Êxodo 7

1 Ninfɛ di SAATE nwu latɔkɔ Mose alɛ, "Nyu, ntɔɔbla fɔ fɛ Yaa di Farao suoto, obilee suɔtɔbi Aron kafɔɔ kamale fɔ ɔlaa buɛtɛtɛ. 2 Tɔkɔ obilee Aron lɛsaa biala le lɛtɔkɔ fɔ ni, ni obilee Aron nfɛ nimatɔkɔ Farao alɛ ata Israel batii badie di kale nɔɔ basifi. 3 Kafɔɔ kamawɛnsa Farao otu osie, alɛ kabla atuosaa ku sɛkpɛ se niɛbla ni ɔkpɛ kpinwu di Egipte kasɔ suoto. 4 Kafɔɔ Farao dilabanu ye ɔlaa. Nfa nfɛ kamatika kɔnɛɛ nii di Egipte suoto, ndiki Israel batii nii nfaabi, nfaabi nwu nkyeko Egipte kasɔ suoto ku lɛkanko kplɛ sɛkpɛ ɔbla nɛ. 5 Ni di Egipte batii kamatofo alɛ ami ninle SAATE nwu nɛ, nse lɛnanfi kɔnɛɛ nii di Egipte batii suoto, lɛkpaa Israel batii ledieko ninwu kamɛ nɛ."

6 Nioso Mose ku Aron labla fɛ mmle okle di SAATE nwu lakpee ma ni kufiofa. 7 Mose lafũ alɛɛ afosi anɛ, Aron kafɔɔ lafũ alɛɛ afosi anɛ alɛɛ atiɛ di obe wɔ baakakatɛko ni Farao.

Aron Ɔkyɛnwoso Lakple Kɔsaanwu

8 SAATE nwu latɔkɔ Mose ku Aron alɛ, 9 "Nse Farao lɛtɔkɔ ye alɛ, ‘Bibla lɛsaa le niɛbla ni ɔkpɛ’ yi, ni faatɔkɔ Aron falɛ, ‘Yɔ ɔkyɛnwoso lɛfɔ fatɛ di Farao anu,’ kubakple kɔsaanwu."

10 Nkpo oso Mose ku Aron lakyɛ Farao nfũ baalaabla fɛ mmle okle di SAATE nwu lakpee ma ni kufiofa. Aron layɔ ɔkyɛnwoso nɔɔ aatɛ di Farao ku banɔɔfotii nɔɔ anu, ni kuakple kɔsaanwu nɛ. 11 Farao kafɔɔ lalɛɛ banumbentɛ nɔɔ ku babɔmpɛtɛ ku Egipte bafablatɛ kafɔɔ baababla nnya nkpo okle di lewofa lɛma kamɛ sɛsaabla: 12 Obiala lɛma layɔ ɔkyɛnwoso nɔɔ aatɛ, ni kuakple kɔsaanwu nɛ. Kafɔɔ Aron ɔkyɛnwoso lamufũ sɛkyɛnwoso lɛma nwu aamɛ. 13 Kafɔɔ Farao otu lakple kuawɛ osie, atanu ma ɔlaa fɛ mmle okle di SAATE nwu labuɛ nii.

Dibuo Kasale: Ntu Lakple Ntɔ

14 Ninfɛ di SAATE nwu latɔkɔ Mose alɛ, "Farao otu ntɔɔwɛ osie, eesĩ alɛ ɔlɔɔta batii nwu basifi. 15 Tɔɔkyɛ Farao nfũ ku olesɛ di obe wɔ andie ankyɛ ni okle nwu katũ. Laayila di Nile okle nwu katũ fasoko nwɔ, faayɔ ɔkyɛnwoso lɛfɔ nwu niakple ni kɔsaanwu faklee kɔɔnɛɛ. 16 Faatɔkɔ nwɔ falɛ, ‘SAATE nwu, Hebri batii Yaa, niekpee mi alɛ matɔkɔfɔ alɛ: Ta batii nii basifi, alɛ baalaasumu mi di ɔfaafuu. Kafɔɔ diɛbase bianua fadinu. 17 Nnya ɔlaa wɔ di SAATE nwu kobuɛ ni: Di nle mmle ɔbla kamɛ fabatofo falɛ ami ninle SAATE nwu. Kamayɔ ɔkyɛnwoso wɔ nkle ni kɔɔnɛɛ nii mpɛ di Nile okle ntu suoto, nse ditookple ntɔ. 18 Kɔkpaku ko ninsi ni di Nile kamɛ kamakpi, okle nwu kamakpete, Egipte batii dilabafuo ntu nwu nkpo onyi.’"

19 Ninfɛ di SAATE nwu latɔkɔ Mose alɛ, "Tɔkɔ Aron falɛ, ‘Yɔ ɔkyɛnwoso lɛfɔ faklee kɔɔnɛɛ faayɔ fakyɔɔ di Egipte batii ntu mmuu suoto, di seklenyii di situkplo, di apanta ku asaa ya amuu kamɛ mankyɔɔ ntu manse ni,’ ni abakple ntɔ. Ntɔ kamawɛ di Egipte kakɔ biala, bia kowoso ntu adusaa ku afuɔ ntu adusaa kamɛ."

20 Ninfɛ di Mose ku Aron labla fɛ mmle okle di SAATE nwu lakpee ma ni kufiofa nɛ. Aatakatɛsa ɔkyɛnwoso nɔɔ katoo di Farao ku banɔɔfotii nɔɔ anu, ni aayɔ aapɛ di Nile okle ntu, ninfɛ di ntu nwu mmuu lakple ntɔ nɛ. 21 Kɔkpaku di Nile kamɛ lakpi, okle nwu kafɔɔ latokpete osie kanya alɛ Egipte batii ditafuo ntu nwu nkpo onyi. Ntɔ lawɛ di Egipte kakɔ biala.

22 Egipte batii bafablatɛ kafɔɔ labla nnya nkpo okle di lewofa sɛsaabla lɛma kamɛ, kafɔɔ Farao otu lakple kuawɛ osie; atanu Mose ku Aron ɔlaa fɛ mmle okle di SAATE nwu labuɛ nii. 23 Kafɔɔ Farao lakple aasifi leyo nɔɔ ditakpanko nwɔ di otu saa. 24 Nioso Egipte batii bamuu lakutu abiɔ di Nile okle kotoko baatoomiɛ ntu nyinle, diekye batafuo okle nwu kamɛ ntu otoonyi.

Dibuo Nyɔɔfa: Basua Lafũ Egipte Kasɔ Kamuu

25 Ayi akuɛnsĩ labafe di obe wɔ di SAATE nwu lata Nile okle kamɛ ntu lakple ni ntɔ.