu bablatɛ?

2 Afɔ niasɔ ma, ni batoose sidu nɛ;

mammuɔ mantika abi.

Obe lele fatika di anyasibi lɛma suoto,

kafɔɔ eekyo di situ lɛma.

3 Oo SAATE, kafɔɔ faye mi,

fan-nyɛɛ, fansɔ kafɔɔ disibu nii fan-nyu nse ditika di suoto lɛfɔ.

Wududusa ma fasifiko fɛle bafoso ba bɔɔwa ni ɔbalo!

Diki ma fase lete fata dii le babalo ma ni!

4 Ɔmɛmbe di kasɔ kamakoso kaanaase

di sɛfa biala di kofe kamɛ kafɔɔ n-yɔɔ sinnaase?

Ta batii ba ninsi ka ni di suoto amumu oso yi,

babɔkɛɛ ku bakansiɛ ntɔɔwɔɔ.

Diɛkyakaa nii yi, batii kobuɛ alɛ,

"Ɔlɔbanya lɛsaa le nimawa wo ni di suoto."

5 "Nse faatoso ku batii ninkpaa

bɛɛta dibuo lebuo fɔ,

ni lɛ fabafuo otoso ku bapɔnkɔ?

Nse feetuula di kasɔ ka ninaa ni ole kuonwii suoto,

ni lɛ fababla di Yordan apookuu kamɛ?

6 Babilee-suɔtɔbi, afɔ omu leyo kamɛ batii-

ntoodiki fɔ bɛɛta bia;

batɔɔyɔ ɔlaa di suoto lɛfɔ osie kanya.

Kuntɛ mankakatɛ sɛlaa biene di suoto lɛfɔ yi,

tanfũ ma faanu.

7 "Kamasĩ leyo nii,

nindiɛ atesaa nii ntɛ;

kamayɔ otii wɔ nimbɔmbɔ ni

nkpee di balo nɔɔ nnɛɛ.

8 Atesaa nii ntɔbabla

fɛle kyata wɔ ninsi ni di lepoo kamɛ ɛɛtɛɛ.

Ankumii ankpee mi;

nkpo oso lekyidi nwɔ.

9 Diele ote nfɛ di atesaa nii nte atɛɛ

fɛle lelente le

di bakansiɛ bamba mmana mankyi mandieko ni?

Tɔɔkyɛ falaasiisa lepoo kamɛ babɔkɛɛ bamuu;

faakpaa ma fawako bababɛbɛɛ.

10 Bafoso bakpatɛ kpinwu kamalalaasa awosobi nii kofe

mannanafu kafɔɔ kofe nii kamɛ asaa mantɛ kaasɔ;

babamunikĩisa kofe nii nwu nikɔlɛ ni onyu

mambla kũ kasɔ ka niɛlalaa kate nii.

11 Bababla ka kasɔ ka niɛlalaa kate nii,

kabakoso kanlalaa kante di anu nii;

kasɔ nwu kamuu kamalalaa kante

diekye kuonwii nnaa ɛɛyɔ nwu ni ole.

12 Di abokote nwu fukuti nsintɛɛ di ɔfaafuu kamɛ yi,

asaa balalaasatɛ kamawa,

diekye SAATE nwu kapamii kamawɔɔsa asaa

diɛyɔ ni di kasɔ nwu kayɛntɛleko kanwii diesifi ni kabamba;

kuonwii dilɔbadie kaamɛ.

13 Babakpee kamɔɔ, kafɔɔ siwuu babafiɛlɛ;

babakpee suoto lɛma dibuo kafɔɔ blɔbawɛ lɛsalɛsaa.

Nioso yi, ta asaa lɛfɔ ofee sinunsɔ sitika fɔ di suoto

ta SAATE nwu lɛblɔfiɛ yakayaka nwu oso."

14 Nnya ɔlaa wɔ di SAATE nwu kobuɛ ni alɛ: "Amumu bablatɛ ba bamuu ninsi bakaako mi ni baaklee atesaa ya lata ni batii nii Israel baafũ ni yi, kamasifi ma ndiki di nsɔ lɛma suoto, ninsifi kafɔɔ Yuda batii ndiki ma kaamɛ. 15 Kafɔɔ nse lɛsifi ma lediki leloo yi, kamakplesa obiala lɛma n-wako nnwɔɔ omu atesaa ku nnwɔɔ omu kasɔ nɔɔ suoto. 16 Ni nse beetekete asaa di batii nii sisuku suoto nwaa, bɛɛka kafɔɔ nta di leyooto nii kamɛ, beebuɛ alɛ, ‘Nwaako di SAATE lɛnya akpe ni nkpa’- batoodituo ni bia batii nii alɛ baaka ni ntam di Baal leyooto kamɛ yi- ni babata ma mansiɛ di batii nii kamɛ. 17 Kafɔɔ nse kale kawo diɛkyɔɔ mi atoko yi, kamasifi ka ndiki klekle ninwɔɔsa ka kafɔɔ," SAATE nwu niebuɛ.