1 Nkosi Solomoni peamalili kujenga nyumba ya Bambu Chapanga, na nyumba ya chinkosi na majengu gangi goha geaholalili kugajenga, 2 Bambu Chapanga akamuhumalila kangi ngati cheamuhumalili ku Gibeoni. 3 Bambu Chapanga akamujovela, "Nikuyuwini kuyupa kwaku na kufugama kwaku, niyinyambisi nyumba iyi yeunijengili ndava vandu vangu valiyupa liina langu magono goha mwenumu. Yati nikuyiyangalila na kuyiyunga nyumba iyi magono goha gangali mwishu. 4 Na veve ngati ukanihengelayi cha uchakaka ngati cheanihengili Daudi dadi waku, ukayidakilayi malagizu gangu na kukita gala goha genikulagisi, ukalandayi mihilu yangu, 5 penapo nene yati nikuchikangamalisa chigoda chaku cha unkosi magono goha gangali na mwisu, ngati chenamuhaidili Daudi dadi waku, nikajova, ‘Yati ukosa lepi mundu mu chiveleku wa kutama pachigoda chaku cha unkosi wa Paisilaeli.’ 6 Nambu veve amala vana vaku mukang'anamukayi na kuleka kunilanda, mukalekayi kukamula malagizu gangu na mihilu yenivapelili, mukahambayi kuifugamila michapanga hingi, 7 ndi yati nikuvataga Vaisilaeli kutali vawuka pamulima uwu wenivapelili, na nene yati nikuyibela nyumba iyo yeniyinyambisi ndava ya kunifugamila nene. Ndi Vaisilaeli yati vivya vandu va kubelalewana vandu na kuveveswa na vandu voha. 8 Na nyumba yeniyi yati yibomoka na kuvya mang'ova kila mweipita papipi yaki yati ikenyemuka na kunyugusa mitu na kukota, ‘Ndava kyani Bambu Chapanga aukitili naha mulima uwu na nyumba yeniyi?’ 9 Vandu vangi yati viyangula, ‘Ndava muni vamulekili Bambu Chapanga, Chapanga wavi, mweavawusili vagogo vavi kumulima wa Misili, vakavya na michapanga hingi na vakahifugamila, ndavayeniyo ndi Bambu Chapanga avaletili mubunu uwu.’"

10 Miyaka ishilini yikamalika yeahengalili Solomoni kujenga nyumba zivili, nyumba ya Bambu Chapanga na nyumba ya unkosi, 11 nkosi Solomoni amupelili Hilamu nkosi wa ku Tilo, miji ishilini mumukoa wa Galilaya, ndava muni Hilamu amupelekili nkosi Solomoni mbawu za mielezi na za miboleshi pamonga na zahabu ngati chaeganili ndava ya kujengela. 12 Nambu Hilamu peabwelili kuhuma ku Tilo na peahiweni miji yeniyo yeapewili na Solomoni, aganiswi nayu lepi. 13 Ndi akamukota Solomoni, "Mulongo wangu mboni unipelili miji yeyangavya yabwina?" Ndi mana miji yeniyo yikemiwa Kabuli mana yaki hihakahu mbaka lelu. 14 Hilamu ampelekili nkosi Solomoni zahabu kilo elufu muhanu.

15 Aga ndi makokoso kuvala mahengu ga kulazimisa, gala nkosi Solomoni geavahengisi vandu ndava ya kuyijenga nyumba ya Chapanga, na nyumba yaki ya chinkosi na ngomi ya Milo na luwumba lwa Yelusalemu, na muji wa ku Hazoli na wa ku Megido pamonga namuji wa ku Gezeli. 16 Gezeli ndi muji wula weaukamwili Falao nkosi wa ku Misili, akauyocha motu na kuvakomakesa Vakanaani vevavili mwenumo. Mwanakandahi msikana wa Falao peagegiwi na nkosi Solomoni, ndi Falao akamupela msikana waki muji wa Gezeli kuvya njombi ya mutimbu wa ndowa. 17 Ndi nkosi Solomoni akaujenga kavili muji wa Gezeli mewawa akajenga na Beti Holoni ya pahi, 18 mewawa ajengili muji wa Baalati na muji wa Tamali yeyavili kulugangatu papipi na mulima waki. 19 Miji yaki yoha ndava ya hibana, miji ndava ya mutuka zaki za ngondo za kuhutwa na hinyama, na miji ndava ya vakwela falasi, mewa na vyoha vyeaganili kuvijenga ku Yelusalemu, ku Lebanoni na ku kila pandu peatalalili. 20 Vandu vangi voha vevasigalili mumi kuhuma kwa Vaamoli, Vahiti na Vapelizi na Vahivi na Vayebusi, vandu venavo vavili Vaisilaeli lepi, 21 pamonga na viveleku vyavi vyevyangakomiwa na Vaisilaeli, Solomoni avahengisi mahengu cha kuvang'anga'anisa mbaka lelu. 22 Nambu pagati ya Vaisilaeli Solomoni amukitili lepi hati mundu mumonga kuvya mvanda, Vaisilaeli ndi vavii manjolinjoli vaki na vahengaji vaki na vakekesi vaki va ngondo na vilongosi va pahi yaki na vakekesi va mumutuka zaki za kuhutwa na vandu vaki va kukwela falasi.

23 Mewa vavili vavilongosi vakulu va kuyimamila miladi ya Solomoni, vayimamila miya muhani na hamusini ndi vavayimamili vandu vevahengayi mahengu ga kung'ang'aniswa.

24 Mwanakandahi msikana wa Falao akawuka mumuji wa Daudi na kuhamba kutama munyumba ya chinkosi yeayijengili Solomoni, kangi Solomoni akajenga ngome ya Milo.

25 Solomoni awusili teta za kutinyiswa na teta za uteke mala zidatu mu kila mwaka pandu pa kuwusila teta peamujengili Bambu Chapanga, akamuhukisila Bambu Chapanga ubani, kangi akamalikisa kujenga nyumba.

26 Nkosi Solomoni atenganizi watu zamahele uko ku Ezioni Gebeli, papipi na ku Eloti yeyivili kumbwani ya nyanja ya Shamu kumulima wa ku Edomu. 27 Na mwene nkosi Hilamu akavatuma vandu vaki vevamanyili kuhenga mahengu mu watu pamonga na vahengaji va Solomoni. 28 vakagenda munyanja mbaka ku mulima wa Ofili na kwenuko vakatola zahabu kilo elufu kumi na mcheche na vakamuletela nkosi Solomoni.