1 Aɨʉkolɨ Mʉntʉ ʉng’wɨ witangwa Anania palʉng’wɨ nʉ mʉkɨma wakwe Sapila nɨenso aɨagʉiye mʉgʉnda. 2 Ingɨ Anania wɨkabagʉla nʉkʉpiha mpia ying’wɨ naɨagʉiye mʉngʉnda, kʉnʉ mʉkɨma wakwe waze ʉlɨngile, mpia naɨisagile wɨkatala nʉkʉapa itʉmi. 3 Itɨ gwa, ʉ Petelo wɨkamʉkolya, "Anania, nɨkɨ wamʉgombya ʉ Shetani wingɨla mʉnkolo ako? Wapembya kʉmʉkongela Ng’wahʉ Ng’welʉ, kʉpiha mpia ying’wɨ nʉgʉiye mʉgʉnda? 4 Naza ʉkɨlɨ kʉgʉlya mʉgʉnda nʉanso ingɨ aza wako, napo naza wagʉlya mpia niyanso aza yako aza ʉhumile kʉitendela mʉloewe. Nɨkɨgwa, nkolo ako alamʉla ibɨ kʉtenda ikani ɨlɨ? Shanga ʉmʉkʉkongee anga mʉntʉ, ingɨ ʉmʉkongee Itunda." 5 Anania naɨwija nkani ɨlɨ, wɨkagwa pihɨ wɨkasha. Antʉ ɨhi naɨ igule ikani ɨlɨ ɨkogopa nangaluu. 6 Sʉnga ahʉmba ɨkaʉka nʉ kʉʉimba sanda mʉimba wakwe, ɨkamʉpumya kʉnzi ɨkʉmʉtuhɨɨla mʉkɨbɨɨla.

7 Naɨakɨla masaa ataatʉ itɨ, mʉkɨma wang’wa Anania wɨkaze shanga aɨʉlɨngile nɨlɨpumɨe, wakingɨla mʉnyʉmba. 8 Petelo wɨkamʉkolya, "Ntambʉɨle! Ɨtɨɨ, taine zizidu mpia naza mʉgʉiye mʉgʉnda wanyu?" Mʉsʉngʉ wang’wa Anania wɨkamʉsʉkɨɨlya, "Ee, zizo ʉdu."

9 Papo Petelo wɨkamʉɨla, "Yatulaʉlɨ ʉewe nʉ mʉgohako migombya kʉmʉgema Ng’wahʉ Ng’welʉ wangwɨ Isekʉlʉ? Tegeelya ahʉmba awo naza endile mʉtuhɨɨla ʉmʉgohako, itungo ɨlɨ akolɨ pamʉlango akʉʉhola nʉewe ga." 10 Papo paapo, Sapila wɨkagwa pa mɨgʉlʉ ang’wa Petelo wɨkasha. Ahʉmba nɨanso naɨingɨla ɨkaona wakondaa kʉsha, ɨkamʉpumya kʉnzi, ɨkamʉtuhɨɨla mʉ kɨbɨɨla pakupɨ nʉ mʉgoha wakwe. 11 Milʉndo nʉ ahʉɨɨli ang’wa Yesʉ ang’wa Kilisito nɨ antʉ naɨ ija makani nikani nɨlanso ɨkaambwa woa ʉkʉlʉ.

12 Itʉmi ɨkatenda ilɨngasɨɨlyo nɨ mɨʉkʉɨlwa ɨdʉ mʉantʉ. Ahʉɨɨli ang’wa Yesʉ Kilisito aɨɨtankania nkʉa ɨdʉ pa Nyʉmba ang’wi Itunda nkɨka nitangwa "Kɨanda kang’wa Solomoni." 13 Kʉtilɨ mʉntʉ wɨhi naɨ wakɨlɨ kʉmʉhʉɨɨla ʉ Yesʉ naɨʉgemile kʉkamantana nɨenso, aɨɨatetemba. 14 Antʉ nɨangɨɨza ɨkongeeleka kʉmʉhuɨɨla Isekʉlʉ Yesʉ, itʉnja kʉ asʉngʉ. 15 Makani naɨ atendilwe nɨitʉmi aɨiaatendile ɨantʉ ɨkatula atala alwae mʉ mapanda nʉkʉalambaalya mʉ ʉlɨlɨ niipalatʉ ingɨ Petelo nʉ kʉkɨɨla mʉlimilimi wakwe ʉaluɨɨlye nɨang’wɨao akomigwe. 16 Antʉ ɨdʉ kʉpumɨɨla mʉisalɨ nɨyampelo mpelo a Yelusalemu ɨkatula aleta alwaeao nawoga naɨ akete ɨahɨng’wɨ, ɨhi ɨkakomya.

17 Sʉnga, mʉpolyi nʉ mʉkʉlʉ nɨaʉya naɨ idale nɨa Asadukayo naɨ apang’wanso, ɨkatula aonela wɨlu itʉmi. 18 Itɨ gwa, ɨkaamba itumi, ɨkaatunga mʉkadulumu. 19 Ingɨ ʉtikʉ Malaɨka wang’wi Isekʉlʉ wɨkalʉgʉla ɨmɨlango akadulumu, wɨkaapumya kʉnzi, wɨkaaɨla, 20 "Longoli mimɨke pa Nyʉmba ang’wi Itunda mʉatambʉɨle ɨantʉ makani ɨhi a likalo ʉlʉ nʉla kʉkamantana nʉ Yesʉ." 21 Itʉmi ɨkija, daʉ maniambwa ɨkingɨla pa Nyʉmba ang’wi Itunda, ɨkandya kʉmanyisa.

Nai wingɨla ʉ mʉpolyi nʉ mʉkʉlʉ niaʉya, akaitanga palʉng’wɨ ianza nila anyampala niakʉlʉ nɨ anyampala a Aisilaeli, papo gwa ɨkaalagɨɨlya antʉ aalete iitʉmi kʉpuma mʉkadulumu. 22 Antʉ awa naɨ alagɨigwe naɨapika mʉkadulumu shanga ɨkaahanga ɨitʉmi. Ʉʉgwa ɨtatulya, ɨkapisha mpola izi kʉ anyampala ianza, 23 azelʉnga, "Kʉpikile pa kadulumu kahanga ɨmɨlango ɨlugaɨwe amboi akʉsʉnja pa milango. Nɨkalʉgʉla milango ʉdu kingɨla mʉ nyʉmba shanga kʉhangɨle anga mʉntʉ wɨhi." 24 Mʉkʉlʉ nʉwa amboi a Nyʉmba ang’wi Itunda nɨ apolyi nɨ akʉlʉ nazaigulye ʉdu impola izi ɨkingɨilwa nʉ woa, ɨkahita kʉlinga nɨkɨahangɨle. 25 Mʉntʉ ʉng’wi ɨkapika, wɨkaatambʉila, "Antʉ awo naza mʉalugaie mʉkadulumu, itungo ɨlɨ akolɨ pa Nyʉmba ang’wi Itunda akʉmanyisa antʉ." 26 Papo gwa mʉkʉlʉ nʉa amboi akadulumu palʉng’wi ni antʉ akwe wɨkalongola pa Nyʉmba ang’wi Itunda, akaaleta. Ingɨ shanga ɨkaamba kʉ ngulu kʉnsoko aɨogopile kɨna akʉkʉwa magwe nɨ antʉ.

27 Itɨ gwa, ɨkaatala ɨ itumi nʉkʉimɨsha ntongeela ianza. Mʉpolyi nʉ mʉkʉlʉ wɨkaakolya. 28 "Aza kʉmʉhitɨɨye kʉmanyisa kʉlina lang’wa Yesʉ, itugo ɨlɨ ihɨɨ ihi na Yelusalemu enela ʉmanyisi wanyu nʉa lina lang’wa Yesʉ hangɨ mʉkʉhiya kʉʉkinyila kʉ antʉ kɨna sese kʉsakilye ɨnsha ang’wa Yesʉ." 29 Papo ʉ Petelo, aze wipalʉng’wi ni itʉmi aʉya, wɨkasʉkiilya, "Itakɨwe kʉmʉkele Itunda, kʉkɨla ana a atʉ. 30 Itunda nʉwa agʉkʉ itʉ aiʉmiʉkilye ʉ Yesʉ, ʉyʉ ʉnyenye naɨ mʉmʉbʉlagile nʉkʉmʉkoma mʉ mʉsalaba. 31 Mʉntʉ nʉanso yʉyo Itunda naɨ ʉmʉkʉiye nʉpikɨɨla kʉmʉika ipande lakwe nɨla ʉhumi, wɨkatula mʉtongeeli hangɨ mʉguni, waahʉmye Aisilaeli ile itʉnʉ, ahume kʉlekelwa ɨ milandʉao. 32 Ʉsese kɨ akʉɨɨli ikani nɨlanso, nʉ Ng’wahʉ Ng’welʉ ʉyʉ ni Itunda ʉapee awo nɨamʉkee, nʉyo mʉkʉɨɨli mikani ɨlɨ."

33 Anyampala ɨhi nianza naɨija nkani nɨanso, ɨkahung’wa ikuo nangaluu, ɨkisɨja kʉabʉlaga itʉmi nɨanso. 34 Mʉpalisayo ʉng’wi witangwaa Gamalieli nɨɨza mʉmanyisi nʉa malagɨɨlyo ang’wa Musa naiʉsanigwe niantʉ ihi, wɨkimɨka ntongeela ianza nɨlanso, wɨkalagɨɨlya itʉmi apʉmigwe kʉnzi ki itungo iniino. 35 Sʉnga wɨkaatambʉila anyampala ianza, "Ʉnye Aisilaeli ɨane, hʉgʉki, nɨmʉkili kitʉma ikani ɨlɨ nimʉtakile kʉatendeela ɨantʉ awa! 36 Matungo nakɨile, aiʉpʉmie mʉntʉ ʉng’wi witangwaa Teuda, wɨkazikʉmʉsha kɨna mʉntʉ nʉsanigwe ni antʉ magana annɨ ɨkakʉila palʉng’wi. Ingɨ wɨkabʉlagwa, sʉnga ahemba akwe ɨkabalansana lʉkumo lakwe lɨkaʉla papo. 37 Ni panyambele, itungo nɨla kʉaligwa antʉ, wɨkigela Yʉda mʉnya kʉ Galilaya, nʉyʉ wɨkatongeela antʉ, nʉ ng’wenso ga wɨkabʉlagwa, ahemba akwe ɨhi ɨkabalansana. 38 Nʉnene ga itungo ɨlɨ kʉmʉhʉgʉla temanʉki nɨ antʉ awa, aleki alongole, kʉnsoko anga ize masigo aya ang’wɨ mʉlimo ʉwʉ wandigwe nʉ mʉntʉ, ʉkʉlimansɨɨla ʉwenso. 39 Ingɨ anga ize mʉlɨmo ʉwʉ wadigwe ni Itunda, shanga mʉhumile kʉagilya antʉ awa, ingɨ mʉkʉhanga maina ikʉngʉma ni Itunda." Itɨ gwa anyianza ɨkigombya nʉ ng’wenso. 40 Itɨgwa itʉmi ɨkitangwa ingɨle mianza, ɨkalagɨɨlya akʉwe milanga nʉkʉɨlwa apele kʉmanyisa hangɨ kʉ lina lang’wa Yesʉ, sʉnga ɨkaaleka alaongole. 41 Itɨ gwa, itʉmi awa ikapuma kʉnzi ianza aze iloile, kʉnsoko Itunda aɨʉakʉiye kʉaleka ahumigwe minyala kʉkɨɨla lina lang’wa Yesʉ. 42 Mahikʉ ɨhi ɨkalongoleka kʉmanyisa nʉ kʉtanantya Nkani Nza pa Nyʉmba ang’wi Itunda nʉ mʉnyʉmba niya antʉ kɨna Yesʉ yʉyo Kilisito.