Gênesis 39

Yosef Ku Potifar Ɔsɔfɔ

1 Ninfɛ baakpaa Yosef baasifiko Egipte nɛ. Ni di Potifar wɔ ninle ni Egipte otii, aale ni ɔnɔɔfotii onwii, di mba ninyila mantoonyu ni Farao tunletɛ laya Yosef di Ismael batii ɔkyɛ nɛ.

2 Saate nwu lasiɛkoYosef, asaa lalɛ nwɔ ɔkyɛ, ni aasiɛ di saate nɔɔ Egipte otii nwu leyo nɛ. 3 Obe wɔ di saate nɔɔ lanya alɛ Saate nwu nsiko nwɔ ni, di Saate nwu lata alɛ lɛsaa biala aatɔɔbla ni latɔɔlɛ nwɔ ni ɔkyɛ yi, 4 ni di Yosef labuo saate nɔɔ anu, ni aayɔ nwɔ aabla nnwɔɔ omu nɔɔ kpɛmblatɛ nɛ. Potifar layɔ nwɔ aase di leyo nɔɔ batii kanya, ni aayɔ lɛsaa nɔɔ biala aakpee nwɔ ninnɛɛ kamɛ nɛ. 5 Diayɔ ni di obe wɔ kamɛ aayɔ nwɔ aase ni di leyo nɔɔ batii ku asaa ya amuu niawɛ nwɔ ni kanya, Saate lawii Egipte otii nwu leyo kamɛ batii lɛyɔɔ ta Yosef oso. Saate nwu lɛyɔɔ owii nwu latika di lɛsaa biala niawɛ ni Potifar, di leyo ku kofe. 6 Nioso Potifar layɔ lɛsaa biala niawɛ nwɔ ni aakpee di Yosef nnɛɛ. Atasin-yɔ nwu ole di lɛsalɛsaa kuninwii suoto dilenkee alesaa ya aatoole ni lete.

Yosef nfɛ labawɛ suoto nwaa, aalɛ sekosopo. 7 Di obe owo sɛmaa, Yosef latɛ aatɔɔlɛ saate nɔɔ ɔsɔfɔ onyu, ni aatɔkɔ nwɔ alɛ, <<Wa faabatenkoe!>>

8 Kafɔɔ Yosef lasĩ. Ni aatɔkɔ saate nɔɔ ɔsɔfɔ alɛ, <<Di ami nin-yɛ ni kaanya oso, saate nii diesin-yɔ nwu ole di lɛsalɛsaa kuniwii suoto di leyo le mmle kamɛ; ɛɛyɔ lɛsaa biala ninle nwɔ ni lele eekpee mi ninnɛɛ. 9 Otii kuonwii diɛtaka katoo alenke mi di leyo le mmle kamɛ. Lɛsaa le lete di saate nii diɛyɔ akpee mi ni ninnɛɛ ninle afɔ, diekye ɔsɔfɔ nɔɔ fale. Ni lɛ nfɛ kabla lɛsaa kpile le mmle okle, mbla okpile di Yaa suoto?>> 10 Kuntɛ dii biala aatɔɔtɔkɔ Yosef yi, aasĩ ɔkyɛ ɔlaatenko nwɔ ee bia atasintɔɔtɛɛtɛɛ nwɔ.

11 Dii ninwii Yosef lakyɛ leyo kamɛ alɛ ɔɔlaabla ɔkpɛ nɔɔ, leyo nwu batii bakpɛmblatɛ kuonwii ditawɛ. 12 Ni di ɔsanko nwu lamufũ Yosef di akpeele nɔɔ aatɔkɔ nwɔ alɛ, <<Wa faabatenkoe!>> Kafɔɔ Yosef ladiɛko nwɔ akpeele nɔɔ di ɔsanko nwu nnɛɛ, ni aatoso aadie leeyo nɛ.

13 Obe wɔ aanya alɛ atoodiɛko nwɔ ni akpeele nɔɔ ninnɛɛ, eetoso eedie ni leeyo, 14 ni aalɛɛ leyo nɔɔ bakpɛmblatɛ nɛ. Ni aatɔkɔ ma alɛ, <<Binyu lo! Bɛɛkpaa Hebri osuɔtɔ wɔ mmle bɛɛwako wo alɛ abakpee wo sinunsɔ! Ɛɛwa nfũ alɛ ɔɔbatenkoe, kafɔɔ lɛfafaa. 15 Obe wɔ aanya alɛ kɔfafaa ni osie kanya, ni aadiɛkoe akpeele nɔɔ di nnɛɛ nii, aatoso aadie leeyo nɛ.>>

16 Aayɔ akpeele nɔɔ nwu aatɛ di suoto nɔɔ dialaase di obe wɔ di ɔsa, Yosef saate lawa ni leyo. 17 Ni aayɔ ɔlaa nwu nkpo aatɔkɔ nwɔ alɛ: <<Hebri ɔlanle wɔ faakpaa fawako wo ni lawa ɔkyɛ nii alɛ okpee mi sinunsɔ. 18 Kafɔɔ di obe wɔ lafafaa ni osie kanya, ni aadiɛkoe akpeele nɔɔ di nnɛɛ nii, aatoso aadie leeyo nɛ.>>

19 Obe wɔ di Yosef saate lanu ni ɔlaa wɔ di ɔsɔfɔ latɔkɔ nwɔ ni alɛ, <<Nkpo di ɔlanle lɛfɔ labla mi nɛ,>> ɔblɔ latɛ kuafiɛ nwɔ. 20 Nkpo oso Yosef saate layɔ Yosef aalaatɛ leeyo, di lɛbale mantɛ ni ɔka leyo batentɛ.

Kafɔɔ di Yosef lawɛ ni di leyo katenkɔ, 21 Saate nwu lasiɛko nwɔ; aale nwɔ sifutulɛ, aata alɛ aabuo leyo batentɛ banyuntɛ anu. 22 Nioso leyo batentɛ banyuntɛ layɔ Yosef baase di leyo batentɛ bamuu kanya, baatɔɔ aayila di ɔkpɛ biala baatɔɔbla ni kanya ninfa. 23 Leyo batentɛ banyuntɛ nwu ditasin-yɔ nwu ole di lɛsaalɛsaa suoto di Yosef latoonyu nii, diekye Saate nwu lasiɛko Yosef, nioso lɛsaa biala aatɔɔbla ni lalɛ ɔtɔɔkyɛ.