1 Nnya sɛlaa se ninsi ni di kukũ ko di ɔlaabuɛtɛtɛ Yeremia lakpana aakyeko ni Yerusalem akyesee ni banɔɔfo ba niabu baasiɛ ni nkpa di balanle ku olebatatɛ, ɔlaababuɛtɛtɛ ku batii bule kamɛ. Mba bamuu di Nebukadnesar lakpaa aadieko ni di Yerusalem aasifiko ni sɛlanle kamɛ di Babel. 2 (Aakpana kũ di obe wɔ di Ɔka Konia ku ɔkasanko, lɛkayo banɔɔfotii, Yuda ku Yerusalem batunletɛ, asaabowolatɛ ku nnɛɛ kamɛ bakpɛmblatɛ ladie ni di Yerusalem baasifi ni sɛlanle kamɛ.) 3 Aakyesee kukũ nwu aafenko di Safan obisuɔtɔbi Elasa ku Hilkia obisuɔtɔbi Gemaria suoto, mma di Yuda ɔka Sedekia lakpee Babel Ɔka Nebukadnesar nfũ nɛ. Kukũ nwu kamɛ sɛlaa niale alɛ:

4 Nnya ɔlaa wɔ di SAATE nwu, Israel Yaa wɔ Ninlenke ni kobuɛ antɔkɔ ni mba bamuu lakpaa lakyeko ni Yerusalem lasifiko ni sɛlanle kamɛ di Babel alɛ: 5 "Bitofo ayo biesiɛ nya kaamɛ; bibla kɔba biele alesaa ya biekpee ni. 6 Biyɔ basɔfɔ bielofo babisuɔtɔbi ku babisankobi; biyɔ basɔfɔ bita babisuɔtɔbi lee, biɛyɔ kafɔɔ babisankobi lee bita bayɔ, alɛ mma kafɔɔ baalofo babisuɔtɔbi ku babisankobi. Bilɛɛsa di lɛpɔ kamɛ ninfa; bitanklɔklɔɛ di lɛpɔ kamɛ. 7 Diɛkyakaa ni yi, bimiɛ atoko ɔkyɛ ole ku lɛlɛ bita okpoo kplɛ wɔ latuka ye lasifiko ni sɛlanle kamɛ. Bipɛ ɔlaa bita SAATE nwu bita okpoo nwu, diekye nse diɛlɛ diɛta nwu yi, aye kafɔɔ dibalɛ ninta ye." 8 Nwaako, nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: "Bitanta ɔlaababuɛtɛtɛ ku babɔmpɛtɛ ba ninsi ye ni kaamɛ lakyɔnkyɔ ye. Bitankyɔɔ atoko di alaafɔ ya minta ma mansɛ ni suoto. 9 Boobuɛ sɛlaa ku afunu sɛlaa mantɛ manta ye di leyooto nii kamɛ. Ninkpee ma," SAATE nwu niebuɛ.

10 Nnya ɔlaa wɔ di SAATE nwu kobuɛ ni alɛ: "Nse alɛɛ afosi-akuɛnsĩ ntooloo diɛta Babel yi, kamawa ɔkyɛ lee nimabla di onukwale wɔ labuɛ latɛ ni suoto nlɛ makplesa ye n-wako ni lɛba le mmle. 11 Diekye n-ye disibu le nkpe nta ye nii," SAATE nwu niebuɛ alɛ, "lɛlɛ disibu dile dita ye, ninanle alɛ kabla ye ni dikpile, disibu dile alɛ kata ye osuku onyu ku dii kaamaa lɛlɛ. 12 Ni bibalɛɛ mi, min-wa mimapɛ ɔlaa mintɛɛ, ni ami kafɔɔ kamakyɔɔ ye atoko. 13 Bibawolaa mi, min-nyɛɛ kafɔɔ, nse biewolaa mi ku otu lee omuu. 14 Bibanyɛɛ," SAATE nwu niebuɛ, "kamakplesa ye kafɔɔ nkyeko sɛlanle kamɛ nwako. Kamasiisa ye nkyeko nnle nwu mmuu ku aba ya latososa ye lakpee ni n-wako," SAATE nwu niebuɛ, "makplesa ye kafɔɔ n-wako lɛba le latuka ye lalakpee ni di sɛlanle kamɛ."

15 Biafuo obuɛ bilɛ, "SAATE nwu ntoodiki ɔlaababuɛtɛtɛ ɛɛta wo di Babel," 16 kafɔɔ nnya ɔlaa wɔ di SAATE nwu kobuɛ ankyeko ni ɔka wɔ ninsi ni di Dawid lɛkakpomii suoto ku batii ba bamuu niebu ni di okpoo kplɛ wɔ mmle kamɛ, okpoo lee batii ba nitakyɛ ni sɛlanle kamɛ ku aye. 17 Nwaako, nnya ɔlaa wɔ di SAATE wɔ Ninlenke ni kobuɛ ni alɛ: "Kamata kapamii, kɔka-ɔkpɛ ku ofiɛ kpile n-wa di suoto lɛma amabla ma fɛle abuɛ ya ninanlɛ ɛɛtɛ ɛɛlalaa ni anamalɛ ni ole. 18 Kamatikanko ma ku kapamii, kɔka-ɔkpɛ ku ofiɛ kpile, nimbla ma kafɔɔ diyududusaa nta sɛkanlekɔ nwu mmuu kaasɔ suoto ku lɛkpaanisaa ku lɛyɛkɛsaa, lɛmansaa ku ninusɔsaa di nnle be mmuu kamatososa ma nkpee ni kamɛ. 19 Diekye batakyɔɔ sɛlaa nii atoko," SAATE nwu niebuɛ alɛ, "sɛlaa se labuɛ lakple labuɛ lafenko ni di bakpɛmblatɛ nii ɔlaababuɛtɛtɛ suoto. Ni di aye balanle nwu bitakyɔɔ atoko nɛ," SAATE nwu niebuɛ.

20 Nkpo oso, aye balanle ba bamuu latososa ladiki ni di Yerusalem lasifiko ni Babel binu SAATE nwu ɔlaa. 21 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ankyeko ni Kolaia obisuɔtɔbi Ahab ku Maaseia obisuɔtɔbi Sedekia suoto, mba nikobuɛ ni sɛlaa ku afunu sɛlaa mantɛ ye ni di leyooto nii kamɛ alɛ: "Kamayɔ ma nkpee di Babel ɔka Nebukadnesar nnɛɛ, anlo ma di anu lee. 22 Ta mma oso yi, balanle ba bamuu niekye ni Yuda bakpe ni di Babel kamakpaani lɛkpaani le mmle alɛ: ‘SAATE nwu abla fɔ fɛle Sedekia ku Ahab okle, mba di Babel ɔka lafiɛ ni di ɔtɔ kamɛ.’ 23 Diekye baabla abuusaa di Israel; batookpee asɔnɔ ku bawo lɛma basɔfɔ, baabuɛ kafɔɔ sɛlaa ku afunu sɛlaa di leyooto nii kamɛ, di ami ntakpee ma nlɛ babla nii. N-ye nwu ole, nle kafɔɔ kamaayilatɛ lɛta nwu," SAATE nwu niebuɛ.

24 Tɔkɔ Semaia, Nehelami otii nwu falɛ, 25 "Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Feekyesee akũ di afɔ omu leyooto kamɛ, fɛɛta batii bamuu di Yerusalem, fɛɛta oletatɛ Maaseia obisuɔtɔbi Sefania, ku olebatatɛ bule bamuu. Faatɔkɔ Sefania falɛ, 26 ‘SAATE nwu ntoodiki fɔ alɛ le oletatɛ di Yehoiada kanya alɛ faayila di SAATE nwu leyo kanya; diki fiibuotɛ lele nimbla ni fɛle ɔlaabuɛtɛtɛ fapɛ lekpo ku simu-abɔɔsaa fatɛ. 27 Ni, obe oso fatasĩ ɔlaa faata Yeremia wɔ niakye ni Anatot, nnwɔ niabla ni fɛ ɔlaabuɛtɛtɛ di kamɛ lee? 28 Diekye aata wo kanya ka mmle di Babel alɛ: Bibasiɛ di sɛlanle kamɛ minklɛ. Nkpo oso bitofo ayo biesiɛ kaamɛ; bibla kɔba biele alesaa ya biekpee ni.’ "

29 Nioso oletatɛ Sefania laka kukũ nwu aata ɔlaabuɛtɛtɛ Yeremia. 30 Ni di SAATE nwu ɔlaa lawa kuata Yeremia alɛ: 31 "Yɔ kanya ka mmle fakyesee balanle nwu bamuu falɛ: ‘Nnya ɔlaa wɔ di SAATE nwu kobuɛ ankyeko ni Semaia, Nehelami otii nwu suoto: Ta di Semaia labuɛ ɔlaa aatɛ aata ye ni, nu nintakpee nwɔ, aata ye biafũ sɛlaa ku afunu bianu ni oso yi, 32 nnya ɔlaa wɔ di SAATE nwu kobuɛ ni alɛ: Nwaako kamananfi Semaia, Nehelami otii nwu ku banantii nɔɔ kootoko. Kuonwii dilɔbabu nwɔ di batii ba mmle kamɛ, ee anya asaa biene ya kamabla nta ni batii nii, SAATE nwu niebuɛ, ta aabuɛ ni ɔtaka oyila sɛlaa di suoto nii oso.’ "