1 Nnya SAATE nwu ɔlaa wɔ niawa kuata ni ɔlaabuɛtɛtɛ Yeremia kuakye ni Filisti batii suoto fiɛ di Farao ladieko ni Gasa:

2 Nnya ɔlaa wɔ di SAATE nwu kobuɛ ni alɛ:

"Nyu mmle di ntu kobiɛ ninkye ni katookasɔ;

dibakple atukɛ kplɛ.

Ntu nwu kamabiɛ ninfe di kasɔ nwu ku lɛsaa biala ninsi ka kaamɛ suoto,

sekpoo ku batii ba ninsi sĩ ni kaamɛ.

Batii nwu kamafaa;

mba bamuu ninsi ni di kasɔ nwu suoto kamawi kaku,

3 nse bapɔnkɔ akpɔbi ya nikoyefe ni kaasɔ sɛlɔ kodie,

di balo nwu bakeke kudu kanya didie,

ku nkpaa lɛma diwi.

Babi bate dilɔbamunikĩi bakyakaako babi lɛma;

nnɛɛ lɛma kamakpɔnɔɔ ninsaka.

4 Diekye dii nwu ntoowo

alɛ baawɔɔsa Filisti batii bamuu,

manwɔɔsa kafɔɔ mba niebu basi ni nkpa

baafuo ni Tiro ku Sidon ɔkyakaako.

SAATE nwu nfɛ kamawɔɔsa Filisti batii nwu,

mba niebu basi ni nkpa, beekye ni Kaftor sekle kotoko.

5 Gasa kamakpaasu disi nɔɔ ansiɛ kaku;

Askelon kamalo kanana.

Ao mba niebu basi ni di kasɔ lakataa suoto,

ɔmɛmbe bibakyankya suoto lee minaase?

6 "Fabafaa falɛ, ‘Ao, SAATE nwu kapamii,

ɔmɛmbe dibadu fiɛ fabatɛ ɔnyɛɛ?

Pɛfakple fasifi kotofo lɛfɔ kamɛ;

diɛ, faate kloklo.’

7 Kafɔɔ lɛ kabatɛ ɔnyɛɛ

di obe wɔ di SAATE nwu niediki ka ni kanya,

di obe wɔ eekpee ka ni

alɛ kadieko ni Askelon ku okle kotoko?"