1 Nnya ɔlaa wɔ niakye ni SAATE nwu ɔkyɛ kuata ni Yeremia alɛ: 2 "Kyɔɔ atoko faanu sɛlaa se ninsi ni di kanya ninii le mmle kamɛ, faabuɛ sĩ fatɔkɔ Yuda batii ku batii ba nisi ni di Yerusalem. 3 Tɔkɔ ma falɛ nnya ɔlaa wɔ di SAATE, Israel Yaa nwu kobuɛ ni alɛ: ‘Bɛɛkpaani otii wɔ ninaambla ni di kanya ninii le mmle kanya- 4 Afiofa ya lakpee ni bawa lee di obe wɔ lakpaa ma lakyeko ni Egipte, ladieko ni di abɔɔsaa wɛɛfɛɛ kanyinakĩisakɔ.’ Latɔkɔ ma nlɛ, ‘bikyɔɔ mi atoko, biɛbla kafɔɔ lɛsaa biala le lɛtɔkɔ ye ni, ni bibale batii nii, ami kafɔɔ kamale Yaa lee. 5 Ni amii kamabla di ntam be laka lata ni bawa lee suoto, nlɛ kamayɔ kasɔ ka di nnyɛɛntu ku bablɔ kobiɛ ninfe ni nta ma nii’- kasɔ ka bikle ni miɛ."

Ni latuna nlɛ, "SAATE, diwa kaanya."

6 Ni di SAATE nwu latɔkɔ mi alɛ, "Yie lɛkya di sɛlaa se mmle simuu suoto di Yuda sekpoo kamɛ ku Yerusalem akpaka falɛ: Bikyɔɔ atoko di kanya ninii sɛlaa se mmle suoto, bietikanko sĩ. 7 Diayɔ ni di obe wɔ lakpaa bawa lee ladieko ni di Egipte diɛbase ni di miɛ, latoosĩ ɔlaa latɔɔta ma obelele, latoobuɛ nlɛ, "Bikyɔɔ mi atoko." 8 Kafɔɔ batakyɔɔ atoko ee banu ɔlaa; kafɔɔ, baatikanko situ kpile lɛma atokopĩsaa nwu. Nioso layɔ kanya ninii nwu akpaani ya amuu lakpee ma ni kufiofa nlɛ batikanko ni lawako ma di suoto, diekye batale nya.’ "

9 Ninfɛ di SAATE nwu latɔkɔ mi alɛ, "Kanwumbe okũ nsi di Yuda batii ku mba ninsi ni di Yerusalem kamɛ. 10 Batɔpɛbeekple beesifi bawa lɛma sikpile nwu, mba niasĩ ni sɛlaa nii atoko ɔkyɔɔ. Baatikanko bayaa bamba baalaasumu ma. Israel batii ku Yuda batii akyuu lɛma nwu anyɔ ntɔɔlalaasa kanya ninii le labla ni ku bawa lɛma. 11 Nkpo oso, nnya ɔlaa wɔ di SAATE nwu kobuɛ ni alɛ: ‘Kamayɔ ɔlaa kpile wɔ manamafuo ni otoso odie ni n-wako ma di suoto. Kuntɛ beewi bɛɛlɛɛ mi yi, namakyɔɔ ma atoko. 12 Yuda sekpoo nwu ku Yerusalem batii kamasifi maanaawi mankpee bayaa ba manfiɛ olufui manta nii, kafɔɔ blɔbata ma lɛkyakaako saa nse ɔlaa kpile otũ nwu lɛwa. 13 Oo Yuda, bikpe bayaa kpinwu fɛ mmle bikpe ni sekpoo; seleɔta akyikye ya kafɔɔ biɛpɛ biese minfiɛ ni olufui minta ni anunsɔsaablatɛ Baal yaa nwu mpɔ fɛ mmle di Yerusalem akpaka mpɔ nii.’

14 "Yeremia, tampɛ ɔlaa faata batii ba mmle ee faatikiti lekoto di disi lɛma ee faabuɛ ɔlaa faata ma, diekye namakyɔɔ atoko nse bɛɛlɛɛ mi di nimiina lɛma obe kamɛ.

15 "Obe di bɔmbɔtɛ nii kɔbla di olekatakɔ nii

di obe wɔ akle ni kanwumbe okũ nɔɔ kpile nwu ɔɔblako ni ɔkpɛ ku batii kpinwu?

Sina se beekleklesa ni kamafuo letokonanfi lɛfɔ osuku otĩi?

Di obe wɔ fɔɔbla ni asiensiesaa lɛfɔ nwu,

fan-nya ni suoto lɛyɔɔ."

16 SAATE nwu nlɛɛ fɔ alɛ nnɔnyi kowoso ko niefukuti ni nwaa

kuntika ni abi biene.

Kafɔɔ di afɛɛfɔ siene ɔfɛ kamɛ

abakpee kũ ɔtɔ kunfiɛ

sɛla nikũ nfefee.

17 SAATE wɔ Ninlenke ni, nnwɔ niese fɔ ni, ntɔɔtɛ ɔlaa kpile otũ ɛɛta fɔ. Diekye Israel batii ku Yuda batii ntɔɔbla okpile beekpee mi kafɔɔ ɔblɔ di olufui wɔ bɔɔfiɛ manta ni Baal suoto.

18 Ta di SAATE nwu ladiki ni kanwumbe okũ lɛma nwu aatuo mi ni oso yi, latofo nwu ole, diekye aatuo mi lɛsaa le baatɔɔbla ni di obe nwu kamɛ. 19 Late fɛle lefosobi buɛɛ le bɔɔkpaa manfenko ni kalokɔ; ntatofo nlɛ beekũ kanwumbe di suoto nii, mambuɛ alɛ,

"Bita buwɔɔsa kowoso nwu ku abi nikũ;

bita bulo nwɔ budiki di nkpa basiɛtɛ kasɔ suoto,

alɛ balaasinyuma leyooto nɔɔ diidii."

20 Oo SAATE wɔ Ninlenke ni, kafɔɔ yi, afɔ wɔ ninka ni lɛka di ditinini kanya,

fansɔ ni otu ku disibu fannyu ni,

tɛɛ nnya ɔbla okyisa lɛfɔ di suoto lɛma,

diekye afɔ lɛyɔ ɔlaa nii lɛta.

21 "Nkpo oso, nnya ɔlaa wɔ di SAATE nwu kobuɛ ankyeko ni Anatot batii ba nikomiɛ alɛ boolo fɔ ni suoto boobuɛ ni kafɔɔ alɛ, ‘Tambuɛ ɔlaa faatɛ ni di SAATE nwu leyooto kamɛ, nse diele nkpo fabakpi ni di nnɛɛ loo.’ 22 Nkpo oso nnya ɔlaa wɔ di SAATE wɔ Ninlenke ni kobuɛ ni alɛ: ‘Kamananfi ma kootoko. Bakosopo lɛma kamakpi di kapamii kanya, babisuɔtɔbi ku babisankobi lɛma kafɔɔ kamakpi di kɔka kanya. 23 Bia otii kuonwii dilɔbabu asiɛ nkpa ata ma, diekye kamayɔ ɔlaa kpile otũ n-wako di Anatot batii suoto di letokonanfi lɛlɛɛ lɛma kamɛ.’ "