1 Nkosi Solomoni avaganili neju vadala va chiyehe. Pamonga kuvya amugegili msikana wa Falao nambu avagegili na vadala vangi va kumilima ya Vamoabu na Vaamoni na Vaedomu na Vasidoni na Vahiti, 2 vadala va milima yila Bambu Chapanga avabesili Vaisilaeli na kuvajovela, "Mkotoka kugega kwa venavo na venavo vakotoka kugega kwinu ndava muni vadala venavo yati ving'anamusa mitima yinu muni muhihengela michapanga yavi." Nambu Solomoni avaganili neju vadala venavo. 3 Solomoni akavya na vadala miya saba, vasikana va chinkosi na vadala va kuvala miya zidatu, vadala venavo ndi vakamng'anamusa mtima. 4 Muni peayendelelayi kuvya mugogolo, vadala vaki vakamuyagisa na akaihengela michapanga hingi, na avili lepi mchakaka kwa Bambu Chapanga, Chapanga waki, ngati dadi waki Daudi cheavili mchakaka. 5 Solomoni amfugamili Ashitaloti mweavili chapanga wa chidala wa Vasidoni, na kufugamili Milikomu mweavi yomeso wa Vaamoni. 6 Chenicho ndi Solomoni cheakitili gahakahu palongolo ya Bambu Chapanga, ndava alandili lepi cha uchakaka cheigana Bambu Chapanga ngati dadi waki Daudi cheakitili. 7 Panani ya chitumbi chechivili kuupandi welihumila lilanga wa ku Yelusalemu, Solomoni ajengili pandu pa kumtetela Kemoshi, mweavii yomeso wa Vamoabu, na pandu pa kumtetela Moleki mweavii yomeso wa Vaamoni. 8 Mewawa avajengili vadala vaki voha pandu pa kuhukisila ubani na pa kutetela michapanga yavi.

9 Ndi, Bambu Chapanga, Chapanga wa Isilaeli, akamuyomela Solomoni, ndava muni amulekili Bambu Chapanga, Chapanga wa Vaisilaeli, mweamuhumalili mala zivili. 10 Bambu Chapanga amulagizi Solomoni akotoka kuifugamila michapanga ya chiyehe, Solomoni ayidakili lepi lilagizu la Bambu Chapanga. 11 Penapo Bambu Chapanga akamujovela Solomoni, "Ndavamuni ukitili genaga, ulekili lilaganu langu na veve na ugalekili genakulagisi, chakaka yati nikukunyaga unkosi waku na yati nikumupela mmonga wa vahengaji vaku. 12 Ndava ya gala geakitili dadi waku Daudi yati nikita lepi naha lukumbi veve wakona mumi, nambu yati nikuutola unkosi waku peitalalila mwana waku. 13 Mewa yati nikuutola lepi kwaki unkosi woha, nambu yati nikumlekela likabila limonga ndava ya Daudi muhengaji wangu na kwa ndava ya Yelusalemu muji weniuhagwili uvya wangu."

14 Ndi Bambu Chapanga akamukita Hadadi mweavili wa lukolo lwa nkosi wa ku Edomu, avya likoko wa Solomoni. 15 Miyaka yamahele yayipitili, lukumbi Daudi peatovanayi na Vaedomu, ndi Yoabu mkekesi waki wa ngondo, akahamba kwenuko kuvahila vevakomiwi. Yoabu avakomili vagosi voha va Vaedomu. 16 Yoabu pamonga na manjolinjoli vaki vakatama kwenuko kwa lukumbi lwa miyehi sita, ndava ahotola kuvakomakesa njwee vagosi voha va Vaedomu. 17 Nambu Hadadi mweavili msongolo ndu lukumbi lwenulo ndi akajumbalili ku Misili pamonga na vahengaji va dadi waki. 18 Hadadi pamonga na vayaki vakagenda kuhuma ku Midiani, vakavatola na vandu vangi ku Palani, vakahamba navu mbaka ku Misili kwa nkosi wa mulima wenuwo. Falao akamupela Hadadi nyumba, akalagisa apewayi chakulya, akamupela na ndima. 19 Falao akaganiswa neju na Hadadi. Ndi Falao akamugegesa Hadadi mlamu waki, mbena wa Tapenesi, mdala waki. 20 Mwenuyo mbena wa Tapenesi akamuvelekela Hadadi mwana wa chigosi mweakemiwi Genubati. Tapenesi amulelili Genubati munyumba ya chinkosi, pamonga na vana va Falao.

21 Nambu Hadadi peavili ku Misili akayuwana kuvya Daudi na Yoabu mkulu wa manjolinjoli vahovili, akamujovela Falao, "Unilekekesayi nikiliwukayi kunyumba yangu."

22 Nambu Falao akamukota, "Chindu kiki chenibelili kukupela mbaka uyupa kukiliwuka kunyumba yaku?"

Namwene, Hadadi akayangula, "Unilekekesa ndu nikiliwukayi kunyumba yangu!"

23 Chapanga akamukita mewa Lezoni mwana wa Eliada kuvya likoko wa Solomoni. Lezoni amutilili nkosi waki, Hadadezeli nkosi wa ku Soba. 24 Lukumbi Daudi peakomili vandu ku Soba, Lezoni akavatola vandu na kuvakita vavyayi manjolinjoli vaki na mwene ndi akavya mkekesi wavi. Ndi vakahamba ku Damasiko, vakatama kwenuko na vakamukita Lezoni avyayi nkosi wa ku Damasiko. 25 Lezoni avili likoko wa Isilaeli lukumbi lwoha lwa utalalila wa Solomoni, amng'ahili neju Solomoni ngati cheang'ahiwi na Hadadi. Ndi Lezoni atalalilayi mulima wa Silia na akauvevesa neju mlima wa Isilaeli.

26 Yeloboamu mwana wa Nebati, wa likabila la Efulaimu wa ku Seleda, muhengaji wa Solomoni, nyinawaki ndi lipwela, mweakemiwayi Zelua, na mwene amuhokili nkosi. 27 Chechamukitili amng'anamukila nkosi ndi chavili, Solomoni peahengayi lihengu na kuvika bwina muji wa ku Milo, na kudiva bwina luhumba lwa muji wa Daudi dadi waki, 28 Yeloboamu awonikini kuvya msongolo mweavii ngangali na mkekesi. Penapo Solomoni peaweni kuvya msongolo avii chenicho, ndi akamuvika avyayi muyimamila wa vandu va vevahenga mahengu ga kung'ang'aniswa va likabila la Manase na Efulaimu, vevavi vana va Yosefu. 29 Ligono limonga Yeloboamu peavili mulugendu kuhuma ku Yelusalemu, munjila akakonganeka na mteta Ahiya wa ku Shilo, mweawalili ligwanda laki la mupya. Vakavya vavili ndu kumigunda. 30 Penapo Ahiya akalihula ligwanda laki la mupya na kuliyepula hipandi kumi na hivili. 31 Na akamujovela Yeloboamu, "Tola hipandi kumi ihi muni Bambu Chapanga, Chapanga wa Isilaeli, ijova naha, ‘Lola nivi papipi kuupapula na kuuwusa unkosi kwa Solomoni, na nene yati nikukupela veve makabila kumi.’ 32 Nambu Vaisilaeli yati viyendelela kulitalalila likabila limonga, ndava muni namuahidili Daudi mweanihengili bwina na ndava ya Yelusalemu muji weniuhagwilionga kuhuma mu miji yoha ya Isilaeli kuvya muju wa vandu vevakunifugamila nene. 33 Yati nikita chenicho muni Solomoni anilekili, na ahifugamili michapanga ya chiyehe, Ashitaloti mchapanga wa chidala wa Vasidoni na Kemoshi mchapanga wa Vamoabu na Milikomu mchapanga wa Vaamoni. Solomoni anihokili na akitili gahakahu palongolo yangu, na ayidakili lepi mihilu na malagizu gangu, ngati cheaniyidakili Daudi dadi waki. 34 Nambu yati nikumuwusila lepi unkosi woha muwumi waki, ndava ya muhengaji wangu Daudi mwenamuhagwili, muni alandili malagizu gangu na akitili gegiganikiwa. 35 Hinu yati nikumunyaga mwana waki unkosi wenuwo, na nene yati nikukupela veve makabila kumi ugatalalilayi. 36 Mwana wa Solomoni yati nikumulekela likabila limonga muni lukumbi lwoha viveleku vya Daudi vavyayi vatalalila pa Yelusalemu, avyayi chimuli chechiloleka lukumbi lwoha palongolo yangu mumuji wenuwuhagwili uvyayi pandu pa kunifugamila. 37 Hinu, veve Yeloboamu, yati nikukukita uvyayi nkosi wa Isilaeli, na veve yati utalalila ngati cheugana. 38 Ngati ukayuwanilayi na kuyidakila goha genikulagiza, yikavya yati utama ngati chenigana na ngati yati ukita gabwina palongolo yangu kwa kukita malagizu gangu na mihilu yangu, ngati muhengaji wangu Daudi cheahengili, nene yati nivya pamonga na veve magono goha. Na yati nikukupela mulima wa Isilaeli na kuukita utalalila waku uvyayi ngangali ngati chenamukitili Daudi. 39 Yati nikuvabuna viveleku vya Daudi ndava ya uhakau wa Solomoni, nambu lepi magono goha."

40 Ndava yeniyo Solomoni alingili kumukoma Yeloboamu, nambu Yeloboamu akatilalila ku Misili kwa Shishaki nkosi wa Misili, akatama kwenuko mbaka Solomoni peafwili.

41 Mambu gangi goha geagahengili Solomoni na luhala lwaki, gayandikwi mu Chitabu cha Matendu ga Solomoni. 42 Solomoni atalalili pa Isilaeli kwa lukumbi lwa miyaka alubaini, na atamayi ku Yelusalemu. 43 Solomoni akafwa na kuzikiwa ku muji wa Daudi dadi waki. Leoboamu mwana wa Solomoni ndi akavya nkosi pahala pa dadi waki.