1 Afosi-anyɔ lɛlɛɛ ninwii di Sedekia lafũ fiɛ aabale ɔka, ni aale sɛka di Yerusalem lefosi lɛlɛɛ ninwii nɛ. Ɔya leyooto niale Hamutal wɔ niale ni Yeremia obisankobi; ɔsanko nwu lakye Libna. 2 Ni di ɔka Sedekia labla okpile di SAATE nwu anu, fɛ mmle okle di Yehoiakim labla ni nɛ. 3 Ta SAATE nwu ɔblɔ oso di asaa ya mmle amuu lawa di Yerusalem ku Yuda suoto, ni di kayɛntɛkɔ yi, aatososa ma di anu nɔɔ nɛ.

Ninfɛ di Sedekia lataka di Babel ɔka suoto nɛ.

4 Nioso, di Sedekia sɛka ole lɛlɛɛ naasinle, dii fosile suoto, di Israel batii kɔwɛntɛ fosile kamɛ yi, Babel ɔka Nebukadnesar lataka di Yerusalem suoto ku bakpɛtɛ nɔɔ bamuu. Baabla kasiɛkɔ di okpoo kplɛ nwu ɔlɔɔkɔ, ni baabla oyoyiɛ abiɛsaa baakyisa nwu omuu nɛ. 5 Baamana okpoo kplɛ nwu baakyi dialaase di Ɔka Sedekia lefosi lɛlɛɛ kasale kamɛ.

6 Di dii naasinle suoto di Israel batii kɔwɛntɛ naafa kamɛ yi, kɔka ɔkpɛ di okpoo kplɛ nwu kanya latɛ kuawɛ osie alɛ alesaa ditawɛ di batii kale nii. 7 Ninfɛ baabiɛ okpoo kplɛ nwu oyoyiɛ baabuo, ni di bakpɛtɛ nwu bamuu latoso baasifi nɛ. Kakyɛ baadie di okpoo kplɛ nwu baafe di kayoko ka di eyoyiɛ ɛnyɔ be niakaako ni ɔka kɔba obo baasifi, nu di Babel batii lamana okpoo kplɛ nwu baakyi. Baatoso baakyɔɔ anu Araba lɛkyɛ. 8 Kafɔɔ Babel batii bakpɛtɛ lati Ɔka Sedekia ni baalaatũ nwɔ di Yeriko kasɔ lɛtaata nɛ. Bakpɛtɛ nɔɔ bamuu labla di suoto nɔɔ, baasamii, 9 ni baamufũ nwɔ nɛ.

Baakpaa nwɔ baakyɛnko Babel ɔka di Ribla di Hamat kasɔ suoto, di lɛba le aalo nwɔ ni lɛpɔɔ. 10 Ni di Babel ɔka lalo Sedekia babisuɔtɔbi di anu nɔɔ ninfa di Ribla nɛ; aalo kafɔɔ Yuda banɔɔfotii bamuu. 11 Ninfɛ aabɔkɔtɛ Sedekia anumbi, aaninii nwɔ ku abɔɔsaa sɛɛle sɛkpɛnkyɛ, aakpaa nwɔ aasifiko Babel, di lɛba le aatɛ nwɔ ni di leyokatenkɔ dialaase ni di dikpiyi nɔɔ nɛ.

12 Di Israel Batii kɔwɛntɛ nɔnle dii fosile suoto, di Babel ɔka Nebukadnesar lefosi lɛlɛɛ naasinle kamɛ yi, ni di ɔka banyuntɛ kanyayilatɛ Nebusaradan, wɔ niale ni Babel ɔka Nebukadnesar kpɛmblatɛ lawa Yerusalem nɛ. 13 Aabakpee ɔtɔ di SAATE nwu olekatakɔ, lɛkayo ku Yerusalem ayo amuu. Aafiɛ leyo finle biala aatɛ kaasɔ. 14 Babel batii bakpɛtɛ bamuu ba niasiɛ ni di ɔka banyuntɛ kanyayilatɛ nwu kalɔ labibiɛ seyoyiɛ se simuu niamana Yerusalem siakyi nii. 15 Ninfɛ di ɔka banyuntɛ kanyayilatɛ Nebusaradan lakpaa bapiitɛ nwaa bawo ku mba niabu baasiɛ ni di okpoo kplɛ nwu kamɛ, diɛkyakaa ni di kɔnɛɛ kamɛ bakpɛmblatɛ ku mba niadie baasifi ni Babel ɔka ɔkyɛ aasifiko sɛlanle kamɛ nɛ. 16 Kafɔɔ Nebusaradan ladiɛ kasɔ nwu bapiitɛ bule aatɛ alɛ batɔɔkpɛ nta awosobi afe ku afe.

17 Babel batii nwu labibiɛ abɔɔsaa sɛɛle akpaka nwu, atikasaa ya mankyisa ni ku abɔɔsaa sɛɛle Lekpo babɛɛsi ba niayila ni di SAATE nwu olekatakɔ, ni baatuka abɔɔsaa sɛɛle nwu amuu baasifiko Babel nɛ. 18 Baayɔ kafɔɔ abukii, basoofi, kandiɛ sikũ, babɛɛsi ba man-yɔ manwanwanyi ni ntɔ, abɛɛsibii ku abɔɔsaa sɛɛle anwansaa ya amuu mamblako ni ɔkpɛ di SAATE nwu olekatakɔ kamɛ baasifiko. 19 Ɔka banyuntɛ kanyayilatɛ nwu layɔ babɛɛsi, olufui afiɛsaa, babɛɛsi ba manwanwanyi ni ntɔ, abukii, kandiɛ atikasaa, nkɔkɔɛ ku sipũ se man-yɔ mamblako ni asaaɔta nta ɔkpɛ- asaa ya amuu baayɔ koto sɛɛle ee koto fututu nwaa baabla ni baasifiko.

20 Abɔɔsaa sɛɛle ya baadiki baakyeko ni akpaka nwu anyɔ kamɛ, Lekpo bɛɛsi ku abɔɔsaa sɛɛle banakyue-suɔtɔ lefosi-banyɔ ba niasiɛ ni niini kalɔ, atikasaa ya mankyisa ni, n-ya di Ɔka Solomon labla aata ni SAATE nwu olekatakɔ, lapɔ aalenkee n-ya baakadi nii. 21 Lɛkpaka biala lɛtaka labla nkpaa afosi-anyɔ-nkuɛnsĩ ku nkpaa lefosi-anɛ diakyɛka. Dibiala opĩ labla anɛɛbi ana, di otuu late ni kaamɛ kafɔɔ. 22 Lɛbɔɔsaa sɛɛle ditikasaa le niatika ni di lɛkpaka ninwii nsintɛɛ lɛtaka labla nkpaa nkuɛnsĩ ku ɔfã, ni baabla abɔɔsaa sɛɛle awosobi ya ninte ni fɛle goowa aalososaa baatika baakyisa nimuu nɛ. Lɛkpaka nyɔɔfa nwu, awosobi ya ninte ni fɛle goowa late fɛ nninkpo okle. 23 Awosobi ya ninte ni fɛle goowa niatika ni di sɛlɔɔkɔ labla afosi-anaasĩ-akuɔ; nioso awosobi ya niatika aakyi ni nsintɛɛ lɛpɔ labla kɔlafa.

24 Ɔka banyuntɛ kanyayilatɛ nwu lakpaa oletatɛ nɔɔfo Seraia, Sefania wɔ niatikanko ni di sɛnɔɔfo kanya ku n-yoko banyuntɛ batiɛ nwu aasifiko leyo katenkɔ. 25 Di mba kafɔɔ niabu baasiɛ ni di okpoo kplɛ nwu kamɛ yi, aakpaa ɔnɔɔfotii wɔ niayila ni di basuɔtɔ ba ninkpɛ ni kanya, ku ɔka disibubatatɛ bakuɛnsĩ aasifiko. Aakpaa kafɔɔ kukũkpanatɛ wɔ niale ni kpɛmblatɛ nɔɔfo wɔ niayila ni di kasɔ nwu batii ayooto nsũɔtɛ kanya ku batii nɔɔ afosi-akuɔ ba aanya ni di okpoo kplɛ nwu kamɛ aasifiko. 26 Ni di kanyayilatɛ Nebusaradan nwu lakpaa bamuu lɛma aawako Babel ɔka nfũ di Ribla nɛ. 27 Ninfɛ di ɔka nwu lata baalo ma di Ribla, di Hamat kasɔ suoto nɛ.

Nioso Yuda ladie di kasɔ nɔɔ aasifi sɛlanle kamɛ. 28 Nnya batii ba di Nebukadnesar lakpaa aasifiko ni sɛlanle kamɛ lɛpɔ:

di lɛlɛɛ kuɛnsinle kamɛ yi, Yuda batii nkpe ntiɛ-afosi-anyɔ-batiɛ;

29 di Nebukadnesar lefosi lɛlɛɛ nɛnle kamɛ yi,

Yerusalem batii alafa anɛ-afosi-atiɛ-banyɔ;

30 di alɛɛ afosi-anyɔ-ditiɛfa nɔɔ kamɛ yi,

ɔka banyuntɛ kanyayilatɛ Nebusaradan lakpaa Yuda batii alafa akuɛnsĩ-afosi-ana-banɔɔ aasifiko sɛlanle kamɛ.

batii nwu bamuu labla nkpe nna-alafa akuɔ.

31 Di Yuda ɔka Yehoiakin sɛlanle kamɛ osiɛ lɛlɛɛ afosi-atiɛ dikuɛnsinle kamɛ, di lɛlɛɛ le kamɛ di Ewil-Merodak labale ni ɔka di Babel yi, ni aadiki Yuda ɔka Yehoiakin, di leyo katenkɔ, aatɔɔ suoto osiɛko di afosi-anyɔ dii nɔnle suoto di Israel batii lefosi kɔwɛntɛ nyɔɔfa kamɛ nɛ. 32 Aakakatɛ aatɔɔ ku sɛlɔ biene, aatɔɔ kafɔɔ dibu kasiɛkɔ ka niataka katoo kaalenkee ni baka bamba ba niawɛ ni ku nnwɔɔ di Babel n-le. 33 Nioso Yehoiakin ladiki leyo katenkɔ akpeele nɔɔ aatɛ, ni atoole alesaa obe lele kafɔɔ di ɔka opunu suoto nɛ. 34 Babel ɔka nwu latɔɔta Yehoiakin suoto onyu koto dii biala di obe kanya, di obe wɔ aasiɛ ni nkpa dialaase ni di dikpiyi nɔɔ nɛ.