MATAYO 25

Ulamuzi wa zua da uhelelo

31 "Mwana wa Munhu vonda yeze muukulu wake, na watumigwa wa kwa Mulungu wose weli hamwe nayo, baho kokala mchigoda chake cha ulongozi yeli mfaume. 32 Wanhu wa isi zose woiting’hana hamwake, nayo kowabagula wanhu kama vija msusilaji viyobagula bung’hukilalo na mbuzi. 33 Koweka bung’hukilalo ubanzi wake wa kulume na mbuzi ubanzi wake wa kumoso. 34 Amala mfaume kowalongela waja wa ubanzi wake wa kulume, ‘Izoni mweye mwing’higwe ganogile na Tata yangu, bokeleni ufaume utandiligwe kulawa kulumbigwa kwa isi zose. 35 Kwavija nikala na nzala na mweye mning’ha ndia, nikala na ng’ilu na mweye mning’ha mazi, nikala nyambenyambe mmbokela, 36 ng’hala bule chivalo mnivaza, nikala mtamu na mweye mwiza kunilola, nikala mdigeleza na mweye mwiza kunilola.’ 37 Baho waja wanhu wanogile wamwidika mfaume, ‘Mndewa, lini chikuona kuna nzala na cheye chikwing’ha ndia, hebu kukala na ng’ilu na cheye chikwing’ha mazi? 38 Na kaidi lini chikuona uli nyambenyambe na cheye chikubokela, hebu kukala bila chivalo na cheye chikuvaza? 39 Na kaidi lini chikuona kukala mtamu hebu mfungigwa na cheye chiza kukulola?’ 40 Mfaume kowedika, ‘Nowalongeleni kweli, chila chinhu chimumtendele imwe mwa wano ndugu zangu wadodo mnhendela niye.’ 41 "Amala kowalongela waja weli ubanzi wake wa kumoso, ‘Segeleni hamwangu mweye mwinukiligwe! Gendeni muumoto wa mazua gose ulibule uhelelo uja yatandiligwe Mwenembago na vinyamkela wake. 42 Manake nikala na nzala na mweye hamning’ile ndia, nikala la na ng’ilu na mweye hamning’ile mazi. 43 Nikala nyambenyambe na mweye hamnibokele ng’hala mtamu na nifungigwe na mweye hamwizile kunilola.’ 44 Nao baho womwidika, ‘Mndewa, lini chikuona kakala na nzala hebu ng’ilu hebu kukala nyambenyambe hebu bila chivalo, na kukala mtamu hebu mfungigwa, na cheye hachikusang’hanile? 45 Nayo kowedikila, ‘Nowalongeleni kweli, chila vuumlekile kumtendele mbuli zino, imwe mwa wano wadodo, mkala mlema kunhendela niye.’ 46 Ivo, wano woita muulamuzi ulibule uhehelo, mbali waja watogoligwe woita muugima ulibule uhelelo."