Mateus 6

25 "Iyo mana nowalongela seke mdumbe kwambuli ya ndia hebu nying’wa vimlonda ili muwe na ugima, hebu vivalo vimulonda kwa mbuli ya ng’huli zenu. Ivo, ugima ni ndia muhala hebu na vimwenga? Na lukuli vilihi haubita vivalo? 26 Waloleni ndege, wao hawahanda na kugobola hebu wabule gulu jojose. Hata ivo Tata yenu yeli kuulanga kwa Mulungu kowalisa. Ivo, mweye hamfaya ng’hani kwa Mulungu kubita wao? 27 Yelihi mmwenu kwa kuigaza kwake kodaha kuyongezela chimo chake cha ugima? 28 "Habali mogaia vivalo? Loleni malua ga kudikonde vigakula goya, haga sang’hana sang’hano yoyose hebu hagailuka. 29 Mbali nowalongeleni, hata mfaume Selemani na uzenzi wake wose, havalile goya kubita lua dimwe mwa gago gali mdikonde. 30 Ihawa Mulungu kodivaza yani dili mdikonde, dija lelo dabaha, na igolo donyala na dokwasigwa mmoto, ivo mweye hamtendeligwa ganogile kubita ijo yani mweye mli na nhogola ndodo! 31 "Ivo, sekemgae, ‘Choja choni na chong’wa choni hebu chovala choni!’ 32 Kwavija gagaja gowagaiya wamhazi. Na Tata yenu yelikuulanga kovimanya kua molondeka kubokela gago gose. 33 Ivo tanhu zambwileni ufaume wa Mulungu na gaja goyolonda, na gamwenga gose mokongezeligwa. 34 Ivo, sekemuigaiye igolo, kwavija igolo yoigaiya yenyego. Hailondeka kuhanganya madununzo ga chila zua.