1 Obe wɔ di Babel ɔka Nebukadnesar ku bakpɛtɛ nɔɔ bamuu ku sɛkanlekɔ nwu mmuu ku batii ba suoto oole ni sɛka di kale nwu kamɛ latɔɔkpɛko ni Yerusalem ku sekpoo se simuu niɛmana nwu siekyi ni yi, ɔlaa wɔ mmle lakye SAATE nwu nfũ kuata Yeremia alɛ: 2 Nnya ɔlaa wɔ di SAATE nwu, Israel Yaa kobuɛ ni alɛ: Tɔɔkyɛ Yuda ɔka Sedekia nfũ faalaatɔkɔ nwɔ falɛ, ‘Nnya ɔlaa wɔ di SAATE nwu kobuɛ ni alɛ: Nfɛ kɔbayɔ okpoo kplɛ wɔ mmle nkpee di Babel ɔka nnɛɛ, abafiɛ nwu antɛ kaasɔ. 3 Flɔbadie nwɔ ninnɛɛ, kafɔɔ nwaako babamufũ fɔ man-yɔ fɔ mankpee nwɔ ninnɛɛ. Fabanya Babel ɔka nwu ku afɔ omu lɛfɔ anumbi, ankakatɛko fɔ anu ku anu. Ni fabasifi Babel.

4 " ‘Oo Yuda ɔka Sedekia, kafɔɔ nu ɔlaa wɔ di SAATE nwu kobuɛ antɛ anta fɔ ni. Nnya ɔlaa wɔ di SAATE nwu kobuɛ ankyeko ni suoto lɛfɔ alɛ: Flɔbakpi di kapamii kanya; 5 fabakpi di atoko ɔkyɛ ole kamɛ. Fɛ mmle di batii nsafɔ ni otutuo di lɛkpaka mambla kaku manta ni bawa lɛfɔ dibu, baka ba nitosiɛ bɛɛbafe ni fiɛ di afɔ yi, nkpo babasafɔ otutuo manta fɔ dibu man-wi kaku alɛ, "Ao, Oo saate!" Ami omu nii niebuɛ ɔlaa wɔ mmle letika difuɔ, SAATE nwu niebuɛ.’ "

6 Ninfɛ di Yeremia labuɛ sɛlaa se mmle simuu aatɔkɔ Yuda ɔka Sedekia, di Yerusalem nɛ, 7 di obe wɔ di Babel ɔka bakpɛtɛ latɔɔkpɛko ni Yerusalem ku Yuda sekpoo kplɛ bamba- Lakis ku Aseka. Nse mmle niale sekpoo kplɛ siene se lete niabu ni di Yuda nɛ.

8 Ɔlaa nwu lakye SAATE nwu nfũ kuata Yeremia di obe wɔ di Ɔka Sedekia labla ni kanya ninii ku batii nwu bamuu di Yerusalem alɛ bayie lɛkya bata ni balanle suoto osiɛko sɛmaa alɛ, 9 otii biala adiɛ ni ɔlanle nɔɔ wɔ ninle ni Hebri otii, basuɔtɔ ku basanko akyuu nwu anyɔ; kuonwii atanta Yuda otii wo nɔɔ lasiɛ di ninii kamɛ. 10 Nioso banɔɔfotii nwu bamuu ku batii ba niabla ni kanya ninii ka mmle latuna alɛ babadiɛ basuɔtɔ ku basanko balanle lɛma alɛ blasinta ma basiɛ di ninii kamɛ. Baatuna, ni baadiɛ ma nɛ. 11 Kafɔɔ sɛmaa yi, baamunikĩisa asibu lɛma, ni baakple baafũ balanle ba baadiɛ ni baakplesa ma baabla balanle nɛ.

12 Ninfɛ di SAATE nwu ɔlaa lawa kuata Yeremia alɛ: 13 "Nnya ɔlaa wɔ di SAATE nwu, Israel Yaa kobuɛ ni alɛ: Labla kanya ninii ku bawa lee di obe wɔ lakpaa ma ladieko ni di Egipte, di sɛlanle kasɔ nwu suoto. Labuɛ nlɛ, 14 ‘Dikpeni mindiɛ Hebri otii wo lee lele wɔ niasunsũ suoto nɔɔ aata ye ni di alɛɛ akuɛnsĩ biala sɛmaa. Di alɛɛ akuɔ sɛmaa, atɔɔbla ɔkpɛ ɛɛta fɔ ni yi, dikpeni fandiɛ nwɔ ansifi.’ Kafɔɔ bawa lee, ditanu ee bakyɔɔ mi atoko. 15 Kɔsanklo ko mmle biakyisa nkpa biabla lɛsaa le ninlɛ ni di anu nii: Obiala lee layie suoto osiɛko lɛkya aata okpoo nɔɔ batii. Biabla bia kanya ninii di anu nii di leyo le manlɛɛ ni Leyooto nii. 16 Kafɔɔ kanunua, bitookyi biɛkpɔnɔfɔsa leyooto nii; obiala lee ntookple ɛɛkpaa basuɔtɔ ku basanko balanle ba biadiɛ bilɛ basifi ni kakɔ lele boomiɛ nii. Bitoonyinka ma bilɛ bakple bale ye balanle.

17 "Nkpo oso, nnya ɔlaa wɔ di SAATE nwu kobuɛ ni alɛ: Bitakyɔɔ mi atoko; bitayie lɛkya di suoto osiɛko bita okpoo lee batii. Nioso nfɛ koyie ‘suoto osiɛko’ lɛkya nta ye, SAATE nwu niebuɛ- ‘suoto osiɛko’ alɛ bianɔɔ di kapamii, ofiɛ kpile ku kɔka-ɔkpɛ kanya. Kamabla ye diyududusaa nta sɛkanlekɔ nwu mmuu kaasɔ suoto. 18 Batii ba niafukuti ni kanya ninii nii nwu batabla ni kafɔɔ di kanya ninii ka baabla ni di anu nii sɛlaa kanya yi, kamabla ma fɛ mmle mambudi ni lɛnankyuebi di akyuu anyɔ, mankyɛ manfe ni di nkyɛ nwu nnyɔ obo. 19 Yuda ku Yerusalem batunletɛ, kaflɔnkɔ nwu banɔɔfotii, olebatatɛ ku kasɔ nwu batii bamuu ba ninkyɛ ni di lɛnankyuebi nwu nkyɛ obo yi, 20 kamayɔ ma nkpee di balo lɛma ba nikomiɛ ni kukpi lɛma nnɛɛ. Bakpi lɛma kamakple alesaa anta bakansiɛ di kɔfɛɛfɔ ku lepoo kamɛ babɔkɛɛ di kasɔ suoto.

21 "Kamayɔ Yuda ɔka Sedekia ku banɔɔfotii nɔɔ nkpee di balo lɛma ba nikomiɛ ni kukpi lɛma, ku Babel ɔka bakpɛtɛ ba nitookple ni nkpaamaa di suoto lee nnɛɛ. 22 SAATE nwu niebuɛ alɛ, nyu lo, kɔwa kanya ɔbadiki, ninkplesa ma n-wako okpoo kplɛ wɔ mmle kamɛ. Babakpɛko nwu, manfũ nwu, manfiɛ mantɛ kaasɔ. Kamata kafɔɔ Yuda sekpoo nwu nlalaa sinte alɛ otii kuonwii dilaafuo osiɛ ninfa."