Gênesis 6

Wihe wa Munhu

1 Wanhu lowaluche konjezeka muisi na kuwa na wahinza, 2 wahilisi wa Nguluwi*6:2 wahilisi Kwa Chiebulaniya chilonga kota nawali wana wasongolo wa Nguluwi, vilumbigwe kulawa kilangu. nawawona awo wahinza wa wanhu ndo wenolije ng’hatu, wawahola wala wawaganile na kuwa wadala wawo. 3 Aho Mkulu Nguluwi nakalonga, "Muhe wa heni hauchikala mgati mwa munhu mazuwa gose, kwa vila heye ndo wa kubagama hela. Lelo hochikala lukami mzidi wa miyaka miya imwe na makumi meli." 4 Kuli mhela awo nakwali na minhu muisi jiwele ndo lulelo lwa wahilisi wa Nguluwi na wahinza wa wanhu. Awo ndo wanhu wawele nawali na mong’ho na walingutogoligwa aho katali, nawachemigwa Wanefili.

5 Mkulu Nguluwi loyauwene winji wa wihe wa wanhu muisi na kota chila choyajesile mnhumbula mwa heye mhela weng’ha ndo wihe hela, 6 ahyo nakawa na masinzo ng’hatu kwa kumlumba. Mkulu Nguluwi nayali yong’ung’uta ng’hatu mnhumbula mwa heye, 7 ahyo Mkulu Nguluwi nakalonga, "Ndomwajiliza munhu yondimlumbile. Kahi ndokwajiliza migongolo na vilumbigwe vilingutambala na videje. Ndina masinzo ng’hatu kwa vila nandivilumba." 8 Ila Mkulu Nguluwi nakanojezwa na Nuhu.

Nuhu

9 Ayi ndo mbuli ya Nuhu, yawele heye yaliyeka nayali yalihela nongwa na yalingumkunda Nguluwi kuli mhela wa heye weng’ha wa kikala kwa heye. Ahyo Nuhu na Nguluwi nawegana.