1 "Di obe nwu kamɛ yi," SAATE nwu labuɛ alɛ, "Kamale Israel nfaabi nwu mmuu Yaa, mma kafɔɔ babale batii nii."

2 Nnya ɔlaa wɔ di SAATE nwu kobuɛ ni alɛ:

"Batii ba niɛwɛ ni nkpa di kapamii nwu kanya

kamawɛ sibualɛ di ɔfaafuu nwu kamɛ;

kamawa mmata Israel ɔnyɛɛ ɔtɛ."

3 SAATE nwu ladiki suoto aatuo wo di obe wɔ nitɔbafe ni kamɛ, aabuɛ alɛ:

"Labɔmbɔ fɔ ku lɛbɔmbɔ le ninaa ni kaloo;

lananfi fɔ ku sifutulɛ lɛbɔmbɔ.

4 Ao Kakpeelebitɛɛ Israel, kamakple ntakatɛ fɔ n-se

n-se fɔ kafɔɔ letofo.

Fabakple fanyɔ akasa lɛfɔ

fandie fankyɛ fanatũ ku suoto lɛyɔɔ banyatɛ.

5 Fabakple fankpɛ nta awoso kofe

di Samaria akpenkpe nwu suoto;

afe bakpɛntɛ kamasɔ nya

manle kafɔɔ awosobi ninya.

6 Dii kɔwa di banyuntɛ kamalɛɛ ni

di Efraim akpenkpe suoto alɛ,

‘Biwa, biɛta bukata bukyɛ Sion,

buɔkyɛ SAATE Yaa loo nwu nfũ.’ "

7 Nioso nnya ɔlaa wɔ di SAATE nwu kobuɛ ni alɛ:

"Bisa sinu ku suoto lɛyɔɔ bita Yakob;

biɛfafaa bita nnle nwu banɔɔfo.

Bita banu katansa lee, biɛsa bilɛ,

Oo SAATE, diki batii lɛfɔ,

Israel batii ba niebu basi ni nkpa.’

8 Nyu lo, kamakpaa ma nkyeko katookasɔ

nsiisa ma kafɔɔ nkyeko kasɔ nwu nyɛntɛlekɔ.

Anubabiɛtɛ ku abafa kamawɛ kaamɛ lɛma,

bamɛlakatɛ ku basanko ba di amɛ konu ni;

batii ɔlambu dibinte kamapɛmankple man-wa.

9 Babawa ku kaku owi;

babapɛ ɔlaa di obe wɔ kamakplesa ma n-wako nii.

Kamaleko ma katũ nfenko di seklenyii ntu ɔlɔɔkɔ

di osuku wɔ niɛkyɛkyɛ ni suoto di lɛba le manamatuula nii,

diekye ami ninle Israel kote,

Efraim kafɔɔ ninle obisuɔtɔbi nii kasale.

10 "Oo nnle, binu SAATE nwu ɔlaa;

biyie lɛkya di lekpo nsɔ be ninte ni fanfa kamɛ bilɛ:

‘Nnwɔ niasamiisa ni Israel kamasiisa ma,

abanyu kafɔɔ bafoso nɔɔ fɛle bafosokpatɛ.’

11 Diekye SAATE nwu kamata koto anfũ Yakob,

andiki ma kafɔɔ ankyeko batii ba nikpe osie balenke ma ni nnɛɛ.

12 Babawa mamayiisa suoto lɛyɔɔ kudu di Sion akpenkpe suoto;

man-nya suoto lɛyɔɔ di SAATE nwu dibiene suoto-

di alesaa, nta fɔle ku nnɔnyi,

afosobi ku anankyuebi suoto.

Babate fɛle kɔba ko beekpete ni ntu nwaa,

blɔbasin-wi kafɔɔ sɛnyaami diidii.

13 Ni bakpeele kamatũ mannya suoto lɛyɔɔ,

suoto n-yɔɔ kafɔɔ bakosopo ku banɔɔfo.

Kamamunikĩisa kaku owi lɛma mbla suoto lɛyɔɔ;

Kamakpee ma kɔnɛɛ kaafutu nta ma kafɔɔ suoto lɛyɔɔ, diele sɛnyaami owi.

14 Kamata olebatatɛ n-le mammiɛ ku alesaa kpinwu,

batii nii kafɔɔ kamamiɛ ku asaa nii biene,"

SAATE nwu niebuɛ.

15 Nnya ɔlaa wɔ di SAATE nwu kobuɛ ni alɛ:

"Sɛlɔ sinwii kodie di Rama,

sɛnyaami ku kaku owi osie kanya,

Rahel kowi anta babi nɔɔ

oosĩ kafɔɔ alɛ batankpee nwɔ kɔnɛɛ kaafutu,

ta di babi nɔɔ nsinaa ni oso."

16 Nnya ɔlaa wɔ di SAATE nwu kobuɛ ni alɛ:

"Diɛ kaku owi

di anu lɛfɔ adiɛ nnumɛɛ osoo,

diekye fabafũ ɔkpɛ lɛfɔ letota,"

SAATE nwu niebuɛ.

"Babapɛmankple di balo nwu kasɔ man-wa.

17 Nioso osuku onyu nkpe diɛta dii kaamaa lee,"

SAATE nwu niebuɛ.

"Babi lɛfɔ kamapɛmankple man-wa mma bamu kasɔ suoto.

18 "Nwaako ntoonu Efraim dituuni alɛ:

‘Faananfi mi fɛle lɛnankyuebi le manananfi nii,

ni ntɔɔwɛ lɛnanfi nɛ.

Kplesa mi fawako, ni kamapɛnkple,

diekye afɔ ninle SAATE Yaa nii nɛ.

19 Diekye di osuku nii oyu sɛmaa yi,

lakyi;

labanu ni kasɔ sɛmaa yi,

lafuusa kɔnɛɛ di ntɛɛ nii.

Sinunsɔ lakpɛ mi, lanunsu kafɔɔ,

diekye sekosopo nii obe sinunsɔ ntika mi di suoto.’

20 Diele obisuɔtɔbi nii bɔmbɔtɛ ninle Efraim,

obi wɔ suoto ninnya ni suoto lɛyɔɔ?

Kuntɛ nkakatɛ n-yila di suoto nɔɔ obelele yi,

nkple nnyuma nwɔ nwaa.

Nkpo oso otu nii nwolaa nwɔ;

nkpe sifutulɛ kplɛ lɛtɔɔ,"

SAATE nwu niebuɛ.

21 "Yɔ osuku nsũ atɛsaa fatɛ;

faatɛ nsũ atɛsaa.

Tɛ osuku kplɛ nsũ,

osuku wɔ suoto fankyɛ ni.

Oo Kakpeelebitɛɛ Israel, pɛfakple,

pɛfakple fawa sekpoo lɛfɔ.

22 Oo obisankobi wɔ ninaa ni onukwale,

ɔmɛmbe fabakyɛ fankyi fanaase?

SAATE nwu kamabla lɛsaa fɔle kaasɔ suoto-

ɔsanko kamakpɛ̀ di osuɔtɔ disi."

23 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: "Nse lekplesa ma lekyeko sɛlanle kamɛ lɛwako yi, batii ba ninsi ni di Yuda kasɔ ku sekpoo nisĩ kamɛ makple mambuɛ sɛlaa se mmle alɛ: ‘Oo kasiɛkɔ tinini, Oo kobokote klekle, SAATE nwu awii ye lɛtɔtrɔ.’ 24 Batii nwu kamasi mansiɛ di Yuda ku sekpoo nwu simuu kamɛ- bafekpɛntɛ ku mba ninkyɛ mankyi ni ku babɔkɛɛ lɛma. 25 Kamakpee mba diobuo ni osie fɔle nta mba kafɔɔ nikokpi ni kɔka n-le mammiɛ."

26 Nle mmle kanya lataka di sɛkyɔsĩ kamɛ, lanyunyuu lafenko nɛ. Sɛkyɔsĩ nii lalɛ mi ɔkyɛ.

27 SAATE nwu niebuɛ alɛ, "Nyu lo, obe kɔwa, kamata batii babi ku babɔkɛɛ abi nlɛɛsa ni di Israel batii ku Yuda batii kasɔ suoto. 28 Fɛ mmle okle lanyu ma baapɔ ma kaasɔ, baabɛbɛɛ ma baatɛ ni, baatakatɛ ma baayu ni, baawɔɔsa ma ninta kafɔɔ sɛlaa ntũ ma ni yi, nkpo kamanyu nintofo ma, ninta man-yila kafɔɔ nɛ," SAATE nwu niebuɛ. 29 "Di obe nwu kamɛ yi, batii dilɔbasimbuɛ alɛ,

" ‘Babibate niele awosobi ya niɛkplakpla nii,

kafɔɔ babi anyɛɛ niɛkplakpla.’

30 Kafɔɔ yi, otii biala kamakpi di nnwɔɔ omu nɔɔ sikpile suoto; otii lele niele awosobi ya niɛkplakpla ni yi- nnwɔɔ omu nɔɔ anyɛɛ nimakplakpla nɛ.

31 SAATE nwu niebuɛ alɛ, "Obe kɔwa,

kamabla ni kanya ninii fɔle

ku Israel batii

ku Yuda batii.

32 Klɔbate fɛle kanya ninii ka

labla ni ku bawa lɛma

di obe wɔ lakpaa ma ni ku kɔnɛɛ

laleko ma katũ ladieko ni di Egipte,

ta baalalaasa ni kanya ninii nii nwu so,

nu lale kɔsa lata ma,"

SAATE nwu niebuɛ.

33 "Nnya kanya ninii ka kamanii ni ku Israel batii

di obe nwu sɛmaa," SAATE nwu niebuɛ.

"Kamayɔ kufiofa nii nkpee di asibu lɛma kamɛ

nkpana nwu kafɔɔ ntika di situ lɛma suoto.

Kamale Yaa lɛma,

mma kafɔɔ babale batii nii.

34 Otii kuonwii dilɔbasintuo owo nɔɔ asaa,

ee otii atuo obilɛma-suɔtɔbi asaa, abuɛ alɛ, ‘Tofo SAATE nwu,’

diekye bamuu lɛma babatofo mi,

diɛyɔ ni di obisɔ diɛlaadu ni ɔnɔɔfo,"

SAATE nwu niebuɛ.

"Diekye kamayɔ akpilesaa lɛma ɔbla nkyɛ ma

nɔmasinyuma kafɔɔ sikpile lɛma."

35 Nnya ɔlaa wɔ di SAATE nwu kobuɛ ni alɛ,

nnwɔ ninta ni kufĩ

alɛ kupɛ ni di kakũ,

anta ni kɔwɛntɛ ku awɛntrɛbi

alɛ akpa ni di kakyɛ,

nnwɔ ninmbakaa ni lekpo

di mmle di afɛɛfɔ nɔɔ kapɛ amunikĩi nii-

leyooto nɔɔ ninle SAATE wɔ Ninlenke ni nɛ:

36 SAATE nwu niebuɛ alɛ,

"Diediki sɛlaa se mmle lɛyɛ di anu nii,

di Israel banantii dilɔbasinle

kale di anu nii nɛ."

37 Nnya ɔlaa wɔ di SAATE nwu kobuɛ ni alɛ:

"Nse babafuo osi kaatoo ɔklapoosa

babafuo kafɔɔ kasɔ asɔse nwu di kalɔ owolaa odiki,

ni kamasĩ Israel banantii bamuu

ta asaa ya amuu batɔɔbla ni oso,"

SAATE nwu niebuɛ.

38 SAATE nwu niebuɛ alɛ, "Obe kɔwa, babase ni okpoo kplɛ wɔ mmle dibudi ɔtɛɛ, diɛyɔ ni di Hananel leyo Takale nwu diɛlaadu ni di Leyokɔ Kayoko nwu kanya. 39 Babatika lɛklapoosaa okũ diɛyɔ ni ninfa tininini diesifi ni Gareb lekpenkpe, nimmunikĩi ninsifi Goa. 40 Ɔtaata nwu omuu di lɛba le mankookaa ni bakpi man-wii ni kafɔɔ ntɔ̀, ku afe nwu amuu di Kidron Ɔtaata di kufĩkatunkɔ diɛlaadu ni Pɔnkɔ Kayoko nwu leyokɔ suoto kamaklekle ninta SAATE nwu. Blɔbasinlalaasa okpoo kplɛ nwu ee babiɛ nwu diidii."