14 Ësaribi ka naíkamëonu Diosan nëtënu ꞌiti ax ka achúshi unia ꞌura kuankin ꞌain ñu mëëmikë kuënxun aín kurikikama ꞌinankësa ꞌikën.

15 Achúshi pain ka cinco mil ꞌinankëxa, bëtsi ka dos mil ꞌinankëxa, anuxun ka bëtsiribi mil ꞌinankëxa; Achúshi achúshi anun tëtisabi okin ꞌinabiani ka ꞌura kuankëxa.

16 An cinco mil bikë an ka anun tëkin bëtsi cinco milribi biakëxa.

17 Usaribikin ka an dos mil bikë anribi tëkin bëtsi dos milribi biakëxa.

18 ꞌAibi ka an mil bikë an kuanxun aín ꞌibun kuríki me naëxun anu umpukin maiankëxa.

19 Usakian an ka ꞌitsa baritia, ꞌikëbë ka aín ꞌibu nukukin aín ñu mëmike unikamabëtan mënioxa.

20 An kuríki cinco mil bikë ax pain nukukin ka bëtsi cinco milribi bëaxa, bëxun ka aín ꞌapu ꞌinanxa. ꞌInakin ka ësakin kaxa: —ꞌËn ꞌibu min kaina ꞌë cinco mil ꞌinabia ꞌaibi kana cinco milribi kanán, a kënë ꞌikën.

21 Aín ꞌapun ka kaxa: —Asabi ka, mix kamina upiti të́kë uni ꞌain, chukumara mi ꞌinankë anun kamina upiti tëa, usa kupin kamina mi cha ꞌinamainun ꞌëbë kuë́ëni uti ꞌain.

22 Anua ka an dos mil bikë anribi ukin kaxa: —ꞌËn ꞌibu min kamina dos mil kuríki ꞌë ꞌinan, ꞌaibi kana dos milribi kanan, a kënë ꞌikë.

23 Aín ꞌapun ka kaxa: —Asabi ka, mix kamina upiti tëkë uni ꞌain, chukumara mi ꞌinankë anun kamina upiti të́a, usa kupin kamina mi cha ꞌinamainun ꞌëbë kuë́ëni uti ꞌain.

24 ꞌAibi ka an mil kuríki bikë an aín ꞌibu kaxa: —ꞌËn ꞌibu ꞌën kana ꞌunánkë ꞌia mix kamina achúshi uni ñunuanankë ira ꞌain, usa ꞌain kamina anu min ꞌapakëma anuabi bitsin.

25 A kupin kana rakuëkin min kuríki menu umpukin maiian, akënë ꞌikë kamina biti ꞌain.

26 Aín ꞌapun ka kaxa: —Mix kamina uni ꞌaisama chikish ꞌain min kamina ꞌunánkë ꞌian, ꞌën kana uinu karana ꞌapakëma ꞌai anuabi bianan anu sakakëma anua bitsin.

27 Ën kuríki banconu nantibi kaina ꞌia, ꞌën utëkënki an kanankë kuríki a ëora cha biti kupiꞌ.

28 Usa ꞌain ka ꞌapun kakëxa: —Mil kuríki a kamina bikuantankëxun, an diez mil bikë a ꞌinanti ꞌain.

29 An ñu ëora ꞌakë ka cha ꞌinanti ꞌikën, ꞌinankëx ka chaíira ñuñu ꞌiti ꞌikën; ꞌaibi ka ax ñuñuma, a chamarasuñu ꞌikëbi bikuanti ꞌikën.

30 An ñu mëti ꞌunama uni, ëman ka pikú, bakish anua mi, inkin nuibakakin xëta ñërëxkai bënëtinu.