1 Malikiya wa ku Sheba peayuwini kulumbiwa kwa Solomoni ndava ya nyumba ya kumfugamilila Bambu Chapanga, akamuhambila Solomoni ndava ya kumulinga kwa makotesi ganonopu. 2 Akahika ku Yelusalemu kuni alongosini na vandu vamahele pamonga na ngamiya zezagegili mahuta geginungalila neju na zahabu zamahele neju pamonga na maganga gegiguliswa kwa mashonga gamahele neju. Peakonganiki na Solomoni ndi akamukota makotesi geginonopa gamahele geavii nagu. 3 Na mwene Solomoni akagayangula makotesi goha, kawaka likotesi lealeki kuliyangula. 4 Malikiya wa ku Sheba akangichi neju pealuweni luhala lwa Solomoni pamonga na nyumba ya chinkosi yeayijengili, 5 kangi peaweni chakulya chechiletwi ndava yaki, na vakulu vevavii pahi yaki chevatamili na vahengaji chevihengela na chevawalili na mewa vevigega minyweso yaki na teta za kutinyiswa zila zeaziwusili munyumba ya Bambu Chapanga, akavya lwee na kukangasa neju. 6 Pena akamujovela nkosi Solomoni, "Mambu goha genagayuwini tangia kumulima wangu kuvala mahengu gaku na luhala lwaku, ndi ga chakaka! 7 Nambu nahotwili lepi kugasadika mambu genago mbaka penabwelili na kugalola namwene. Kumbi genajoviwi gahikili lepi hata yapinga gaki, luhala lwaku na vindu vyamahele vyeuvii navyu vivi neju ya genayuwini. 8 Vamotiswi vandu vaku! Mewa vamotiswi vahengaji vaku vevakuhengela lukumbi lwoha muni viyuwanila luhala lwaku lukumbi lwoha! 9 Alumbiwayi Bambu Chapanga, Chapanga waku, mweaganiswi na veve, akakuvika panani ya chigoda cha unkosi cha pa Isilaeli! Muni Bambu Chapanga ayiganili Isilaeli magono goha gangali ni mwisu, akuvikili veve uvyayi wa nkosi ndava ukita gabwina na gachakaka magonogoha."

10 Penapo malikiya wa ku Sheba akamupela nkosi Solomoni zahabu kilo elufu mcheche, mahuta gamahele geginungalila bwina na maganga ga mashonga gamahele. Mahuta gati genago geginungalila bwina katu ahumalili lepi kavili mundu wa kugaleta.

11 Mewa watu za Hilamu zaletili zahabu kuhuma ku Ofili, zaletili mikongo yamahele yeyikemiwa misandali na maganga ga mashonga gamahele. 12 Na mwene nkosi Solomoni ayihengalili mikongo yeniyo ya msandali kwa kutangatila kujenga nyumba ya Bambu Chapanga, na nyumba yaki ya chinkosi, na mewa atenganizili kanjeke na malimba ga vandu veviyimbi. Mikongo yamahele ya misandali ngati yeniyo yawonikini lepi kavili kuletwa na mundu mbaka lelu.

13 Na mwene nkosi Solomoni akamupela malikiya wa ku Sheba kila chindu cheanogili na cheaganili, mewawa amupelili pamonga na vindu vingi vyeaganili kumpela kulandana na mtima waki cheuvili wabwina. Ndi malikiya akawuya kumulima waki pamonga na vahengaji vaki.

14 Kila mwaka nkosi Solomoni apokelayi zahabu kilo elufu ishilini na zivili. 15 Mewawa apokili zahabu kuhuma kwa vandu vevigulisa na kwa vandu vevigulisa chidogo chidogo na kuhuma kwa vankosi voha va ku Alabia na kuhuma kwa vakulu va mikoa ya Isilaeli.

16 Nkosi Solomoni atenganizi hingwamba hivaha miya zivili na kuhinyala zahabu yabwina, na kila chingwamba chavili na zahabu yeyina utopo wa kilo saba. 17 Mewa, atenganizi hingwamba hidebehidebe miya zidatu na kuhinyala zahabu yabwina, na kila chingwamba chavili na zahabu yeyina utopo wa kilo yimonga na yapinga, na penapo nkosi akahivika munyumba yeyikemiwa Nyumba ya Dasi ya Lebanoni.

18 Kangi nkosi atenganizi chigoda kwa kutumila minu ga ndembu, akachinyala zahabu yabwina. 19 Chigoda chenicho chavili na hikwelelu kumi na tisa. Upandi wa kunani watindiswi na chavikiwi pandu pa kuyegemesela mawoko mumihana ya pandi zoha zivili zavili na himong'omong'o ya mahimba gegayimili pandi zoha zivili kuni na kuni. 20 Mewa kwavili na himong'omong'o kumi na hivili ya mahimba hiyimili pandu pa kukwelela pandi zoha, mahimba gavili mukila chikwelelu chimonga upandi uwu na chingi upandi uwu. Chigoda ngati chenicho chitenganizwi lepi muunkosi wowoha mbaka lelu.

21 Vindu vyoha vya kunywilila manji vya nkosi Solomoni vyavili vya zahabu, na vyombo vyoha vyevyavili ku nyumbu ya dasi ya Lebanoni vyavili vya zahabu yabwina, chavili lepi chechatenganizwi kwa madini ga feza muni madini ga feza lukumbi lwenulo galolikini kuvya chindu lepi. 22 Nkosi Solomoni avili na watu zamahele zahamba ku Talishishi zagega vindu, zezalongosini na watu za nkosi Hilamu. Mu kila miyaka hidatu zakiliwukayi mala yimonga na zamugegeleyi zahabu na madini ga feza na mangelu ga ndembu na mayani pamonga na matumbili.

23 Nkosi Solomoni avi na vindu vyamahele na luhala neju ya vankosi voha va pa mulima. 24 Vandu va milima yoha vanogili kumuhambila nkosi Solomoni ndava ya kumuyuwanila luhala lwaki lweapewili na Bambu Chapanga. 25 Vandu voha vamuletili njombi, vindu vya madini ga feza na vya zahabu na nyula na vindu vya ngondo na viungu vyevinungalila bwina na falasi na punda falasi. Njombi zenizo azipokili kila mwaka.

26 Solomoni akusinyi mutuka zezihutwa na falasi elufu yimonga na miya mcheche pamonga na vandu vevigendesa falasi elufu kumi na zivili, vyenivyo vyoha vyavili ku Yelusalemu kweitama nkosi pamonga na miji hingi hila. 27 Uko ku Yelusalemu, nkosi Solomoni akakita madini ga feza gavya chindu cha kawaida, na mbao za mielezi zikavya zamahele ngati mbawu za mikuyu ya ku hitumbi hidebehidebe yehivii ku Yuda. 28 Falasi za Solomoni ndi zaletwili kuhuma ku Misili na kuhuma ku Kue, vagulisaji va chinkosi ndi vavagulili kuhuma ku Kue. 29 Mutuka yimonga ya kuhutwa na falasi ya ku Misili yaguliwi kwa madini ga feza kilo saba, na falasi yimonga yaguliwi kwa madini ga feza kilo zivili. Vagulisaji va nkosi Solomoni vahambili kuvagulisila mutuka na falasi zenizo vankosi va ku milima ya Vahiti na Vasilia.