Lucas 7

Yesû wa Muhandia mwingili wamukûlû wabasilêkale Muloma

1 Kyaba Yesû lwabidjile kwêsamba gyonse gya kampilwe bantû kûtegelela, ûgêle Kapelenaumu. 2 Kûko kûbele mukûlû wabasilêkale gûmo kwana ûbele no mwingili wage wabele mukampwe biiko; gûdjo mwingili ûbele mutongi kûbwêhê kûkya. 3 Gûlya mukûlû wabasilêkale lwategelele musahû gwa Yesû, wêbatumine bakote kansangwa bayuda bagye bamulombole ashe amuhandie mwingili wage. 4 Kyaba balya bakote lwabaikile kwê Yesû, bamwisasile biiko amukwashe gûlya mukûlû wabasilêkale, besambile: "Mulongele muntû gûdjû monka nwene kûlombela, muyenene kûlongelwa nasino. 5 Kibalo gee mwigûkampwe musoo gwetû, no ûge wêtuimpêle nsese gya milombelo gya Bayuda."

6 Hûao Yesû ûgêle amo nabo, lwabele kûbwêhê no kuika kû nsese gya gûlya mukûlû wabasilêkale utumine balûnda nage bamulombole Yesû: "Kolo, no kedjembya mbeela, kibalo gwe awêmuyenene kûtwela mu nsese gyane. 7 Ukibalo kyanimwene kwana nsimuyenene kûsha kolê. Mone wêsambe mwanda yaa, no mwingili wane swahande. 8 Kibalo, nene mwine ni muntû wêno bantû beno kitenta kûnêmba, no nino basilêkale kûnsê gyane. Namulombola gûmo: ‘Gyata,’ noge wagyata; namulombola gûnge: ‘Ndjûû,’ noge washaa; nanombola mwingili wane: ‘Longa nansino,’ noge walonga."

9 Kyaba Yesû lwategelele mianda gigyo, wêgalagenie no gûdjo muntû, nfulo wêkyalabûkêle kilya kibûngo kya bantû kibele kya mulonda wêbalombwele: "Shalimone wêno lwêtabêsho lûkata bilûlû no mu Isilaeli!"

10 Nobalya bantû batuminwe kwê Yesû, lwabebwêlêle kû nsese bamutanine gûlya mwingili wawakûwanda mbeela.