1 "Oo Israel, nse fabapɛfankple yi,

faapɛfakple fawa ɔkyɛ nii,"

SAATE nwu niebuɛ.

"Nse feekyisa diyududusaa afiɔ lɛfɔ nwu di anu nii,

alɛ flaasin-yu osuku kafɔɔ,

2 ni nse di onukwale ole, nwaako ku osuku tinini kanya yi,

ni ka ntam falɛ, ‘Nwaako di SAATE nwu lɛnya akpe ni nkpa,’

ni abawii nnle nwu lɛtɔtrɔ,

di nnwɔɔ kamɛ kafɔɔ babawɛ lɛkpa."

3 Nnya ɔlaa wɔ di SAATE nwu kɔtɔkɔ ni Yuda ku Yerusalem batii alɛ:

"Bikpɛ afe di aputu lee kasɔ suoto,

kafɔɔ batankpee asaa di siwuu kamɛ.

4 Bibla suoto ɔkyɛlɛnsa lee bita SAATE nwu,

biɛkyɛlɛnsa situ lee,

aye Yuda ku Yerusalem batii,

nse diele nkpo ni ɔblɔ nii kamataka fɛle ɔtɔ wɔ ninkofiɛ nii,

ta akpilesaa ya biɛbla ni oso-

kubafiɛ di kuonwii nnaa abaniisa nwu nii.

5 "Biyie lɛkya di Yuda, biebuɛ di Yerusalem bilɛ:

‘Bifɛ dikyukyoo di kasɔ nwu kamuu bifenko!’

Bifaa osie kanya biebuɛ bilɛ:

‘Bisi dikudi!

Biɛta butoso busifi sekpoo kplɛ siene nwu kamɛ!’

6 Bitakatɛ flankaa nwu katoo bikyɔɔ Sion!

Bitoso biefũ nkpa lee, bitankyɛkyɛlɛ!

Diekye kokyeko ɔlaa kpile katookasɔ nwako,

bia kawɔɔ siene."

7 Kyata ntoodie eekye lepoo nɔɔ kamɛ;

nnle nwu asaa-wɔɔsatɛ ntoodie kayi.

Atoodie di kasiɛkɔ nɔɔ

alɛ ɔɔbata kasɔ lɛfɔ nte kafukuti.

Abata sekpoo lɛfɔ kamabiɛ

di batii dilɔbasiɛ sĩ ni kaamɛ.

8 Nioso biklee aboko,

biewi sɛnyaami biwi kaku,

diekye SAATE nwu ɔblɔ yakayaka nwu

kanya diiyɔɔ di suoto loo.

9 SAATE nwu niebuɛ alɛ, "Di dii nwu suoto,"

"Ɔka ku banɔɔfotii nɔɔ otu kamakpa,

difu kamapɛ olebatatɛ,

nimbla kafɔɔ ɔlaababuɛtɛ ɔkpɛ."

10 Ninfɛ labuɛ nlɛ, Ao, SAATE Kplɛ, nyu mmle fɛɛtɛ fɛɛkyɔnkyɔ ni batii ba mmle ku Yerusalem feebuɛ ni falɛ, ‘Bibasiɛ ni di atoko ɔkyɛ ole kamɛ,’ di obe wɔ di kapamii ntika ni di sewolonwo loo."

11 Di obe nwu nkpo kamɛ, babatɔkɔ batii ba mmle ku Yerusalem alɛ, "Kɔfɛɛfɔ kpankpa lekye abokote ya niekpi ni osi di ɔfaafuu kamɛ kɔfɛ kunfe batii nii ɔkyɛ, kafɔɔ diele nko nin-fɛ ni sɛsɔ ee kundiki ni akù; 12 kɔfɛɛfɔ ko ninkye ni ɔkyɛ nii ntɛ kun-wɛ osie kulenke nii. N-se ami ntoobuɛ akanko nii di suoto lɛma."

13 Nyu lo! Ɔɔwa fɛle alokonkyɛ,

Bakeke nɔɔ ba di bapɔnkɔ nnanfi ni kɔwa fɛle kakitikɔ,

bapɔnkɔ nɔɔ nkpe sɛwa balenke baklikpo.

Buyɔɔsa! Butɔɔwɔɔ!

14 Oo Yerusalem, foto akpilesaa nwu di otu lɛfɔ, faawɛ didiki.

Ɔmɛmbe fabaklee disibu kpile nwu faanaase?

15 Sɛlɔ sinwii kodie sinkye Dan,

sioyie lɛkyɛ di ɔlaa kpile wɔ niekye ni Efraim abokote osi suoto.

16 "Bibuɛ nwu bitɔkɔ nnle nwu,

biyie nwu lɛkya bita Yerusalem bilɛ:

‘Bakpɛtɛ lekye kasɔ fanfa suoto bɔɔwa,

bɔɔsa kakpɛ sinu di Yuda okpoo kplɛ suoto.

17 Bɛɛmana okpoo kplɛ nwu beekyi fɛle batii ba nikonyu ni afe,

diekye batii nwu lɛtaka beeyila mi di suoto,’"

SAATE nwu niebuɛ.

18 "Afɔ omu ablasaa ku kɔkpaa dikibi

niɛta nle mmle lɛwa di suoto lɛfɔ nɛ.

Nle mmle ninle letoko nanfi lɛfɔ nɛ.

Nyu mmle dikpeni olo!

Mmle diotofo ninkyɛ ni otu kamɛ!"

19 Ao, otu nii, otu nii!

Konu dibuo lo!

Ao, otu nii kɔkpa!

Otu nii kɔpɛ di kamɛ nii,

namafuo kanya ɔmaasa osiɛ.

Diekye ntoonu dikyukyoo nwu sɛlɔ;

ntoonu kakpɛ nwu kudù.

20 Ɔlaa kpile ntikanko ɔlaa kpile bamba;

kasɔ nwu kamuu ntɔɔlalaa.

Di nfanwu bɛɛwɔɔsa akpanta nii,

dibula le nietĩi mi ni di obe kakuu kamɛ.

21 Ku omɛmbe kamanya kakpɛ flankaa nwu nnaase,

kamanu kafɔɔ dikyukyoo nwu sɛlɔ?

22 "Batii nii diebe anu;

baaye mi.

Babi ba ninan-ye ni lɛsaa bale;

banaa lɛsɔnu.

Baye akpilesaa ɔbla kamɛ;

baaye mmle mambla ni dibiene."

23 Lanyu kasɔ suoto,

katawɛ letembi, kaate kafukuti;

lanyu osi kafɔɔ,

lɛkpa lɛma kafɔɔ ditawɛ.

24 Lanyu abokote,

aatootũkũ;

akpenkpe amuu latɔɔkpankpa.

25 Lanyu, batii kafɔɔ ditawɛ;

kansiɛ biala di kolo ntɔɔflɛlɛtɛ eesifi.

26 Lanyu, kasɔ ka ninlɛ ni asaa kafɔɔ labla ɔfaafuu;

sekpoo nisĩ simuu labiɛ siate

di SAATE nwu anu, di ɔblɔ yakayaka nɔɔ anu.

27 Nnya ɔlaa wɔ di SAATE nwu kobuɛ ni alɛ:

"Kasɔ kamuu kamalalaa,

nu ninamawɔɔsa ka fɛɛ.

28 Nkpo oso kasɔ kamawi

osi kaatoo kafɔɔ kamabla ditunu,

diekye ntɔɔkakatɛ, namakplesa kanya kafɔɔ,

ntɔɔtɛ ɔbla, namasinkple sɛmaa."

29 Ta bapɔnkɔ basiɛtɛ ku akplɔ bayuntɛ kudu oso,

okpoo biala batii latoso.

Bawo labuo di apookuu kamɛ;

bawo lakata di afuɔnkpaa suoto.

Sekpoo nwu simuu labiɛ;

kuonwii diesinsi sĩ kaamɛ.

30 Ao, afɔ wɔ bɛɛwɔɔsa ni, obe fɔɔbla?

Obe oso fakle dibula sɛɛle

feekpee kafɔɔ koto sɛɛle asaa?

Obe oso fɛɛkyankya anu lɛfɔ ku kɔfa?

Kasakasa feelolaa suoto lɛfɔ.

Basɔnɔ lɛfɔ ntoosĩ fɔ;

boomiɛ alɛ balo fɔ.

31 Konu kudu fɛ ɔsanko nikɔkpɛ kolofo,

atuuni fɛ ɔsanko wɔ nikolofo ni obi nɔɔ kasale-

Sion obisankobi di ninwuna diloowo ni lɛfaa,

oowii ni nnɛɛ nɔɔ ambuɛ ni alɛ,

"Ao! Kokpi lo;

bɛɛyɔ nkpa nii beekpee di batii balotɛ nnɛɛ."