1 Amala Yesu kawalongela waluko wake mfano umwe kalonga, vija viilondeka kumpula Mulungu mazua gose bila kulegela. 2 Amala kalonga, "Muikae imwe hakala na mlamuzi imwe, kakala bila kumfugamila Mulungu hebu kuwagesa wanhu. 3 Muikae iija hakala na muke imwe mgane yakalile yomgendela mlamuzi iyo mala nyingi kuno yompula yolonga, ‘Ngombele mhate chibali cha uhumi kulawa kwa mhasanyi wangu!’ 4 Mmazua mengi mlamuzi iyo halondile kumgombela iyo mgane, mbali mchikomelezo mlamuzi kailongela, ‘Hata kama nie simfugamila Mulungu na siwagesa wanhu, 5 mbali mgane ino konigaza ng’hani, ivo nomgombela ili yapate chibali cha uhumi. Ama kogendelela kwiza kumwangu mala zose mbaka nolegela kabisa!’"

6 Amala Mndewa kalonga, ‘Gatongeni ng’hani gaja gayalongile iyo mlamuzi msede. 7 Ivo, Mulungu hodaha kuwagombela waja yawasagule, womlilila misi na chilo yawataze? Ivo, baho iyo kokawa kuwataza? 8 Nowalongeleni, iyo kolopola kuwagombela wapate chibali cha uhumi. Hataivo, nie Mwanage Munhu niheza nodivika tumanilo muiisi?"