1 Mulukumbi lwa miyaka hidatu kwavili lepi na ngondo pagati ya Silia na Isilaeli. 2 Nambu mumwaka wa datu Yehoshafati nkosi wa ku Yuda akahelela kuhamba kumulola Ahabu nkosi wa Isilaeli.

3 Nkosi wa Isilaeli akavakota vachilongosi vevavii pahi yaki, "Ndava kyani tikitili lepi chochoha ndava ya kuuwuyisa muji wa Lamoti Gileadi kuhuma kwa nkosi wa ku Silia?" 4 Penapo akamukota Yehoshafati, "Wu, yati uhamba pamonga na nene kutovana na Lamoti Gileadi?"

Yehoshafati akamuyangula nkosi wa ku Isilaeli, "Nene ninamtahu lepi, muni nene ndi ngati veve na vandu vangu ndi ngati vandu vaku na falasi zangu ndi ngati falasi zaku."

5 Yehoshafati akamujovela nkosi wa ku Isilaeli, "Mkota hoti Bambu Chapanga ijova kyani."

6 Penapo nkosi Ahabu wa Isilaeli akavaleta pamonga vamlota miya mcheche, akavakota, "Wu, nihambayi kungondo kutovana na Lamoti Gileadi, amala nikotoka kuhamba?"

Vakayangula, "Ena, hamba ndava muni Chapanga yati akukukita uvahotolayi."

7 Nambu Yehoshafati akakota, "Wu, avii lepi mlota yungi wa Bambu Chapanga peapa mwetihotola kumukota?"

8 Nkosi wa Isilaeli akamuyangula Yehoshafati, "Akona avii mundu mumonga mwetihotola kumkota kumvala Bambu Chapanga, nambu nimvengili muni ilotela lepi gabwina kunivala nene, nambu magono goha akunilotela gahakahu ndu. Mundu mwene ndi Mikaya mwana wa Imla."

Yehoshafati akayangula, "Chabwina lepi nkosi kujova chenichi."

9 Penapo Ahabu nkosi wa ku Isilaeli akamukemela mumonga pagati ya vakulu vevavii pahi yaki akamujovela, "Mleta kanyata Mikaya mwana waki Imla."

10 Nkosi wa ku Isilaeli pamonga na Yehoshafati nkosi wa ku Yuda vawalili nyula zavi za chinkosi, na kutama muvigoda vyavi vya chinkosi pa luvanja lwa kubulila mabenu, palimulyangu la kuyingilila mu Samalia, vamlota voha vavili pamonga na vene, 11 Sedekia mwana wa Kenaana, atenganizi mang'elu ga lyuma, akakokosa naha, "Chenichi ndi cheijova Bambu Chapanga, ‘Kwa mang'elu aga yati ukuvamula Vasilia mbaka vayongomeswa njee.’" 12 Vamlota vangi voha valotelayi chichocho vajovayi, "Hamba ukayibuna Lamoti Gileadi, ndava muni Bambu Chapanga yati akukukita uvahotola."

13 Muhengaji mweahambili kumukemela Mikaya akamujovela, "Lola, vamlota voha vavii ngati mundu mumonga vilotela uhotola kwa nkosi. Na veve ulotelayi uhotola ngati vayaku, na veve ujova gabwina kumvala nkosi."

14 Nambu Mikaya akayangula, "Chakaka nilapa kwa Bambu Chapanga, yati nikumujovela chila ndu cheakunijovela Bambu Chapanga."

15 Mikaya peahikili palongolo ya nkosi, nkosi akamukota, "Wu, tihamba kungondo kukomana na Lamoti Gileadi amala tikoto kuhamba?"

Akamuyangula, "Hamba katovana yati uhotola, muni Bambu Chapanga yati akukupela uhotola."

16 Nambu nkosi Ahabu akamujovela Mikaya, "Wu, nikulapisayi mala zilinga peulongela na nene kumvala Bambu Chapanga ulongelayi ga chakaka ndu?"

17 Penapo Mikaya akamuyangula, "Nivaweni Vaisilaeli voha vadandasiki kuhitumbi ngati mambelele gangali mundu wa kugadima, na mwene Bambu Chapanga akajova, ‘Vandu ava vana bambu lepi. Muleka kila mumonga ahamba kunyumba yaki cha uteke.’"

18 Ahabu nkosi wa ku Isilaeli akamujovela Yehoshafati, "Nakujovili lepi kuvya yati ilotela lepi chindu chochoha chabwina kunivala nene? Lukumbi lwoha ilotela gahakahu ndu!"

19 Mikaya akayendelela kujova, "Hinu yuwanilayi cheijova Bambu Chapanga! Namuweni Bambu Chapanga atamili pa chigoda chaki cha unkosi kunani kwaki pamonga na vahengaji vaki voha vayimili kumtindila upandi wa kulyela na upandi wa kumangiha. 20 Bambu Chapanga akakota, ‘Yani yati akumukonga Ahabu ahamba kukomana na Lamothi Gileadi na kuhamba kufwila kwenuko?’ Mmonga akajova naha na yungi akajova naha. 21 Hinu mzuka umonga ukayima palongolo ya Bambu Chapanga na kujova, ‘Yati nikumukonga.’" 22 Bambu Chapanga akaukota, "Yati ukita wuli?"

Ukayangula, "Yati nihamba na kujikita mpungu wa udesi na kuvakita vamlota va Ahabu valongela udesi."

Bambu Chapanga akaujovela, "Yati uhotola kumkonga, hamba ukakita chenicho."

23 Na Mikaya akamalakisa kwa kujova, "Ndava yeniyo Bambu Chapanga avakitili vamlota vaku valongela udesi. Na mwene Bambu Chapanga ajovili gahakahu gegakukolelayi."

24 Pena Sedekia mwana wa Kenaana akahamba kumbamanda Mikaya likofi la kumihu. Na kumkota, "Tangia ndali Mpungu wa Bambu Chapanga unilekili nene na kubwela na kubwela kulongela na veve?"

25 Mikaya akayangula, "Yati umanya ligono lila leuhamba kujihiha muchumba cha mugati."

26 Kangi Ahabu nkosi wa Isilaeli akalagisa, "Mumkamula Mikaya na mumpeleka kwa Amoni mtalalila wa muji na kwa Yoashi mwana waki nkosi Ahabu. 27 Mukavajovela vamvika mundu uyu muchifungu na mukotoka kumupela chindu chochoha neju ya libumunda na manji ndu mbaka peniwuya nivii mumi kuhuma ku ngondo."

28 Mikaya akajova, "Ngati yati ukawuya mumi cha uteke, manya Bambu Chapanga ajovili lepi na nene." Kangi akayonjokesa kujova, "Mwavandu voha, mwiganikiwa muniyuwanila chenijova!"

29 Ndi Ahabu nkosi wa Isilaeli na Yehoshafati nkosi wa ku Yuda vakahamba kuuzangila muji wa ku Lamoti Gileadi. 30 Nkosi wa ku Isilaeli akamujovela Yehoshafati nkosi wa ku Yuda, "Yati niyingila mu ngondo kuni nangawala nyula za chinkosi, nambu veve walayi nyula zaku za chinkosi." Ndi nkosi wa ku Isilaeli akajing'anamusa kwa kuwala nyula zingi ndi vakahamba kungondo.

31 Lukumbi lwenulo, nkosi wa ku Silia avalagisi vakekesi selasini na vavili veviyimamila mutuka za ngondo, "Mkotoka kukomana na mdebe amala mvaha nambu nga nkosi wa ku Isilaeli." 32 Vakekesi va mutuka za ngondo lukumbi pevamuweni Yehoshafati vakaholalela, "Chakaka mwenuyu ndi nkosi wa Isilaeli," Ndi vakang'anamuka muni vamukoma, nambu Yehoshafati peakwesili lwami. 33 Vala vakekesiselasini na mbili ndi vakamanya kuvyamwenuyu nkosi lepi wa ku Isilaeli, ndi vakaleka kumlandalila. 34 Nambu linjolinjoli mmonga wa ku Silia akahuta nduta yaki changali kumanya akumutova yani ndi akamubuna nkosi wa Isilaeli palutotelu lwa magwanda gaki ga lyuma. Nkosi Ahabu akamujovela mweigendesa mutuka yaki, "Ng'anamusa mutuka na uniwusa nene pangondo muni nilemili."

35 Ngondo yikayendelela muhi woha, na mwene nkosi Ahabu vakamgoneka mu mutuka yaki ya kuhutwa na falasi. Ngasi yikayendelela kuchuluzika pandu pala pealemili pachilonda chaki yikahululila mugati ya mutuka yaki, peyahikili chimihi akafwa. 36 Lilanga pelatumbwili kutipama, ukokoso ukadandasika mu manjolinjoli voha kujova, "Kila mundu ahamba kubomani kwaki, na kila munda ahamba ku mlima waki!"

37 Ndi nkosi Ahabu akafwa na vakamuleta ku Samalia na vakamzika kwenuiko. 38 Vakayisanja mutuka ya kuhutwa na falasi vakalisanja munyanja Samalia, pandu pevasambayi vakemi. Na mabwa gakamyanga ngasi yaki, ngati linenu la Bambu Chapanga chelajovili.

39 Matendu gangi geagakitili nkosi Ahabu, pamonga na nyumba ya chinkosi yeajengili na kuyinyambisa kwa mang'elu ga ndembu na miji yoha yeayijengili, vyenivyo vyoha vyayandikwi mu Chitabu cha ukumbuso wa Vankosi va Isilaeli. 40 Nkosi Ahabu peafwili, Ahazia mwana waki akavya nkosi pahala paki.

41 Yehoshafati mwana wa Asa akavya nkosi wa ku Yuda mumwaka wa mcheche wa utalalila wa Ahabu nkosi wa ku Isilaeli. 42 Yehoshafati peatubwili kutalalila avili na ntanga ya miyaka selasini na muhanu, na mwene akatalalila ku Yelusalemu kwa lukumbi lwa miyaka isilini na muhanu. Nyinawaki akemiwa Azuba msikana wa Shilihi. 43 Akitili gabwina kwa Bambu Chapnga ngati chaakitili Asa dadi waki. Akitili gegavii gabwina kwa Bambu Chapanga. Pamonga na naha abomwili lepi pandu pa panani pa kuyupila, hinu vandu vayendalili kuteta na kuhukisa ubani. 44 Mewa Yehoshafati akatama chauteke na nkosi Ahabu wa ku Isilaeli.

45 Matendu goha geakitili Yehoshafati, na ukekesi waki mungondo, gayandikwi Muchitabu cha Ukumbuso wa vankosi va ku Yuda. 46 Avavingili vagosi na vadala voha vevakitayi ukemi Pandu pa kunani pa kutetela michapanga, vevasigalili tangia tangu magono ga Asa dadi waki.

47 Tangia penapo kwavili lepi na nkosi pa Edomu, mlima watalaliwi na mundu mweahaguliwi na nkosi wa ku Yuda.

48 Lukumbi lwenulo nkosi Yehoshafati atendakihi watu zamahele za kugulila muni ahamba ku Ofili kutola zahabu, nambu katu zahambili lepi muni zadenyekili ku Esioni Gebeli. 49 Lukumbi lula Ahazia mwana wa Ahabu akamujovela Yehoshafati, "Valeka vandu vangu vagenda pamonga na vandu vaku muwatu," Nambu Yehoshafati akabela.

50 Pena Yehoshafati akafwa na akazikwa pevazikwi pa muji wa Daudi. Na Yeholamu mwana wakiakvya nkosi pahala paki.

51 Mumwaka wa kumi na saba wa Yehoshafati nkosi wa Yuda, Ahazia mwana wa Ahabu akavya nkosi wa ku Isilaeli kuni itama ku Samalia, na mwene akatalalila pa Samalia mu miyaka hivili. 52 Ahazia ambudili Bambu Chapanga muni akitili uhakau ngati cheakitili dadi waki na nyina waki na gala geakitili Yeloboamu mwana wa Nebati, mweavakitili vandu va ku Isilaeli vamubudila Bambu Chapanga. 53 Ahazia amufugamili mchapanga Baali na kumuyomesa Bambu Chapanga, Chapanga wa Isilaeli. Akitili ngati chila cheakitili Ahabu dadi waki.