Mateus 26

Yessuussi’n Assemeeka Diina

1 Yessuusi tennee yaane duuchcha haaso’e bireechchi uduma ifixxe hordofeeyye’n 2 «Lame barranni uduma sa’aatike ayyaanixxe barra kaddeexxa egendine’een; Manjiink Belti fannisemo’a sa’isseme uwwemaan» hiyye.✝26:2 Fula. 12:1-27.

3 Ookkoneechchi uduma qeesetik sooreessuwwinna ardiinxi geedhe umo qeesichcho kadeeke Qeyyaafa hiyyemmaake manjichchixxe baxxe’n bukki hineexxi, 4 Yessuusii’i malik abindeexxi shiyatee mari’ante. 5 «Yaane kinni insa’ne, Ardi lele’mabaashsha ayyaaniinxe barra kaddoqqe’e» hine.

(Mar. 14:3-9, Yoh. 12:1-8)

6 Yessuusi Biitaaniya, ookkonee soomi abideeke Simi’oonike mine’n hedhee’naa 7 mitte manjichcho hiri hara fiixxeexxa, albasixiroosixxe bilqaaxxe’n shitto aaxxe Yessuusibaa shiqqeexxi, Yessuusi itate’n hedhee’naa umo Yesuusik hana dunde.*26:7 Albasixirosi Ulfink miyi hujemaake golaloke kinjon.

8 Hordofeeyyetinna tennee manjichcho assiteexxa yaane uudde mufatteexxi hittee qici, «Tinni faango’a mayeete? 9 Tinni shitto lumoke hira’n gurgurende’naa maalaqi iikki hiyyeeyyetee uwwemaa dande’amman.»

10 Yessuusinna tennee ege’neexxi insa’ne’n hiyyee qici, «Tennee manjichcho maaye rakkissina? Ise dancha yaane ani’a assite’een. 11 Hiyyeeyye duuchchii wodda ha’noonni hexxaan, ani kinni duuchchii wodda ha’noonni hedhabe’non.✝26:11 Lew. 15:11. 12 Ise tennee shitto anke biso’ni duna anee mooggokee qixxeessateeten. 13 Dhugaate ha’no’n haaso’aannen, tinni wongeele lallabendaaba, butta duuchcha’n hoone booncho’ninna tinni ise assiteexxi yaane isee qalli assatee’e kulendaan.»

Yihuda Yessuusii Sa’isseexxi Uwwate Weli Aageexxa

14 Ookkoneechchi uduma tommenna lamekenaa’n mitti Asiqorootuke qachchik Yihuda qeesetike sooreessuwwibaa mareexxi, 15 «Yessuusii’i ha’no’aa sa’isse uwwonnole maachcho ani’a uutina?» hiyye insa’ne qore. Insa’nenna sase tomme birret sibljo*26:15 Biretika Sibljo Mittichchinna itti lebemebaaka luqqichcha biretike sbljo hiyyaten. isi’a uune.✝26:15 Zek. 11:12. 16 Eettene yannanaa’n Yihuda Yessuusii’i sa’isse uwwaaxxa eloxxa yanna hase’emman.

Yesuus Sa’atike Ayyaanika Dhiyaana Ifixxe Hordofeeyyenni Welt Iteexxa

17 Kebbotike ayyaanixxe siretixxe barra’n hordofeeyye Yessuusibaa shiqqeexxi isoo, «Ita Sa’atike ayyaanixxa ittottaa haba ati’a qixxeessinonnole eettato?» hite isoo qorte.

18 Isinna, «Qachchi giddo ebeli mine martineexxi iso’n Barachchiisalli, ‹Yanna anixxi gelte’een; hordofeeyye anxenni welti sa’atika ayyaanna atike mine’n ulfeessonaaten hiyya’neen› » hitineexxi kulle hiyye.

19 Hordofeeyyetinna Yessuusi insa’nee ajajemmashshanni assitte; Sa’atike ayyaanixxa itanna qixxeessite.

20 Bogi galgalo’ee wodda Yessuusi tommenna lame hordofeyyenni welti itatee ofo’le. 21 Itate’n he’neenge’n Yessuusi insa’ne’n, «Dhugaate ha’no’n haaso’annen, ha’no giddii’n mitti anee sa’isse uwwaan» hiyye.

22 Insa’nenna lumoo qico yaandeexxi mitti mittingi isoo, «Goottaa ante kadunnuu?» hiyyate’n ke’ne. 23 Yessuusinna insa’ne’n, «Anee sa’isseexxi uwwaak aninni welti itatee anga qore giddo ugge’eeken» hiyye hiisse haaso’e.✝26:23 Far. 41:9. 24 Manjiink Belti isixxee borressendemmashshanni reyaan. Yaane kinni Manjiinka Belto sa’isse uwwaake ookkone manji’a isi’a aannee; iikki manji ilemaa gophe’eele silaati isi’a woyyamman.

25 Sa’isse isoo uwwa’neek Yihuda kinni isoo, «Barachchiisalloo, ante kaddunuu?» hiyye. Yessuusinna «Ati hitetteshshanden» hiyye.

Goottiinka Hirbaata

26 Itande’n he’nee’naa Yessuusi buddeena aadhe galateeffate kukkuteexxi ifixxe hordofeeyye’n, «Hii’we itte; kunni maala anken» hiyye uwwe.

27 Ookkoneechchi udma buudattanna aadheexxi galateeffateechchi uduma insa’nen hiyyee qici, «Ha’no duuchchiing tenne buudanna’ni ha’we. 28 Tinni heddi mannixxe cubboxxee gattowwaali’a dundaaxxe haaroxxe kakoxxe anxe munden.✝26:28 Fula. 24:8; Erm. 31:31-34.