Mateus 11

Johanes siene Jinja komen no Jesus

1 Un daut passieed, aus Jesus dän Befäl aun siene twalw Jinja verecht haud, jinkj Hee wieda, om en äare Städa to lieren un to prädjen. 2 Aus Johanes em Jefenkjnis von Christus siene Woakjen hieed, schekjt hee twee von siene Jinja 3 un leet Am sajen: Best Du de Komenda, ooda sell wie no eenem aundren luaren? 4 Un Jesus auntwuad un säd to äant: Got han un vekjindicht Johanes, waut jie hieren un seenen: 5 Blinje woaren seenent, un Lome gonen, Leprakranke woaren rein, un Doofe hieren, Doodes stonen opp, un de Oame woat daut Evangelium vekjindicht. 6 Un seelich es, wäa sikj nich aun Mie oajat.

7 Oba aus dise hanjinjen, funk Jesus aun to de Volkjshäaden to räden von Johanes: Waut jinj jie rut en de Wiltnis to seenen? Een Schelprua, daut vom Wint jeschockelt woat? 8 Ooda waut jinj jie rut to seenen? Eenen Mensch met wieekje Kjleeda jekjleet? Kjikj, dee doa wieekje Kjleeda droagen, sent en de Kjennichs äare Hiesa. 9 Ooda waut jinj jie rut to seenen? Eenen Profeet? Jo, Ekj saj junt, un mea aus een Profeet. 10 Wiels dit es dee, von däm jeschräwen steit: "Kjikj, Ekj schekj mienen Bootschofta ver dien Aunjesecht, dee dienen Wajch ver Die reedmoaken woat." 11 Ekj saj junt woarhauftich: Mank dee, dee von Frues jebuaren sent, es kjeena oppjekomen, dee jrata es aus Johanes de Deepa; oba doch, de Kjlansta em Himmelrikj es jrata aus hee. 12 Oba von Johanes dän Deepa siene Doag aun bat nu deit daut Himmelrikj Jewault lieden, un dee doa Jewault eewen, rieten daut aun sikj. 13 Wiels aul de Profeeten un daut Jesaz haben bat opp Johanes jeprofezeit. 14 Un wan jie daut aunnämen wellen: Hee es de Elia, dee doa komen saul. 15 Wäa Uaren haft toom hieren, däm lot hieren.

16 Oba met waut saul Ekj dise Jennerazion vejlikjen? Dee es soo aus Kjinja, dee bie de Moakjt-Plaza setten un roopen no äare Poatna 17 un sajen: Wie haben junt de Fleet jespält, un jie daunzten nich; wie haben to junt jekloacht, un jie hielden nich. 18 Wiels Johanes kjeem un eet nich un drunk nich, un see sajen: Hee haft eenen Diewel. 19 De Menschensän es jekomen, un at un drinkjt, un see sajen: Kjikj, waut es de Mensch fa een Fräta un Wien-Drinkja, een Frint aun Taks-Kollakjta un Sinda! Un de Weisheit es jerajchtfoadicht von äare Kjinja.

Jesus siene Strof-Räd äwa dree Städa

20 Dan funk Hee aun, de Städa to schellen, wua de mieeschte von siene Wundawoakjen passieet wieren, wiels see nich Busse deeden: 21 Wee die, Chorazin! Wee die, Betsaida! Wiels wan en Tierus un Sidon de Wundawoakjen passieet wieren, dee bie junt passieet sent, dee hauden aul lenjst en Sakj un en Ausch Busse jedonen. 22 Oba Ekj saj junt, daut woat Tierus un Sidon leichta gonen aum Jerechts-Dach aus junt. 23 Un du, Kapernaum, dee du bat aum Himmel erhowen best, du woascht bat en de Hal raufjestat woaren. Wiels wan en Sodom de Wundawoakjen passieet wieren, dee bie die passieet sent, daut stunt noch vondoag dän Dach. 24 Oba Ekj saj junt: Daut woat daut Launt Sodom leichta sennen aum Jerechts-Dach aus die.

25 To deeselwje Tiet auntwuad Jesus un säd: Ekj preis Die, Voda, Har äwa Himmel un Ieed, daut Du dit fa de Weise un Kluake jeheem jehoolen hast un hast de Onmindje daut openboat. 26 Jo, Voda, wiels soo wia daut een Wooljefaulen ver Die. 27 Aules es Mie von mienem Voda äwajäft worden; un kjeena erkjant dän Sän, aus mau de Voda; un kjeena erkjant dän Voda, aus mau de Sän un wäm de Sän daut openboaren well.

28 Komt häa no Mie aula, dee jie mieejvoll un belot sent, un Ekj well junt Ru jäwen. 29 Nämt mien Joch opp junt un lieet von Mie; wiels Ekj sie saunftmootich un von Hoaten deemootich; un jie woaren Ru finjen fa june Seelen. 30 Wiels mien Joch es saunft, un miene Laust es leicht.