1 Penapo nkosi Solomoni akavakonganesa palongolo yaki uko ku Yelusalemu vagogo na vachilongosi voha va makabila na vakulu va lukolo za Isilaeli, ndava valiwusayi Lisanduku la Lilaganu la Bambu Chapanga mu muji wa Daudi, yaani Siyoni. 2 Vandu voha va pa Isilaeli vakakonganeka kwa nkosi Solomoni lukumbi lwa mselebuko, mumwehi wa saba weukemiwa Etanimu. 3 Pevamalili kubwela vagogo voha va pa Isilaeli, ndi vamteta vakaligega Lisanduku la Lilaganu, 4 Valawi pamonga na vamteta valiwusili Lisanduku la Lilaganu na lindanda la kukonganekela, pamonga na vyombo vyoha vyamusopi vyevyavili mulindanda lenilo. 5 Nkosi Solomoni na vandu voha va Isilaeli vakakonganeka palongolo ya Lisanduku la Lilaganu, na vene vakawusa luteta za ng'ombi na mambelele vyangavalangika. 6 Pena vamteta vakaliyingisa Lisanduku la Lilaganu la Bambu Chapanga pahali paki, Pandu pa Msopi neju, pahi ya magwaba ga hiumbi. 7 Viumbi vyenivyo magwaba gaki gadandiswi panani ya Lisanduku la Lilaganu, hinu Lisanduku pamonga na hikamulilu yaki ya kugegela vyavili pahi ya magwaba. 8 Muni hikamulilu yeniyo yavili hitali neju, ndi yawonikini mbaka palongolo ya pandu Pamsopi neju, nambu vyawonikini lepi kuupandi wa kuvala. Vigegelu vyenivyo vyakona vivi pandu penapo mbaka lelu. 9 Kwavili lepi na chindu chingi mugati ya Lisanduku la Lilaganu nambu ndi vibawu vivili vya maganga vyeavikili Musa tangia ku Holebu, pandu pala Bambu Chapanga peakitili lilaganu na Vaisilaeli pevahumayi kumlima wa Misili.

10 Vamteta pevahumayi mu pandu pamusopi neju, bahopo lihundi likamema mu Nyumba ya kumfugamila Bambu Chapanga. 11 Na vene vamteta vahotwili lepi kuhenga lihengu la chimteta ndava ya lihundi lenilo, muni umsopi wa Bambu Chapanga wamemili mwenumo. 12 Ndi Solomoni akayupa na kujova,

"Veve Bambu Chapanga wavikili lilanga kunani,

hinu uhagwili kutama mu mahundi na muchitita ng'ong'ololo. 13 Chakaka nikujengili nyumba ya kutama, pandu peutama magono goha gangali na mwisu."

14 Kangi Solomoni akavang'anamukila mngonganu woha wa Vaisilaeli pevavili vayimili, akavamotisa. 15 Akajova, "Alumbiwa Bambu Chapanga, Chapanga wa Isilaeli, ndava kwa makakala gaki atimilisi gala geamuhaidili dadi wangu Daudi, muni ajovili, 16 ‘Tangia nivawusili vandu vangu va Isilaeli kuhuma kumlima wa Misili, nahagwili lepi muji wowoha mumakabila ga Isilaeli muni nijengewayi nyumba ya kunifugamilila, nambu namuhagwili Daudi avatalalilayi vandu vangu va Isilaeli.’ "

17 Solomoni akayendelela kujova, "Dadi wangu Daudi aganili kuyijenga nyumba ya kumfugamilila Bambu Chapanga, Chapanga wa Isilaeli. 18 Nambu Bambu Chapanga amujovili dadi wangu Daudi, ‘Muni waganili kujenga nyumba ndava ya kunifugamila, wakitili chabwina kuvika lenilo mumutima waku. 19 Nambu ukunijengela lepi veve, yati akunijengela mwana waku mweukumvelekayi wamwene.’ 20 Na hinu Bambu Chapanga atimilisi ahadi yaki, na nene niyimili pahali pa dadi wangu Daudi na lelu nichitamili chigoda cha unkosi cha Isilaeli, ngati cheahaidili Bambu Chapanga, na nene nijengili nyumba ya kumufugamila Bambu Chapanga, Chapanga wa Isilaeli. 21 Neju ya genago, nitenganizi pandu pa kulivika Lisanduku la Lilaganu, mugati yaki muna hipandi ya maganga ya lilaganu leakaitili Bambu Chapanga na vagogo vitu, lukumbi peavawusayi kumulima wa Misili."

22 Kangi, Solomoni akayima palongolo ya pandu pa kuwusila teta pa Bambu Chapanga kuni vandu voha va Isilaeli vakumulola, akayinula mawoko gaki kunani, 23 akajova, "Veve Bambu Chapanga, Chapanga wa Isilaeli, kawaka Chapanga yungi ngati veve, kunani kwaku amala pahi pamulima! Veve wamusadikika, muni utimilisi lilaganu laku na kuvalangisa ubwina waku kwa vahengaji vaku na kukuyidikila kwa mtima wavi woha. 24 Utimilisi ahadi yaku yewayivikili kwa muhengaji waku dadi wangu Daudi, kwa makakala gaku lelu utimilisi gala goha gewajovili. 25 Hinu, veve Bambu Chapanga, Chapanga wa Isiaeli, nikukuyupa mewa uyitimilisayi ahadi yila yewamuhaidili muhengaji waku dadi wangu Daudi, pewajovili, ‘Magono goha yati uvya na mvelekwa wa kutama pachigoda chaku cha unkosi wa Isilaeli, yikavyayi viveleku vyaku yati vivya vasadikika mu matendu gavi palongolo yangu ngati veve cheuvii wamsadikika palongolo yangu.’ 26 Hinu, veve Chapanga wa Isilaeli, chondi ugatimilisayi gala goha gewamuhaidili muhengaji waku dadi wangu Daudi.

27 Wu, veve Chapanga yati utama pamulima? Yikavyayi hati kunani kwaku kwekuvii kunani neju kwene kukutosha lepi, ndi yati yikukukola wuli nyumba iyi yidebe yeniyijengili? 28 Pamonga na naha Bambu Chapanga, Chapanga wangu, nene namuhengaji waku uyuwanilayi kuyupa kwangu na kunitimisila luyupu lwangu lwenikukuyupa lelu. 29 Uyiyungayi nyumba iyi muhi na kilu, pandu peujovili, ‘Penapo ndi vandu pevakunifugamila nene.’ Uniyuwanilayi nene paniyupa kwa kuangalia mahali hapa. 30 Uyuwanilayi luyupu lwa muhengaji waku na lwa vandu vaku va Isilaeli lukumbi peviyupa kwa kulola pandu apa. Uyuwanayi luyupu peuvya kunani kwaku, na ukamalayi kuyuwana utihengela lipyana."

31 "Mundu akamubudilayi muyaki, na mwene akaletwayi ndava ya kulapa palongolo ya pandu pa kuwusila teta mu nyumba iyi, na mwene akalapayi, 32 chondi veve Bambu Chapanga uyuwanilayi kuhumila kukwoko kunani kwaku, ukita chechiganikiwa kuvahamula vahengaji vaku. Mweahokili umubunayi kulandana na kuhoka kwaki, mweangahoka umulekekesayi na kumukitila ubwina kulandana na usadika kwaki."

33 "Yikavyayi vandu vaku va Isilaeli vabuniwi na vamakoko vavi ndava ya gahakahu gevakuhengili, vakang'anamuka na kubwela mu Nyumba yeniyi, vakafugamayi kwaku kukuyupa kulekekeswa na kulilumba liina laku, vakakitayi chenicho kwa ungolongondi Nyumba yeniyi, 34 ndi uvayuwanilayi kuhumila kukwo kunani kwaku. Uvawonelayi lipyana vandu vaku va Isilaeli ndava ya kukubudila kwavi, na uvakiliwusayi kumulima wewavapelili vagogo vavi."

35 "Fula yikabelayi kutonya ndava ya kukubudila kwavi, vakang'anamuka na kulola pandu apa na kulilumba liina laku, kuyupa na kukufugamila, mewa vakalekayi kubuda kwavi peukuvabuna, 36 chondi uvayuwanilayi kuhumila kunani kwaku, na ulekekesayi kubuda kwa vahengaji vaku, vandu vaku va Isilaeli. uvawula njila ya bwina ya kutama na ukatonyesa fula panani ya mulima weuvapelili vandu vaku uvya wavi."

37 "Lukumbi mulima peuvya na uyumu amala yikahotola kutonya fula mbaka mabenu gakawola amala matamu gahakau gakadandasika mu vandu. Lukumbi lungi mimeya yihotola yikahalibika kwa kuliwa na mambalanguli pamonga na mabungu, vandu vaku vihotola vakazangiwa mumilima yavi. Vandu vaku vihotola kuvya vatamu, 38 chondi, uyuwanilayi kuyupa kwokwoha kwa vandu vaku va Isilaeli, amala mundu yoyoha akamanyayi mang'aiso ga mumtima waki, akakuyupai kuni atalambwisi mawoko gaki kulangisa kunyumba yeniyi 39 hinu uyuwanilayi tangia kunani kwaku uko, na uvalekekesa. Mewa umukitilayi kila mundu ngati cheiganikiwa, muni veve ndu ndi mweumanya maholo ga kila mundu, 40 muni vakuyidakilayi lukumbi lwoha lwevitama pamulima wewavapelili vagogo vavi."

41 "Mewawa, lukumbi muyehe akabwela kuhuma ku mulima wa kutali ndava ya mambu gavaha geuvakitili vandu vaku na akavya pagati ya vandu vaku va Isilaeli, 42 muni vandu va milima hingi yati viyuwana kulumbiwa kwaku na kuvala makakala na uhotola waku, mundu mwenuyo akabwelayi na kuyupa kuni ilolokesa nyumba yeniyi, 43 chondi umuyuwanilayi kuhuma kunani kwaku, na umuhengelayi muyehe mwenuyo goha geakuyupa muni vandu voha va pamulima vahotola kumanya mambu gavaha geuvakitili na kukuyidakila ngati chevikita vandu vaku va Isilaeli, na Vandu voha vamanya kuvya nyumba yeniyi yeniyijengili, ndava ya mambu gavaha geuvakitili."

44 "Lukumbi vandu vaku pevihamba kungondo kutovana na vamakoko vavi, kwokwoha kweukuvapelekayi, ngati vakakuyupayi kuuyelekela muji weuwuhagwili na nyumba yeniyijengili ndava ya liina laku, 45 nikuyupa uyuwanilayi kuyupa kwavi kukwoko kunani kwaku, uvapela uhotola kungondo."

46 "Nambu vakakukitilayi uhakahu muni kawaka mundu mweangakita uhakahu, na veve ukavalekayi vabuniwayi va vamakoko, na kukamuliwa kupelekwa ku muji weuvii kutali amala papipi, 47 pevivya kwenuko vakang'anamusa mitima yavi na kufugama kwa kukuyupa lipyana, kujova, ‘Tikitili gahakahu, tiyagili na kukita gangaganikiwa,’ 48 mewa lukumbi lwenulo lwevivya kumulima wa makoko vavi, vakayupayi lipyana kwa mitima yavi yoha na kwa mipungu yavi yoha, na ngati vakukuyupa kuni viyelekela kumulima wavi wewavapelili vagogo vavi, vakayelekelayi ku mulima uwu wewauhagwili na Nyumba yeniyi yeniyijengili ndava ya liina laku, 49 ndi nikukuyupa uyuwanilayi kuyupa kwavi na uvahengelayi lipyana. 50 Uvalekekese vandu vaku kukubudila kwavi na uhakahu wavi, uvawonelayi lipyana palongolo ya vamakoko vavi, na kuvakita vamakoko vavi vavawonela lipyana. 51 Muni venava ndi vandu vaku na vewavawusili ku Misili kuhuma mu litanulu la kuyeyusila lyuma."

52 "Yuwanilayi luyupu lwa nene muhengaji waku na luyupu lwa vandu vaku va Isilaeli, uvayuwanilayi kila pevakukuyupa uvatangatilayi. 53 Ndava muni, veve Bambu Chapanga wavavagwili pagati ya vandu va milima yingi va pamulima, ndava vavyayi vandu vaku ngati chewakokwisi kwa kupitila mtumisi waku Musa, lukumbi lula lwewavawusili vagogo vitu kumulima wa Misili."

54 Solomoni peamalili kumyupa Bambu Chapanga palongolo ya pandu pa kuwusila teta, akayima pala peafugimi kuni akwesili mawoko gaki kunani. 55 Akayima na kuvamotisa Vaisilaeli voha vevakonganiki penapo, kuni ijova kwa lwami luvaha, 56 "Alumbiwayi Bambu Chapanga mweavapelili uteke vandu vaki va Iisilaeli, kulandana na lilaganu laki. Akitili goha gabwina geajovili kupitila mtumisi waki Musa. 57 Bambu Chapanga, Chapanga witu, avyayi na tete ngati cheavili na vagogo vitu, tiyupa akoto kutileka amala akoto kutitaga. 58 Mwene ayikita mitima yitu yivya yeyikumsadika mwene, muni tilandayi njila zaki kwa kuyidakila malagizu gaki na mihilu yaki na uhamula waki geavapelili vagogo vitu. 59 Hinu malovi gangu genaga geniyupili kwa Bambu Chapanga ndi gavyayi papipi na Bambu Chapanga, Chapanga witu, muhi na kilu, na mwene aniyunga nene muhengaji waki pamonga na vandu vaki va Vaisilaeli, muni vapatayi vindu vyoha vyevigana magono goha. 60 Na vandu va milima yoha yati vimanya chakaka kuvya Bambu Chapanga, ndi Chapanga na kawaka yungi. 61 Na nyenye muvyayi mwavasadika kwa Bambu Chapanga, Chapanga witu, mulanda mihilu yaki na kuyidakila malagizu gaki goha ngati chemwikita lelu."

62 Kangi, nkosi Solomoni pamonga na Vaisilaeli voha vevavili pamonga nayu vakamuwusila Bambu Chapanga teta. 63 Na mwene Solomoni akamuwusila Bambu Chapanga teta ya kutana cha uteke, ng'ombi elufu ishilini na hivili na mambelele laki yimonga na elufu ishilini. Chenicho ndi nkosi Solomoni pamonga na Vaisilaeli voha chevayinyambisi Nyumba ya Bambu Chapanga. 64 Ligono lilolo nkosi Solomoni akanyambisa uwa ya pagati yeyavili palongolo ya nyumba ya Chapanga, penapo ndi peawusalili teta za kutinyiswa, teta za mabenu na mahuta ga hinyama na teta za uteke, ndava yeniyo ndi pandu pa kuwusila teta pa shaba pavili padebe ndi patosili lepi teta zenizo zoha.

65 Hinu Solomoni akakita mselebuko mwene pamonga na vandu voha va Isilaeli, msambi uvaha neju, vandu kuhuma ku Lebo Hamati yeyivi upandi wa kasikazini mbaka mfuleni udebe wa Misili weuvi upandi wa kusini. Vakakita mselebuko palongolo ya Bambu Chapanga kwa magono saba na vakayongesa magono saba gangi. 66 Muligono la nane mu magono gala saba gevayonjokisi Solomuni akavalaga vandu na vene vakamtakila mota nkosi, vakahamba kunyumba yavi kuni viluluta na kusangaluka mu mitima yavi ndava ya mambu goha geavakitili Bambu Chapanga ndava ya Daudi mtumisi waki pamonga na vandu vaki wa Vaisilaeli.