Lucas 1

Kuvumbuka kwa Yesu kosimuligwa

26 Muumwezi wa sita wa inda ya Elizabeti, mtumigwa wa kwa Mulungu katumigwa na Mndewa Mulungu kuita mbaka kae ya Galilaya, zina jake Nazaleti, 27 kwa mhambe yafungile pamvu na munhu imwe zina jake Yusufu wa kae ya Daudi. Zina da ino mhambe iyo Malia. 28 Nayo mtumigwa wa kwa Mulungu keza kumwake kamlamsa kamlongela, "Mndewa ka hamwe na gweye, gweye wing’higwe unovu na Mndewa!"

29 Nayo Malia kagazika ng’hani mmoyo kwa mbuli zino, ndamso ino yavilihi. 30 Baho mtumigwa wa kuulanga kwa Mulungu kamlongela, "Malia sekeudumbe, gweye kupata ng’hekewa ya Mulungu." 31 Kwavija kopata inda na kulela mwana wa chilume na komkema zina jake Yesu. 32 Nayo kokuwa na Undewa, ivija kokemigwa Mwana wa yeli Kuchanha ng’hani. Mndewa Mulungu komwing’ha Ufaume kama Tata yake Daudi, 33 koilongoza ulelo wa Yakobo halibule uhelelo, na ufaume wake wabule uhelelo!"

34 Malia kammwidika mtumigwa wa kuulanga kwa Mulungu kamlongela, "Niye na mhambe, mbuli ino yodahikaze?"

35 Mtumigwa wa kuulanga kwa Mulungu kamwidika, "Muhe wa Mulungu kokwizila, na udaho wake yeli kuchanha ng’hani zokugubika kama sisila, kwa ivo iyo yavumbuke kwa mbuli ya Mulungu kokemigwa Mwana wa Mulungu. 36 Lola, walukolo wako Elizabeti iyo yakemigwe mgumba, sambi kamela mate muuvele wake na uno uwo mwezi wake wa sita. 37 Manake kwa Mulungu habule mbuli ipotigwa."

38 Malia kalonga, "Lola, niye iyo mtumigwa wa Mndewa ivo ikale kumwangu kama vuulongile."