2 Avaarnọng 1

Ọvaar Ibinọkpaabyi ọkpaar aponga p’Ahaziya

1 K’ogbe kw’ọvaar Ahab ikk’ọpa, anọng p’Moab ake anọng p’Israẹl ẹkọhr.

2 Wa ọvaar Ahaziya kw’Israẹl ọphaar z’ọbaaka kw’ẹsọhmma ch’ẹnyọhng chẹ z’Samariya otto, omuma ekpo. Minna kw’ọtọhmọ azeng-eden pẹ bẹ́, "Màd-ibọbh Bal-Zebub kw’ode ọka f’Ẹkrọn, óde im’mbina m’ekpo mbya py’mmum ma."

3 Okenaka, ozeng-eden kw’Ọvaar Ibinọkpaabyi oben Ẹlaija kw’ofon Tishbe bẹ́, "Zọhng kebha azeng-eden p’Ahaziya kw’ode ọvaarnọng kw’Samariya, abọbh bẹ bẹ́, ‘Ma, machibhẹ bẹ́, Ibinọkpaabyi m’Israẹl kode o, kw’mafon mad-abọbh Baal-Zebub kw’ode ọka f’Ẹkrọn odik o?’ 4 Ofona nya, Ọvaar Ibinọkpaabyi obenẹ bẹ́, ‘Ko Ahaziya ny’ọkọhmaana mvo, màbina. M’apope!’ " Minna kw’Ẹlaija obin ofona, od-osi minna.

5 K’ogbe kw’azeng-eden mbo makpa nnam, ọvaarnọng ọbọbh bẹ bẹ́, "Osempira makpa nnam o?"

6 Mapọhna bẹ́, "Ojinọng wanẹ okwu okebha mina z’eden. Oben mina bẹ́, ‘Màkpa nnam z’ọvaarnọng kw’ọtọhmọ bọnga. Màtek-ẹ bẹ́, "Ọvaar Ibinọkpaabyi obenẹ bẹ́, Ma, machibhẹ bẹ́, Ibinọkpaabyi m’Israẹl kode o, kw’atọhmọ azeng-eden pọ bẹ́, mad-abọbh Baal-Zebub kw’ode ọka f’Ẹkrọn odik o? Ofona nya, Ọvaar Ibinọkpaabyi obenẹ bẹ́, Ny’ọkọhmaana mvo màbina; m’apope!" ’ "

7 Ọvaar Ahaziya ọbọbh bẹ bẹ́, "Bọng-ọnọng kira wọ okebh bọnga z’eden kw’ọgbaak bọnga odik nwa?"

8 Mapọhna bẹ́, "Ọnọng nwo ọfọr owurọ-baba kw’ode iphyabh-iphyabha, obir ọkpaama odikpa kw’etenkpa z’erin."

Ọvaarnọng oben bẹ́, "Ẹlaija kw’ofon Tishbe wọ e!"

9 Minna kw’ọvaarnọng ọtọhmọ oso kw’asoja ọmaana esojakaan chẹ ch’ede anọng arọbh afa okwuma ijobh z’Ẹlaija. Osonọng nwo od-okebha Ẹlaija ch’oning ẹwọr z’ogbeso. Oben-ẹ bẹ́, "Ọgbaak-ettem ch’Ibinọkpaabyi, ọvaarnọng obenẹ bẹ́, ‘Saka m’izek!’ "

10 Ẹlaija ọpọhna osonọng nwo bẹ́, "Ó̱de nde ọgbaak-ettem ch’Ibinọkpaabyi majijik, tte ekpon efona z’ẹrọng, ẹkwọmọ kọ ọmaana ajinọng pọ anọng arọbh afa okwuma ijobh!" Minna kw’ekpon efon z’ẹrọng, ẹkwọmọ osonọng nwo, ọttara ajinọng pẹ anọng arọbh afa okwuma ijobh.

11 Ọvaarnọng obir ọtọhm oso kw’asoja, ọmaana esojakaan chẹ ch’ede anọng arọbh afa okwuma ijobh z’Ẹlaija. Osonọng nwo oben Ẹlaija bẹ́, "Ọgbaak-ettem ch’Ibinọkpaabyi, ọvaarnọng obenẹ bẹ́, ‘Saka m’izek ẹbhar-ẹbhar!’ "

12 Ẹlaija ọpọhna osonọng nwo bẹ́, "Ó̱de nde ọgbaak-ettem ch’Ibinọkpaabyi, tte ekpon efona z’ẹrọng, ẹkwọmọ kọ ọmaana ajinọng pọ anọng arọbh afa okwuma ijobh!" Minna kw’ekpon efon z’ẹrọng, ẹkwọmọ osonọng nwo, ọttara ajinọng pẹ anọng arọbh afa okwuma ijobh.

13 Ọvaarnọng obira ọtọhm oso kw’asoja kw’ottong attaan ọmaana esojakaan chẹ ch’ede anọng arọbh afa okwuma ijobh z’Ẹlaija. Opyirẹ za, ottima ndudungọ ny’Ẹlaija k’ititika, okwuk-ẹ bẹ́, "O ọgbaak-ettem ch’Ibinọkpaabyi, ototo, tte akpen paam, ọmaana akpen p’ajinọng mba anọng arọbh afa okwuma ijobh, p’ade atọhmnọng pọ, mabar-ọ odik! 14 Kk’aza ose kw’ekpon kk’efona z’ẹrọng ẹkwọmọ osonọng kw’echeden ọmaana kw’ottong afa, ọttara nsoja-kaan sabẹ maphyir. Ototo, tte akpen paam abar-ọ odik!"

15 Ozeng-eden kw’Ọvaar Ibinọkpaabyi oben Ẹlaija bẹ́, "Tor-ẹ mafona; oning-ọ ojor." Minna kw’Ẹlaija obin otor bẹ machina z’ọvaarnọng.

16 Ẹlaija oben ọvaarnọng bẹ́, "Ọvaar Ibinọkpaabyi obenẹ bẹ́, Ma, achibhẹ bẹ́, Ibinọkpaabyi m’Israẹl kode o, kw’atọhmọ azeng-eden pọ bẹ́, mad-abọbh Baal-Zebub kw’ode ọka f’Ẹkrọn odik o? Ofona nya, Ọvaar Ibinọkpaabyi obenẹ bẹ́, ny’ọkọhmaana mvo màbina, m’apope."

17 Minna kw’Ahaziya ope, otor k’ọgbaakadik kw’Ọvaar Ibinọkpaabyi ikk’Ẹlaija kw’ode ọgbaak-ettem ch’Ibinọkpaabyi, otima ọgbaak.

Ch’iwa Ahaziya ina ojinọngnwa obhonọ, Joram ọtọka ẹvaar chẹ. Wa ọtọk ẹvaar ndo ny’icho ttong ifa s’Jehoram kw’ode nnwa kw’Jehoshaphat ọbaabh Juda.

18 Idik njoza maphyir s’iwa iyinẹ k’ogbe kw’Ahaziya ọbaabh, ọmaana idik s’osi, makkẹrẹ z’anwẹr p’avaar p’Israẹl.