1 Ahabu akamjovela mdala waki mweikemiwa Yezebeli, kila chindu cheakitili Eliya, na chila chaavakomili vamulota voha kwa upanga. 2 Penapo Yezebeli akatuma ujumbi kwa Eliya akamjovela, "Nilapa yati nikukukoma. Mbaka chilau lukumbi ngati ulu ngati yikavya nangakita chenichi, ndi michapanga yinikoma." 3 Eliya akayogopa, na akatila ndava ya kuusangula wumi waki. Akamtola mmonga wa vatumisi vaki akahamba nayu ku Beeli Sheba mu Yuda, akamuleka muhengaji waki kwenuko.

4 Nambu Eliya akagenda lugendu lwa ligono loha mulugangatu. Akahika pachikongo chechikemiwa mletemu, akayima na kutama pahi yaki na kuyupa muni afwayi. Akajova, "Hinu yikolili, Bambu Chapanga, wusa wumi wangu, mbanga nifwa, ndava muni nene namubwina lepi ngati vadadi vangu."

5 Kangi akajigoneka na kugona lugono. Baho mtumu wa kunani akamupamisa na kumujovela, "Yimuka, ulye." 6 Akalolokesa pandi zoha, na penapo papipi na mutu waki kwavili na libumunda leliyochwili pamotu wa makalakala na libotolo la manji. Akalya na kunywa, na akagona kavili. 7 Mtumu wa Bambu Chapanga yula akabwela kangi, akampamisa akamujovela, "Yimukayi ulyayi, nambu ngati ukabela kulya lugendu lwaku yati luvya lwelunonopa." 8 Ndi akayimuka, akalya na kunywa. Chakulya chila chikamupela makakala, akagenda lugendu lwa magono alubaini muhi na kilu mbaka akahika ku chitumbi cha Chapanga chechikemiwa Sinai. 9 Kwenuko akayingila muligodi, akagona mwenumo kilu yeniyo.

Bahopo Bambu Chapanga akamjovela, "Eliya, ukita kyani peapa?"

10 Eliya akayangula, "Nijiwusili kukuhengela veve ndu Bambu Chapanga mweana makakala goha. Vandu va Isilaeli valibelili Lilaganu laku, vadenyili pandu paku pa kuwusila luteta na kuvakoma vamlota vaku kwa upanga. Nga nene namwene mwenisigalili, na hinu vakunilonda muni vanikoma."

11 Bambu Chapanga akajova, "Huma kuvala ukayima panani ya chitumbi palongolo yangu, muni nene Bambu Chapanga nipita penapo." Kangi Bambu Chapanga akapita na upepu wamahele weuvi na makakala ukabwela na kubayula hidunda hila na kudenyadenya matalau. Nambu Bambu Chapanga avili lepi mu upepu wenuwo. Upepu pewamaliki, kukavya na mndendemu wa ndima. Nambu Bambu Chapanga avili lepi mumndendemo wula. 12 Pewamaliki mndendemo wa ndima, kukavya na motu, nambu Bambu Chapanga avili lepi mu motu wula. Pewamaliki motu, lukabwela lwami lwa pahi lwa kupwepa.

13 Eliya peayiyuwini, akagubika pamihu paki kwa nyula yaki, akahuma na kuyima pamulomo wa ligodi. Kangi lwami lula lukamujovela, "Eliya, ukita kyani penapa?"

14 Eliya akayangula, "Nijiwusili kukuhengela veve ndu Bambu Chapanga mweuvi na makakala goha. Vandu va Isilaeli valibelili Lilaganu laku, vadenyili pandu paku pa kuwusila luteta na kuvakoma vamlota vaku kwa upanga. Nga nene namwene mwenisigalili, na hinu vakunilonda muni vanikoma."

15 Bambu Chapanga akamjovela, "Wuya kwa njila yeukayibwelalili, uhamba kulugangatu lwa Damasiki. Lukumbi peuhika kwenuko, mnyala mahuta Hazaeli avya nkosi wa Silia. 16 Mewa mnyala mahuta Yehu mwana wa Nimshi avya nkosi wa Isilaeli, na umunyala mahuta Elisha mwana wa Shafati kuhuma ku Abeli Mehola avya mlota pahala paku. 17 Yehu yati akumukoma yoyoha mweitila upanga wa Hazaeli, na mwene Elisha yati akumukoma yoyoha mweitila upanga wa Yehu. 18 Hati hinu nivikili vandu elufu saba pa Isilaeli, vala voha vevangamyupa na kumfugamila mchapanga Baali, amala kubusu chimong'omong'o chaki."

19 Eliya akawuka penapo, palongolo akamkolela Elisha mwana wa Shafati. Alimayi kwa ng'ombi ishilini na mcheche, zezalimayi zivili, na mwene azilongosayi ng'ombi zivili za mwishu. Eliya akapita papipi naku, akahula lijoho laki na kumuwalika Elisha. 20 Penapo Elisha akazileka ng'ombi zaki, akamlanda Eliya, na akamujovela, "Nileka nikavalaga dadi wangu na nyina wangu, ndi yati nilandana na veve."

Elia akayangula, "Hambayi, nikubesa lepi."

21 Ndi Elisha akamuleka Eliya, na mwene akakiliwuka. Akatola ng'ombi zaki za kulimila akazihula mangolingoli na akazihinja. Akatola mangolingoli na kugabayula kuvya sagala za kutelekela nyofu, akavapela vandu na vene vakalya. Kangi akawuka, akamulanda Eliya na kutumbula kumuhengela.