Wapinga wa mfalume Selemani
1 Mfalume Selemani tsakawakunda wapinga wengi iwagheni. Tsakamkwela neghe Farao, lekeni pfipfila kawakwela wapinga wa Wamoabu, Waamoni Waedomu, Wasidoni na Wahiti. 2 Iwapinga awano wolawa mna isi atsila IMNDEWA tsayawalongele Waisireli apfino, "Mleke ukukwela kuna wawo wala wawo waleke kukwela kuna mwemwe, kwaapfila wawo watsoitenda imomoyo yenu ihundukile milungu yawo." Lekeni yeye Selemani kananahila ukuwakunda sideke iwapinga awo. 3 Selemani tsakakwela wapinga miya saba, wose awo tsaneghe wafalume, na kakwela pfimada miya ndatu, na iwapinga wake awo waghutenda ghumoyo ghwake ghwaghe. 4 Naye hayalalile, iwapinga wake wamwaghitsa ghendo na ghumoyo ghwake ghuhundukila milungu ingi. Kakala akuno ng’amtoghole baye IMNDEWA, Imulungu ka aba wake Daudi pfayamtoghole. 5 Selemani kamtambikila Ashitoleti mulungu pinga wa Wasidoni, na Milikomu mulungu iyomdesa IMNDEWA iwomtambikila Waamoni. 6 Apfo Selemani kamtendela ghehile IMNDEWA, ng’amtegheletse baye IMNDEWA, ka pfayakalile aba wake Daudi. 7 Kuna ichidunda chili mashariki ya Yerusalemu, Selemani kamtsengela Kemoshi hanu ha ukumtambikila, mulungu iyomdesa IMNDEWA iwomtambikila Wamoabu na, kamtsengela Moleki, mulungu iyodesa iwomtambikila Waamoni. 8 Pfipfila kawatsengela wapinga wake iwagheni, iwadusule ubani na kuitambikilia milungu yawo. 9 IMNDEWA, kamghudubukila Selemani kwaapfila ghumoyo ghwake tsaghumleka IMNDEWA, Imulungu wa Isiraeli, iyamlawile Selemani mala mbili. 10 Na kumlaghitsa yaleke kuitambikila milungu ingi, lekeni yeye ng’ategheletse baye achila chayamlaghitse IMNDEWA. 11 Apfo IMNDEWA kamlongela Selemani, "Kwaapfila ghweghwe kutenda apfo, ng’ukindile baye laghano lyangu wala malaghitso ghangu ghanikulaghitse, lelo nitsokuboka ufalume wako na nomwing’a mtumighwa wako. 12 Kwajili ya aba wako Daudi, sighatenda agha baye mna matsuwa ghako ghaukukala mgima, lekeni nitsouboka mna ghamoko gha iwanagho. 13 Na yeye sitsomboka baye ufalume wose, lekeni nitsomlekela kabila limwe, kwaajili ya Daudi mtumighwa wangu, na kwaajili ya ghumji ghwa Yerusalemu, yanighusaghule."