1 Di Yuda ɔka Yosia obisuɔtɔbi Yehoiakim sɛka ole kasɔkakyekɔ kamɛ yi, ɔlaa wɔ mmle lakye SAATE nwu ɔkyɛ kuawa alɛ: 2 "Nnya ɔlaa wɔ di SAATE nwu kobuɛ ni alɛ: Yila di SAATE nwu leyo kaflɔnkɔ, faakakatɛ fata Yuda sekpoo batii ba bamuu nin-wa mamasumu ni di SAATE nwu leyo kamɛ. Tɔkɔ ma ɔlaa biala latɔkɔ fɔ ni; tandiki ɔlaa kuninwii kaamɛ. 3 Loobia babakyɔɔ atoko, obiala lɛma kafɔɔ nkyi di osuku kpile nɔɔ suoto. Ni kamadiɛ, namasinta ɔlaa kpile wɔ latɛ nlɛ kɔyɔ n-wako ni di suoto lɛma, ta okpile wɔ batɔɔbla ni kuwa di suoto lɛma. 4 Tɔkɔ ma falɛ, ‘Nnya ɔlaa wɔ di SAATE nwu kobuɛ ni alɛ: Nse biɛɛkyɔɔ mi atoko bitikanko kafɔɔ kufiofa nii ko lɛtɛ ni di anu lee, 5 nse biɛɛkyɔɔ kafɔɔ bakpɛmblatɛ nii ɔlaababuɛtɛtɛ sɛlaa atoko, mba lakpee ni, lakple lakpee ni kɔtɔ di ɔkyɛ lee (nu bitakyɔɔ ma atoko), 6 nioso kamabla leyo le mmle fɛle Silo, nimbla kafɔɔ okpoo kplɛ wɔ mmle lɛkpaani di kasɔ suoto nnle mmuu kamɛ.’ "

7 Olebatatɛ, ɔlaababuɛtɛtɛ ku batii nwu bamuu lanu di Yeremia lakakatɛ ni sɛlaa se mmle di SAATE nwu leyo kamɛ. 8 Kafɔɔ nfanwu di Yeremia laloo ni sɛlaa se simuu di SAATE nwu latɔkɔ nwɔ alɛ atɔkɔ ni batii nwu bamuu yi, ni di olebatatɛ, ɔlaababuɛtɛtɛ ku batii nwu bamuu lamufũ nwɔ babuɛ alɛ, "Dikpeni feekpi! 9 Obe oso foobuɛ ɔlaa fantɛ di SAATE nwu leyooto kamɛ falɛ leyo le mmle kamate fɛle Silo, di okpoo kplɛ wɔ mmle kafɔɔ kamate ofukuti, batii ndie nwu kaamɛ?" Ninfɛ di batii nwu bamuu lasi di Yeremia suoto di SAATE nwu leyo kamɛ nɛ.

10 Di Yuda banɔɔfotii lanu ni sɛlaa se mmle yi, baadie di lɛkayo baasifi SAATE nwu leyo, ni baalaasiɛ di nsiɛkɔ lɛma di SAATE nwu leyo Kayoko Fɔlɛ kayokontũ nɛ. 11 Ninfɛ di olebatatɛ ku ɔlaababuɛtɛtɛ nwu latɔkɔ banɔɔfotii nwu ku batii nwu bamuu alɛ, "Dikaatɛ alɛ beelo osuɔtɔ wɔ mmle, diekye eebuɛ ɔlaa ɛɛtɛ eeyila ni di okpoo kplɛ wɔ mmle suoto. Bitoonu nwu ku aye bamu atoko!"

12 Ni di Yeremia latɔkɔ banɔɔfotii nwu bamuu ku batii nwu bamuu alɛ: "SAATE nwu niekpee mi alɛ mbuɛ ɔlaa ntɛ di leyo le mmle ku okpoo kplɛ wɔ mmle suoto di sɛlaa se simuu bitoonu ni suoto. 13 Nunua yi, bikyi di sisuku lee ku sɛsaabla lee suoto, biɛkyɔɔ kafɔɔ SAATE Yaa lee atoko. Ni SAATE nwu kamadiɛ, ɔlɔbasinta ɔlaa kpile wɔ aabuɛ ni kuwa di suoto lee. 14 Kafɔɔ ami yi, nsi ye ninnɛɛ; bibla mi lɛsaa lele bienyu bilɛ dilɛ, diesiɛko ni. 15 Kafɔɔ bitofo bilɛ, nse bielo mi yi, bibayɔ ntɔ be ninambla ni lɛsalɛsaa lɛpɔɔ okpi minwako di suoto lee ku okpoo kplɛ wɔ mmle ku batii ba ninsi ni ninwu kamɛ suoto. Diekye di onukwale kamɛ yi, SAATE nwu lakpee mi ɔkyɛ lee alɛ mbuɛ sɛlaa se mmle simuu nkpee di atoko lee kamɛ."

16 Ninfɛ di banɔɔfotii nwu ku batii nwu bamuu latɔkɔ olebatatɛ ku ɔlaababuɛtɛtɛ nwu alɛ, "Diɛkaatɛ alɛ beelo osuɔtɔ wɔ mmle! Ɛɛkakatɛ ɛɛta wo di SAATE Yaa loo nwu leyooto kamɛ."

17 Ni di kasɔ nwu banɔɔfo bawo ladie baawa sitũ baabatɔkɔ kasikɔ nwu kamuu alɛ, 18 "Mika wɔ niakye ni Moreset labuɛ ɔlaa aatɛ di Yuda ɔka Hesekia obe kamɛ. Aatɔkɔ Yuda batii bamuu alɛ, ‘Nnya ɔlaa wɔ di SAATE wɔ Ninlenke ni kobuɛ ni alɛ:

" ‘Babafúu Sion fɛle kofe,

Yerusalem kamakple atɛnkudi ya besiisa bɛɛtɛ nii,

olekatakɔ nwu lekpenkpe kafɔɔ kamakple ditii nin-yii nimbla kafɔɔ lepoo.’

19 "Yuda ɔka Hesekia ee otii bamba owo di Yuda lalo nwɔ? Diele ɔyɛkɛ di Hesekia layɛkɛ SAATE nwu aakaalɛ sifutulɛ nɔɔ ole? Ni SAATE nwu kafɔɔ ditadiɛ, alɛ atasinta ɔlaa kpile wɔ aabuɛ ni alɛ abɔyɔ anwako ma ni di suoto? Nfɛ buɔwa ɔlaa kpile siene owo ɔyɔ ɔwako di suoto loo!"

20 (Semaia obisuɔtɔbi Uria wɔ niakye ni Kiriat-Yearim lale osuɔtɔ bamba wɔ niatoobuɛ sɛlaa aatɔɔtɛ ni di SAATE nwu leyooto kamɛ; aabuɛ sɛlaa se mmle okle aatɛ di okpoo kplɛ wɔ mmle ku kasɔ ka mmle suoto fɛ nse di Yeremia labuɛ nii. 21 Di Ɔka Yehoiakim ku kakpɛ kanyabayilatɛ nɔɔ ku banɔɔfotii nɔɔ lanu ni sɛlaa nɔɔ nwu yi, ɔka nwu latɛ alɛ abalo nwɔ. Kafɔɔ Uria lanu nwu ole ni aayɛkɛ aatoso aasifi Egipte nɛ. 22 Ninfɛ di Ɔka Yehoiakim, lakpee Akbor obisuɔtɔbi Elnatan, diakyakaa ni ku basuɔtɔ bawo di Egipte nɛ. 23 Baalakpaa Uria baadieko di Egipte ni baayɔ nwɔ baakyɛnko Ɔka Yehoiakim wɔ niata baalo nwɔ ni ku kapamii, ni baafuki kpi nɔɔ baatɛ di batii ba ninandie ni lɛsalɛsaa kakookaakɔ nɛ.)

24 Diɛkyɛkaa ni yi, Safan obisuɔtɔbi Ahikam layila Yeremia kamaa, nioso batayɔ nwɔ bakpee di batii nwu nnɛɛ alɛ balo nwɔ.