1 Salomoni akamgega msikana wa nkosi wa ku Misili na hinu vakayidakilana. Akamuleta msikana wa nkosi wa ku Misili pamuji weukemiwa muji wa Daudi, mbaka peamalili kujenga Nyumba yaki mwene na nyumba ya Bambu Chapanga na luwumba lwa kuutindila muji wa Yelusalemu. 2 Kwakona gangakitika genago, lukumbi lwenulo vandu vawusayi teta kuhitumbi, ndava muni Nyumba ya Chapanga yavii yakona yangajengwa. 3 Solomoni amuganili Bambu Chapanga, na akagalanda gealagiswi na Daudi, dadi waki, nambu ndu na mwene aganikiwi kuwusa teta za hinyama ya kutinyiswa na kuhukisa ubani ku hitumbi.

4 Lukumbi nunuyu, nkosi Solomoni ahambili kuwusa teta ku Gibeoni, muni pavili ndi pandu papimanyikana pa kuyupila. Chenicho ndi cheayovalili kukita Solomoni kuwusa maelufu ga teta za kutinyiswa mu pandu penapo pa kuwusila teta. 5 Peavili kwenuko ku Gibeoni, kilu Bambu Chapanga amuhumalili mundoto, na akamujovela, "Yupa chochoha chewigana na nene yati nikukupela."

6 Solomoni akayangula, "Wamulangisi ubwina wamahele neju dadi wangu Daudi, muni akuhengili kwa usadika na kwa ubwina na kukita mambu gegakukuganisa veve, na uyendalili kumulangisa uganu waku kwa kumukita mwana waki atama pa chigoda chaki cha unkosi. 7 Veve Bambu Chapanga, Chapanga wangu, univikili nene nivya nkosi pahali pa dadi wangu Daudi, pamonga kuvya nakona namsongolo nangavya na luhala lwa kulongosa. 8 Na peapa univikili pagati ya vandu vaku veuvahagwili, na vene ndi vamahele hati nakuhotola kuvalangika. 9 Hinu nikuyupa unipelayi nene namuhengaji waku luhala lwa kuvalongosa vandu vaku bwina, na nihotolayi kumanya gabwina na gahakahu, muni ndi yani mweihotola kuvalongosa vandu vaku vevavili vamahele naha?"

10 Lijambu lenili leayupili Solomoni ndi lamganisi neju Bambu Chapanga, 11 na mwene ndi akamujovela, "Muni uyupili luhala lwa kuvalongosa vandu, na wajiyupili lepi wumi utali amala kuvya na vindu vyamahele, na wayupili lepi vamakoko vaku vakomiwayi, 12 ndi hinu nikukukitila ngati cheuyupili. Lola nikukupela umanya na luhala, na kawaka mundu yoyoha mweavi navyu kwakona veve wangavya, na yati kuvya lepi mundu yungi mweihumalila pahala paku mweivye navyu. 13 Mewa yati nikukupela gala gewangagayupa, yati nikukupela vindu vyamahele pamonga na utopesa neju kuliku nkosi yungi yoyoha yula. 14 Kangi ngati ukaniyidakila na kulanda mihilu na malagizu gangu na kukita genilagisi ngati cheakitili dadi waku Daudi, hinu yati nikukita wumi wa magono gamahele."

15 Solomoni peayimwiki, akamanya kuvya ikavii ndoto. Ndi akakiliwuka ku Yelusalemu akayima palongolo ya Lisanduku la Lilaganu la Bambu Chapanga, ndi akawusa teta za kutinyiswa na za uteke. Mewa akavakitila mselebuko vandu vaki voha.

16 Ligono limonga vadala vavili vakemi, vakahamba kwa nkosi Solomoni na kuyima palongolo yaki. 17 Mmonga wavi ndi akajova, "Veve bambu wangu, nene na muyangu uyu titama nyumba yimonga, nene naveliki mwana mgosi kuni mulumbu uyu avii munyumba mumumu. 18 Ligono la datu na mwene akaveleka mwana mgosi. Kwavili lepi na mundu yungi munyumba nambu tete tavavili ndu. 19 Lukumbi lwa kilu yimonga, mwana waki afwili ndava amugonalili. 20 Ndi akayimuka kilu neju, akamutola mwana wangu lukumbi nene nivii lugono, akamugoneka panganga yaki. Mewa akatola higa ya mwana waki mweafwili, akayigoneka panganga yangu. 21 Penayimwiki lukela na kugana kumunyongesa mwana wangu ndi nikakolela mwana afwili! Nambu penamulolokisi bwina, ndi nikamanya kuvya avili lepi mwana wangu mwenimuveliki."

22 Nambu mdala yungi yula ndi akajova, "Pehe! wangu ndi mweavii mumi nambu mweafwili ndi waku."

Nambu yula wakutumbula ndi akayendelela kujova, "Pehe, mwana mweafwili ndi waku na mweavii mumi ndi wa nene."

Chenichi ndi chevaywangisini palongolo ya nkosi.

23 Penapo ndi nkosi Solomoni akajova, "Mwavoha mwijova mweavii mumi ndi wangu na mweafwili wa nene lepi." 24 Hinu, nkosi akalagisa, "Muniletelayi upanga!" Vakamuletela. 25 Nkosi akajova, "Mudumulayi mwana mweavii mumi vipandi vivili na umupelayi kila mmonga chipandi chimonga."

26 Mdala mweavii nyina wa mwana mweavili mumi akavya na lipyanda ndava ya mwana waki, akamujovela nkosi, "Chondi nkosi, mukotoka kumukoma mwana. Mumupela muyangu mwana mweavii mumi, amutola mwene."

Nambu mudala yungi yula ndi akajova, "Pehe! Mwana akotoka kuvya wa nene amala waki. Mudumulayi hipandi hivili."

27 Nkosi Solomoni akajova, "Kotoka kumukoma mwana! Mupela mdala mwaigana mwana avya mumi amutolayi, muni mwene ndi nyina waki."

28 Vandu voha va Isilaeli pevayuwini uhamula weauwusili nkosi, ndi vakamuyogopa, vakamanya kuvya avii na luhala lwa Chapanga lwelumuhotwisi kuhamula muhalu cheyiganikiwa.