1 Nnya ɔlaa wɔ niakye SAATE nwu ɔkyɛ kuata ni Yeremia alɛ: 2 "Yila di SAATE nwu leyo kayoko faayie lɛkya di ɔlaa wɔ mmle suoto ninfa falɛ:

" ‘Binu SAATE nwu ɔlaa, aye Yuda batii ba bamuu ninfe ni di n-yoko be mmle kamɛ minwa mimasumu ni SAATE nwu: 3 Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Bilolaa sisuku lee ku ablasaa lee, ni kamata ye minsiɛ di lɛba le mmle. 4 Bitantika disi di sɛlaa ku afunu sɛlaa suoto biabuɛ bilɛ, "Nnya SAATE nwu olekatakɔ, SAATE nwu olekatakɔ, SAATE nwu olekatakɔ!" 5 Nse nwaako biɛkyɛlɛnsa sisuku lee ku ablasaa lee biɛka kafɔɔ lɛka biene di bawo lee kamɛ, 6 nse bieenyinka bafɔɔ, bakuɛbi ee bakpisɔfɔ minanwii kafɔɔ batii ba ninankpi ni lɛpɔɔ ntɔ kaasɔ di lɛba le mmle nwu, nse biɛlaatikanko kafɔɔ bayaa bamba alɛ diale dikpilesaa ninta aye bamu yi, 7 ni kamata ye minsiɛ di lɛba le mmle, di kasɔ ka layɔ lata ni bawa le dinaa ni kaloo. 8 Kafɔɔ nyu lo, biotika disi di kayɔnkyɔ sɛlaa se ninandie ni lɛsalɛsaa suoto.

9 " ‘Bibatooyu, mintoolo kafɔɔ batii, mintookpee asɔnɔ mintɔɔka kafɔɔ ntam kasakasa, mintoofiɛ olufui mintɔɔta Baal, mintikanko kafɔɔ bayaa ba bitatofo ni, 10 minwa mimmayila di anu nii di leyo le mmle kamɛ, leyo le di Leyooto nii ntika ni, mimbuɛ bilɛ, "Bunaa ole"-bunaa ole alɛ buabala ayududusaa ya mmle nwu? 11 Leyo le mmle nwu, di Leyooto nii ntika ni ntookple bayu kawofakɔ diɛta ye? Kafɔɔ ami yi, ntoonyu ye! SAATE nwu niebuɛ.

12 " ‘Kanunua yi, bitɔɔkyɛ lɛba nwu di Silo, di lɛbale lakasa ni kasiɛkɔ ɔbla ɔta ni Leyooto nii, biɛlaanyu lɛsaa le labla ni leyo nwu ta batii nii Israel akpilesaa ɔbla oso. 13 SAATE nwu niebuɛ alɛ, di obe wɔ biatɔɔbla ni asaa ya mmle amuu yi, lanwini lakakatɛ lata ye, kafɔɔ bitakyɔɔ atoko; lalɛɛ ye kafɔɔ bitatuna. 14 Nkpo oso, lɛsaa le labla ni Silo yi, nfɛ kamayɔ ni mbla leyo le di Leyooto nii ntika nii, olekatakɔ ka biatika ni disi, lɛbale layɔ lata ye ni ku bate lee. 15 Kamatukusa ye nkyisa di anu nii, fɛ mmle okle labla ni babilee-suɔtɔbi bamuu, Efraim batii nwu.’

16 "Nkpo oso tampɛ ɔlaa di batii ba mmle disi ee faatikiti lekoto ee faabuɛ ɔlaa fata ma; tantikiti mi lekoto, diekye nɔmakyɔɔ fɔ atoko. 17 Flɔɔnya lɛsaa le bɔɔbla ni di Yuda sekpoo nwu kamɛ ku Yerusalem akpaka amuu kamɛ? 18 Babi mbudi ntɔɔni, babibate nkutaa ɔtɔ, basanko kafɔɔ nnwɔtɔ nnaafũ mampɛ bloblo akudi manta Osi Ɔkasanko. Mankpete nta kasɔ manta bayaa bamba man-yɔ mankpee mi ɔblɔ. 19 Kafɔɔ, ami bookpee ɔblɔ? SAATE nwu niebuɛ. Diele suoto lɛma bɔɔbla, mankpee mma bamu sinunsɔ?

20 " ‘Nkpo oso, nnya ɔlaa wɔ di SAATE Kplɛ nwu kobuɛ ni alɛ: Kamanyɛɛnɛ ɔblɔ nii ku lɛblɔfiɛ yakayaka nii nkpete di lɛba le mmle suoto, di batii ku lepoo kamɛ babɔkɛɛ, awoso ya di afe ku alesaa di kasɔ suoto, kubafiɛ kunɔbanii ni kafɔɔ.

21 " ‘Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: Binwini, biɛyɔ ofiɛ asaaɔta lee nwu bikyakaa di seleɔta lee bamba nwu biewee sina nwu aye bamu! 22 Diekye obe wɔ lakpaa bawa lee ladieko ni di Egipte lakakatɛ lata ma ni yi, ntata ma afiofa di ofiɛ asaaɔta ku seleɔta lete suoto. 23 Kafɔɔ lata ma kufiofa ko mmle nlɛ: Bikyɔɔ mi atoko, ni kamale Yaa lee aye kafɔɔ bibale batii nii. Bikyɛ di sisuku se simuu lɛtɔkɔ ye ni, alɛ dialɛ ninta ye. 24 Kafɔɔ batanu ee bakyɔɔ atoko; kafɔɔ yi, baatikanko situ lɛma onunsie asaakpile nwu. Baakyɛ sɛmaasɛmaa batafe sitũ. 25 Diayɔ ni di obe wɔ di bawa lee ladie ni di Egipte diɛbadu ni nunua, nkyesee nkple nkyesee ye bakpɛmblatɛ nii ɔlaababuɛtɛtɛ dii biala. 26 Kafɔɔ batanu ee bakyɔɔ mi atoko. Baawɛ otokopĩ ni baale sikpile baalenkee bawa lɛma baakyakaa nɛ.’

27 "Nse fɛɛtɔkɔ ma sɛlaa se mmle simuu yi, blɔbakyɔɔ fɔ atoko; nse fɛɛlɛɛ ma, blɔbatuna. 28 Nkpo oso tɔkɔ ma falɛ, ‘Nnya kale ka nitakyɔɔ ni SAATE Yaa nɔɔ atoko ee bafũ lelolaa nɔɔ bakpee ni. Onukwale ntɔwɔɔ; kutɔɔyɛ di anyasibi lɛma.

29 Binwiɛ sinwini lee biɛfuki sĩ biwii; bisa okunu di akpenkpe nwu fukiti osi, diekye SAATE nwu ntosĩ kɔna ko mmle ninsi ni di lɛblɔfiɛ yakayaka nɔɔ le mmle kalɔ.

30 " ‘Yuda batii nwu ntɔɔbla dikpilesaa di anu nii, SAATE nwu niebuɛ alɛ. Bɛɛyɔ aafiɔtii ayududusaa lɛma nwu bɛɛtɛ di leyo le di Leyooto nii ntika ni kamɛ, ni bɛɛkpɔnɔfɔsa ni nɛ. 31 Baapɛ Tofet oleɔta akyikye di Ben-Hinom Ɔtaata kamɛ alɛ baafiɛ babisuɔtɔbi ku babisankobi lɛma di ɔtɔ nwu kamɛ- lɛsaa le nitabuɛ nii, ee diwa mi ni diisi. 32 Nioso bilolaabinyu, ayi nwu nfɛ kɔwa, di batii dilɔbasinlɛɛ nwu ni Tofet ee Ben-Hinom Ɔtaata. Kafɔɔ babalɛɛ nwu Batii Olo Ɔtaata, diekye babakookaa bakpi di Tofet ninaadu obe wɔ di lɛba kuninwii nsinaa nii, SAATE nwu niebuɛ. 33 N-se batii ba mmle bakpi ntookple alesaa ɛɛta bakansiɛ di kɔfɛɛfɔ ku babɔkɛɛ di lepoo kamɛ di kasɔ suoto, di otii kuonwii kafɔɔ dilɔbawɛ abayɛkɛsa ma antososa nii. 34 Kamata kase n-wa di suoto lɛyɔɔ ɔnya ku lɛpɔ̀ kudu suoto, di ɔkafɔɔ ku ɔkafɔɔsa sɛlɔ kanya di Yuda sekpoo kamɛ ku Yerusalem akpaka, diekye kasɔ nwu kamate kafukiti.