Yeremia 39

Yerusalem Okpoo Obiɛ

Nnya mmle baafũ ni Yerusalem:

1 Di Yuda ɔka Sedekia sɛka ole lɛlɛɛ naasinle kamɛ, di Israel batii kɔwɛntɛ fosile kamɛ yi, Babel ɔka Nebukadnesar ku bakpɛtɛ nɔɔ bamuu ladie baakyɛ baalaamana Yerusalem baakyi. 2 Di Sedekia lefosi lɛlɛɛ kasale di Israel batii kɔwɛntɛ naafa dii naasinle kamɛ, baabiɛ okpoo kplɛ nwu oyoyiɛ baabuo. 3 Ninfɛ di Babel ɔka banɔɔfotii lawa baabafũ nsiɛkɔ di Ntɛɛntɛɛ Kayoko nwu nɛ: Nergal-Sareser niakye ni Samger, Nebo-Sarsekim ɔnɔɔfotii nɔɔfo, Nergal-Sareser ɔnɔɔfotii kplɛ ku Babel banɔɔfotii bamba bamuu. 4 Obe wɔ di Yuda ɔka Sedekia ku bakpɛtɛ bamuu lanya ma ni yi, baatoso; baafe di ɔka kɔba osuku ku kakyɛ baadie di okpoo kplɛ nwu kamɛ, baafe di eyoyiɛ nwu ɛnyɔ obo, ni baatũ disi diofe ni Araba*39.4 nfa ninle ni Yordan Ɔtaata nɛ nɛ.

5 Kafɔɔ Babel batii bakpɛtɛ latikanko ma baalaatũ Sedekia di Yeriko kasɔ lɛtaata suoto. Baamufũ nwɔ ni baakpaa nwɔ baakyɛnko Babel ɔka Nebukadnesar di Ribla di Hamat kasɔ suoto nɛ, nfa aakanko nwɔ aalo nwɔ lɛpɔɔ nɛ. 6 Di Ribla ninfa di Babel ɔka lalo Sedekia babisuɔtɔbi di anu nɔɔ, aalo kafɔɔ Yuda batii finle bamuu nɛ. 7 Ninfɛ aabɔkɔtɛ Sedekia anumbi, aanii nwɔ ku abɔɔsaa sɛɛle sɛkpɛnkyɛ, aakpaa nwɔ aasifiko Babel nɛ.

8 Ni di Babel batii lakpee lɛkayo nwu ku batii nwu ayo ɔtɔ, baabibiɛ kafɔɔ Yerusalem seyoyiɛ baatɛ kaasɔ nɛ. 9 Ninfɛ di ɔka banyuntɛ kanyayilatɛ Nebusaradan lakpaa batii ba niabu ni di okpoo kplɛ nwu, diakyakaa ni di batii ba niasifi ni ɔkyɛ nɔɔ ku batii bule aasifiko sɛlanle kamɛ di Babel nɛ. 10 Kafɔɔ banyuntɛ nwu kanyayilatɛ Nebusaradan ladiɛ bapiitɛ ba bawo ninaa ni lɛsalɛsaa di Yuda kasɔ suoto; ni aata ma nta afe ku afe di obe nwu kamɛ nɛ.

Baadiɛ Yeremia Aasifi

11 Ninfɛ di Babel ɔka Nebukadnesar lata afiofa ya mmle di Yeremia suoto diafe ni di ɔka banyuntɛ kanyayilatɛ Nebusaradan suoto alɛ: 12 "Kpaa nwɔ fasifiko faalaanyu nwɔ disi; tambla nwɔ amumu kafɔɔ bla lɛsaa lele ɛɛkaalɛ fatɔɔ." 13 Nioso banyuntɛ nwu kanyayilatɛ Nebusaradan, ɔnɔɔfotii nɔɔfo Nebusasban, ɔnɔɔfotii kplɛ Nergal-Sareser ku Babel ɔka banɔɔfotii bamba bamuu 14 lakpee baalaadiki Yeremia di banyuntɛ nwu leyo kaflɔnkɔ baawako. Ni baayɔ nwɔ baakpee di Safan ɔwa wɔ niale ni Ahikam obisuɔtɔbi Gedalia nnɛɛ, alɛ akpaa nwɔ asifiko okpoo nɔɔ nɛ. Nioso aasiɛ di batii nɔɔ bamu kamɛ.

Osuku Onyu Kuɔta Ni Ebed-Melek

15 Obe wɔ di Yeremia lawɛ ni di leyo katenkɔ di banyuntɛ nwu kafɔlɔnkɔ yi, SAATE nwu ɔlaa lawa kuatɔɔ alɛ: 16 "Tɔɔkyɛ faalaatɔkɔ Etiopia otii nwu Ebed-Melek falɛ, ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Nfɛ kɔɔwa ɔbabla di sɛlaa nii kanya di okpoo kplɛ wɔ mmle suoto, diefe ni di sɛlaa kpile otũ, ninanle ni lɛlɛ. Sibawa kaanya di obe nwu kamɛ di anu lee. 17 Kafɔɔ kamadiki fɔ di dii nwu nkpo suoto, SAATE nwu niebuɛ; blɔbayɔ fɔ bakpee di batii ba fan-yɛkɛ ni nnɛɛ. 18 Kamadiki fɔ; flɔbakpi di kapamii kanya, kafɔɔ fabatoso ku nkpa lɛfɔ, ta feetika mi ni disi oso, SAATE nwu niebuɛ.’ "