1 Sɛlaa se mmle nle Hilkia obisuɔtɔbi Yeremia, aale ni olebatatɛ onwii lɛma di Anatot di Benyamin kasɔ suoto. 2 Ni di SAATE nwu ɔlaa lawa kuata Yeremia di lefosi lɛlɛɛ tiɛfa kamɛ di Yuda ɔka Amon obisuɔtɔbi Yosia sɛka olebee kamɛ nɛ. 3 Diafe ni di Yuda ɔka Yosia obisuɔtɔbi Yehoiakim sɛka ole kamɛ, dialaadu ni kɔwɛntɛ nɔɔnle di lefosi lɛlɛɛ kasale kamɛ di Yuda ɔka Yosia obisuɔtɔbi Sedekia obe kamɛ, di obe wɔ di Yerusalem batii lasifi ni sɛlanle kamɛ.

4 Ninfɛ di SAATE nwu ɔlaa lawa kuatɛɛ alɛ,

5 "Latofo fɔ fiɛ labla fɔ di olofofɔtɔ kamɛ,

ladiki fɔ lase lete fiɛ baalofo fɔ;

ladiki fɔ fɛ ɔlaabuɛtɛtɛ lata nnle."

6 Ni labuɛ nlɛ, "Ao, SAATE Kplɛ, nin-ye mmle mankakatɛ nii; obisɔ lete nle."

7 Kafɔɔ SAATE nwu latɔkɔ mi alɛ, "Tambuɛ falɛ, ‘Obisɔ lete nle.’ Dikpeni fɛɛkyɛ otii biala nfũ lekpee fɔ ni fɛɛlaabuɛ ɔlaa lele lɛtɔkɔ fɔ. 8 Tanyɛkɛ ma, diekye nsiko fɔ, kamadiki fɔ kafɔɔ," SAATE nwu niebuɛ.

9 Ninfɛ di SAATE nwu ladiki kɔnɛɛ nɔɔ aakpanko kanya nii, aatɔkɔ mi alɛ, "Nyu, ntɔɔyɔ sɛlaa nii lekpee di kanya lɛfɔ. 10 Nyu, miɛ ntɔɔyɔ fɔ lese di nnle ku sɛka nlekɔ kanya, alɛ faasisifi asaa, fambɛbɛɛ nya fantɛ kaasɔ, fanwɔɔsa asaa, fantakatɛ batii di akpomii, fantofo ayo, fampɛ asaa kafɔɔ."

11 Ni di SAATE nwu ɔlaa lawa kuatɛɛ alɛ: "Yeremia, obe lɛsaa fɔɔnya?"

Ni ladiki kanya nlɛ, "Kɔnya blɔfɔ-akotoa owosola."

12 Ni di SAATE nwu latɔkɔ mi alɛ, "Feelolaa fɛɛnya nwaa, diekye konyu nlɛ ɔlaa nii kawa kaanya."

13 Ni di SAATE nwu ɔlaa lakple kuawa kuatɛɛ alɛ, "Obe lɛsaa fɔɔnya?"

Ni ladiki kanya nlɛ, "Kɔnya kabubukii kanwii nikofuu ni kɔbɔkɛtɛ kankye katookasɔ."

14 Ni di SAATE nwu latɔkɔ mi alɛ, "Ɔlaa kpile kamakye katookasɔ kunwa di batii ba bamuu ninsi ni di kasɔ nwu suoto. 15 Nfɛ kamalɛɛ batii ba bamuu ninkpe ni di katookasɔ sɛka nlekɔ nwu," SAATE nwu niebuɛ alɛ.

"Baka lɛma bamuu kamawa mamase akakpomii lɛma

di Yerusalem n-yokontũ;

babayila mankyi seyoyiɛ se simuu niɛmana nwɔ siekyi nii,

manyila kafɔɔ di Yuda sekpoo simuu suoto.

16 Kamananfi batii nii kootoko

ta akpilesaa lɛma ɔbla, beediɛ mi bɛɛtɛ ni oso,

boofiɛ olufui manta ni bayaa bamba,

boosumu ni kafɔɔ asaa ya di nnɛɛ lɛma lɛbla nii.

17 "Yeremia lolaa suoto! Taka fayila, faatɔkɔ ma ɔlaa lele lɛtɔkɔ fɔ. Tanta ma baakpee fɔ difu, nse diele nkpo kamakpee fɔ difu di anu lɛma. 18 Miɛ ntɔɔbla fɔ okpoo kplɛ siene, lɛbɔɔsaa wɛɛfɛɛ lɛkpaka ku lɛbɔɔsaa sɛɛle oyoyiɛ alɛ faataka fanyila di kasɔ nwu kamuu suoto- fanyila di Yuda baka, banɔɔfotii nɔɔ, olebatatɛ nɔɔ ku kasɔ nwu batii suoto. 19 Babakpɛko fɔ, kafɔɔ blɔbalenkee fɔ, diekye nsiko fɔ, kamadiki fɔ kafɔɔ," SAATE nwu niebuɛ.