1 Hinu mlota Eliya wa chijiji cha Tishibe uko ku Gileadi, akamujovela nkosi Ahabu, "Nilapa kwa Bambu Chapanga, Chapanga wa Isilaeli mweavii mumi mwenikumufugamila nene, yatikuvya lepi na mbetu amala fula kutumbula hinu mbaka penijova nene."

2 Bambu Chapanga likamubwelela Eliya kuvya, 3 "Wuka penapa hamba ku upandi welihumila lilanga, ukajihiha pakapela ka Keliti kekavii kwelihumila lilanga mwa mfuleni Yoludani. 4 Kwenuko yati winywa manji ga kapela kenako, na mewa nigalagisi makungulu gakuletela chakulya kwenuko."

5 Penapo Eliya akakita ngati chealagiswi na Bambu Chapanga, akahamba kutama mumihana ya kapela ka Kelithi kekavii kuupandi welihumila lilanga wa mfuleni Yoludani. 6 Lukela na chimihi makungulu gamuletelayi libumunda na nyofu, na anywayi manji mukapela kenako. 7 Nambu mumagono gadebe ndu kapela kakayuma muni fula yatonyayi lepi pamulima.

8 Penapo Bambu Chapanga akamjovela mlota Eliya na kujova, 9 "Uhamba kubomani ya Salefati, papipi na Sidoni, ukatama kwenuko. Nimulagisi mudala mumonga lipwela akupela chakulya kwenuko." 10 Ndi Eliya akawuka, akahamba ku Salefati. Peahikili pamulyangu wa muji, amukolili mdala mumonga lipwela inonga sagala. Eliya akamukemela mdala mwenuyo na kumujovela, "Niyupa unipela manji ga kunywa." 11 Mdala yula peahambayi, Eliya akamujovela, "Niyupa uniletelayi na chipadi cha libumunda."

12 Mdala mwenuyo akamujovela, "Nikulapila kwa Bambu Chapanga, Chapanga waku mweavii mumi, nina libumunda lepi hati lidebe. Vyenivii navyu ndi uhembe wa kuteleka mala yimonga na tumahuta chidogo mulibotolo. Nibwelili peapa kunonga sagala na kuwuya kunyumba nikatelekayi tilyayi nene na mwana wangu na tilindila kufwa."

13 Eliya akamjovela, "Kotoka kuyogopa. Hamba kakita ngati cheujovili. Nambu unitengenezela nene hoti na uniletelayi chipandi cha libumunda, kangi ndi mujitengenezelayi chakulya veve na mwana waku. 14 Muni Bambu Chapanga, Chapanga wa Isilaeli ijova naha, ‘Uhembe weuvii muchiviga chaku yati upungula lepi mewa na mahuta gegavii mugati ya libotolo yati gipunguka lepi, mbaka nene Chapanga penitonyesa fula pamulima.’ "

15 Hinu lipwela mwenuyo akahamba kukita ngati cheajoviwi na Eliya. Ndi kukavya na chakulya cha Eliya, mau yula pamonga na vandu va munyumba yaki magono gamahele. 16 Uhembe wamaliki lepi muchiviga wala mahuta gapungwiki lepi mulibotolo kulandana na linenu la Bambu Chapanga leamjovili Eliya ajovayi.

17 Pagapitili magono gadebe, mwana wa lipwela yula akalwala, akavya mulung'olelu, na pamwisu akafwa. 18 Mdala yula akamkota Eliya, "Veve wamundu wa Chapanga una kyani na nene? Kumbi wabwelili kwangu ndava ya kunimanyisa uhakahu wangu, na kuleta lifwa la mwana wangu?"

19 Eliya akamuyangula, "Nipela mwana waku."Ndi Eliya akamutola mwana mwenuyo kuhuma mumawoko ga nyina waki, akahamba naku kuchumba chaki kudali, akamvika panani ya chitanda chaki. 20 Ndi akamuvembela kwa lwami luvaha Bambu Chapanga kwa kumujovela, "Veve Bambu Chapanga, Chapanga wangu, wu, hati na mudala uyu mwenitama kwaki, mweakunivika mumi, ukumuletela msolo wa kumukoma mwana waki?" 21 Kangi Eliya akajigonesa panani ya higa ya mwana mwenuyo mala zidatu kuni akumuyupa Bambu Chapanga, "Veve Bambu Chapanga, Chapanga wangu, muwuyisilayi mwana uyu wumi waki!" 22 Bambu Chapanga akayuwanila kuyupa lwa Eliya, mwana akatumbula kukeka kangi.

23 Eliya akamuwuyisa mwana pahi kwa nyina waki, akamujovela, "Lola! Mwana waku avii mumi!"

24 Lipwela mwenuyo akamujovela Eliya, "Hinu nimanyili chakaka kuvya veve ndi wamundu wa Chapanga na malovi geakupelili Bambu Chapanga ugajovayi ndi gachakaka."