9 Un aus see dän Kjennich jehieet hauden, jinjen see han, un kjikj, daut Stiern, waut see em Oosten jeseenen hauden, jinkj ver äant, bat daut kjeem un äwa däm Plauz stell stunt, wua daut Kjint wia. 10 Aus see daut Stiern sagen, freiden see sikj met sea groote Freid. 11 Un aus see en daut Hus nenjekomen wieren, sagen see daut Kjint met siene Mutta Maria. Un see follen dol un bäden Am aun un muaken äare Schaza op un jeewen Am Jeschenkja: Golt, Weiruak un Mirren. 12 Un wiels see em Droom wieren aunjewäsen worden, nich wada no Herodes trigj to gonen, jinjen see opp eenen aundren Wajch trigj en äa Launt.