Lucas 9

Yesu wudikila mafunda matanu ma babakala

10 Bantumwa bu bavutuka, bayadila Yesu mimvimba mi bahidika. Mboki Yesu wubanata, wuyenda nawu ha kibuka kilembolo ba bantu, ku ndambusu yi mbanza yi Betesayida. 11 Mpumbu zi bantu bu zi bakula ni zi mulanda. Wubatambula na wubazonzila misamu mitadidi Kimfumu ki Nzambi. Wunyakisa yobobo baba na nsatu yi lunyakusu. 12 Bwisi bu butoona mu yila, zintumwa kumi na zole ziyiza muteela ti: «Vutula mpumbu zi bantu mwanki benda basosa ku balenda bwila tolo na baka bye dya mu mabwala na mwa zinzo zi mimvungi, mu dyambu ti huma ha tudi ha na kima ko.» 13 Kansi wubateela ti: «Bahaaneeno yeno bende bindya!» Bamuvutudila ti: «Mampa matanu na mbizi zole kwandi zi neto, kadi buna ti twenda yeto bende tu sumbila bantu bamvimba be baba bindya.» 14 Baba mafunda matanu ma babakala. Yesu wuteela ku milongoki myandi ti: «Bazakiseno mu makabu makumatanu matanu.» 15 Ni basadila bo. Babazakisa bamvimba. 16 Wubonga mampa ma matanu na mbizi zole, wusendola meso ku yulu ni kasakumuna byo. Bu kamana bye bukuna ni kahaana byo ku milongoki myandi mwanki bakabula ku mpumbu yi bantu. 17 Bamvimba badya na bayukuta. Ku manima, baludisa mikuta kumi na myole mu bibuku bisadila.