1 Ni di SAATE nwu ɔlaa lawa kuata Yeremia lɛnyɔɔfa di obe wɔ aawɛ ni ɔwɛ di leyo kantenkɔ nwu di banyuntɛ kaflɔnkɔ alɛ: 2 "Nnya ɔlaa wɔ di SAATE nwu kobuɛ ni alɛ, nnwɔ niɛbla ni kasɔ, SAATE wɔ niabla ka ni aatɛ ka ni kafɔɔ- SAATE nwu ninle nwɔ leyooto: 3 ‘Lɛɛ mi, kamatũna nta fɔ kafɔɔ, nintɔkɔ fɔ sɛlaa kplɛ ku asaa ya niewofa fanan-ye ni kafɔɔ.’ 4 Diekye nnya ɔlaa wɔ di SAATE nwu, Israel Yaa nwu, kobuɛ ankyeko ni ayo ya ninkpe ni di okpoo kplɛ wɔ mmle ku Yuda akayo ya baabiɛ baatɛ ni kaasɔ alɛ bɔɔyɔ mandieko ni atii ya bɛɛpɛ ni ku kapamii 5 di Babel batii ɔkpɛko kamɛ: ‘Ayo nwu kamayii ku batii ba kamalo ni bakpi di ɔblɔ ku lɛblɔfiɛ yakayaka nii kamɛ. Kamawofasa anu nii di okpoo kplɛ wɔ mmle suoto ta asiensiesaa lɛma amuu ɔbla oso.

6 " ‘Akpakpa dite yi, kamayɔ suoto osie ku difiɛyɔɔ n-wako nwu; kamayɔɔsa batii nii sifiɛ nta ma kafɔɔ atoko ɔkyɛ ole ku kɔba lekpee kpinwu. 7 Kamakplesa Yuda ku Israel nkyeko sɛlanle kamɛ n-wako, n-se ma lese fɛ mmle baate ni saa. 8 Kamafoto sikpile simuu se baabla mi ni ndiki di suoto lɛma, nin-yɔ kafɔɔ otokopĩ sikpile lɛma simuu baabla ni di suoto nii nkyɛ ma. 9 Ni okpoo kplɛ wɔ mmle kamawako mi leyooto biene, suoto lɛyɔɔ, katansa ku dibu di nnle mmuu anu kaasɔ suoto, nse beenu asaa biene ya amuu lɛbla lɛta nwu nii; dibabla ma ɔkpɛ mantũtũkũ kafɔɔ di lɛlɛ kpinwu ku atoko ɔkyɛ ole wɔ lɛta nwu ni oso.’

10 "Nnya ɔlaa wɔ di SAATE nwu kobuɛ ni alɛ: ‘Mimbuɛ di lɛba le mmle suoto bilɛ, "Kɛɛlalaa kate, di batii ee babɔkɛɛ diesi ka ni di suoto." Kafɔɔ di Yuda sekpoo kamɛ ku Yerusalem akpaka ya beediɛ bɛɛtɛ ni, di batii ee babɔkɛɛ diesi ni yi, nfa babakple mannu 11 suoto lɛyɔɔ ku lɛpɔ kudú, ɔkafɔɔ ku ɔkafɔɔsa sɛlɔ, ku mba nin-yɔ sɛfa ɔpɛ asaaɔta man-wako ni SAATE nwu leyo mambuɛ ni alɛ,

" ‘ "Bipɛ SAATE wɔ Ninlenke ni sɛfa,

diekye SAATE nwu nlɛ;

lɛbɔmbɔ nɔɔ nkpe dinaa ni kaloo."

Diekye kamakplesa lɛlɛ nta kasɔ nwu fɛ mmle kaate ni saa,’ SAATE nwu niebuɛ.

12 "Nnya ɔlaa wɔ di SAATE wɔ Ninlenke ni kobuɛ ni alɛ: ‘Alesaa kaweekɔ kamakple kan-wɛ kanta babɔkɛɛbakpatɛ ninta babɔkɛɛ lɛma ɔnyɛɛ ɔtɛ di okpoo nwu omuu, di lɛba le mmle ninte ni kafukuti di batii ee babɔkɛɛ diesi nii. 13 Di akpenkpe nwu nsɔ sekpoo kamɛ, di kufĩkamɛɛkɔ akpenkpe nkpaa ku kalakasɔ, di Benyamin kasɔ suoto, di sekpoenyii se niɛmana Yerusalem ku Yuda sekpoo siekyi ni yi, babɔkɛɛ kamakple manfe di otii wɔ ninka ma ni kɔnɛɛ kalɔ,’ SAATE nwu niebuɛ.

14 SAATE nwu niebuɛ alɛ, " ‘Nyu lo, obe kɔwa, kamabla ni di nyaami ɔnya ntam be labla lata ni Israel batii ku Yuda batii.

15 " ‘Di ayi nwu ku obe nwu kamɛ yi,

kamata Ɔla tinini ntaa kunkye Dawid kɔna kamɛ;

ababla lɛsaa le niesiɛko ni ku nle ninlɛ ni di kasɔ nwu suoto.

16 Di obe nwu kamɛ yi, Yuda kamawɛ didiki,

Yerusalem kafɔɔ kamasiɛ di atoko ɔkyɛ ole kamɛ.

Nnya leyooto le babalɛɛ nwu ni:

SAATE nwu Ɔsaabla Tinini Loo.’

17 Diekye nnya ɔlaa wɔ di SAATE nwu kobuɛ ni alɛ: ‘Dilɔbawa diidii alɛ Dawid diɛwɛ otii aasiɛ ni di Israel batii lɛkakpomii suoto, 18 ee diwa diidii alɛ, olebatatɛ ba ninle ni Lewi batii diɛwɛ otii aayila ni obe biala anta ni ofiɛ asaaɔta, anfiɛ ni alesaa asaaɔta, anta ni kafɔɔ seleɔta.’ "

19 Ni di SAATE nwu ɔlaa lawa kuata Yeremia alɛ: 20 "Nnya ɔlaa wɔ di SAATE nwu kobuɛ ni alɛ: ‘Nse fabafuo kanya ninii nii ka labla ni munko kakũ ofukuti, ku kanya ninii nii ka labla ni munko kakyɛ ofukuti, alɛ kakũ ku kakyɛ dilasinwa di obe ninya kamɛ yi, 21 ni nse kanya ninii nii ka labla ni ku kpɛmblatɛ nii Dawid- ku kanya ninii nii ka labla ni ku Lewi batii ba ninle ni olebatatɛ ba nimbla ni kasumu ɔkpɛ di anu nii- kafuo ofukuti, ni Dawid dilɔbasinwɛ ɔnantii ale sɛka di lɛkakpomii nɔɔ suoto. 22 Kamabla Dawid banantii bakpɛmblatɛ nii, mbla kafɔɔ Lewi batii ba nimbla ni kasumu ɔkpɛ di anu nii mampɔ fɛ kolo awɛntrɛbi ya manaafuo ni ɔka, fɛ ɔtɛnsĩa di lekpo kotoko manaafuo ni ɔklapoosa.’ "

23 Ni di SAATE nwu ɔlaa lawa kuata Yeremia alɛ: 24 "Faditɛ nsũ fatofo falɛ batii ba mmle kobuɛ alɛ, ‘SAATE nwu ntoosĩ sɛkanlekɔ be nnyɔ aadiki ni’? Nioso mannyu batii nii nyakatãa, blosimbu ma kafɔɔ fɛ kale. 25 Nnya ɔlaa wɔ di SAATE nwu kobuɛ ni alɛ: ‘Nse ntambla kanya ninii nii di kakũ ku kakyɛ, ntɛ kafɔɔ osi ku kasɔ afiofa yi, 26 nse ntabasĩ Yakob banantii ku kpɛmblatɛ nii Dawid, ntaadiki kafɔɔ babisuɔtɔbi nɔɔ onwii lɛma alɛ aale sɛka di Abraham, Isak ku Yakob banantii suoto. Diekye kamakplesa lɛlɛ lɛma nta ma nnya ma kafɔɔ nyaami.’ "