1 Naboti wa kumuji wa Yezileeli avili na mgunda wa mizabibu papipi na nyumba ya chinkosi ya Ahabu nkosi wa ku Samalia. 2 Ahabu akamujovela Naboti, "Nipela mgunda waku wa mizabibu niukita kuvya lidimba la makolo muni livi papipi na nyumba yangu ya chinkosi. Pahala paki yati nikukupela mgunda wungi wa mizabibu wabwina neju, amala ngati ugana yati nikukupela mashonga geuwona giganikiwa ndava ya mgunda waku."

3 Nambu Naboti akamuyangula, "Mgunda wenuwu nipatili kuhuma kwa vadadi vangu kuvya uhali wa nene, Bambu Chapanga anibesayi kukupela veve!"

4 Penapo Ahabu akahamba munyumba kuni avii ngolongondi na ligoga ndava ya gala geayangwili Naboti mundu wa ku Yezileeli, geajovili, "Yati nikukupela lepi uhali wenipewili na vadadi vangu." Akajigoneka panani ya chitanda chaki, na kung'anamukila ku luwumba pamihu na kubela kulya. 5 Yezebeli mdala waki akayingila mugati na akamukota, "Ndava ya kyani uvii ngolongondi naha? Na ndava kyani uganili lepi kulya?"

6 Akamuyangula, "Ndava muni namujovili Naboti, wa ku Yezileeli, ‘Nigulisilayi mgunda waku wa mizabibu, amala ngati ugana yati nikukupela mgunda wungi wa mizabibu pahala paki.’ Nambu akajova, ‘Yati nikukupela lepi mgunda wangu wa mizabibu.’"

7 Yezebeli mdala waki akajova, "Chenichi ndi cheukita, na veve ndi wankosi wa pa Isilaeli poha? Yinuka ulya! Sangalukayi. Yati nikukupela mgunda wa mizabibu wa Naboti mundu wa ku Yezileeli."

8 Penapo Yezebeli mdala wa Ahabu akayandika balua kwa liina la Ahabu, akavika na minemu ya chinkosi panani ya balua zenizo, akazipeleka kwa vagogo na kwa vandu vevana cheu vevitama mu muji umonga na Naboti. 9 Mubalua zenizo ayandiki, "Mukokosayi ligono la kujiinisa kulya, muvakemela vandu pamonga na mukamtamika Naboti pandu pepana utopesa pagati ya vandu. 10 Nambu mumtamikayi na vandu vavili vahakahu vevakumkupakisila kuvya Naboti amuligili Chapanga na nkosi kangi atolewayi kuvala ya muji na mukambunayi kwa maganga afwayi."

11 Penapo vagogo na vandu vevana cheo vevatamili pamonga na Naboti pamuji wa Yezeleeli vakakita ngati Yezebeli chealagisi mubalua yeavayandikili. 12 Vakakokosa ligono la kujihinisa kulya, vakavakemela vandu pamonga na vakamutamika Naboti pandu pepana utopesa pagati ya vandu. 13 Kangi vandu vavili vahakahu vevakumkupakisila vakabwela kutama papipi nayu, na venavo vakaleta matakilu gahakahu kumvala Naboti palongolo ya vandu, vakajova, "Naboti amuligili Chapanga na nkosi." Penapo vakamuhumisa kuvalaya muji vakamtova kwa maganga mbaka akafwa. 14 Kangi vakatuma ujumbi kwa Yezebeli, kujova, "Naboti abuniwi maganga mbaka afwili."

15 Bahopo Yezebeli peayuwini kuvya Naboti abuniwi maganga mbaka afwili, akamujovela Ahabu, "Naboti afwili! Yima uhamba ukautolayi mgunda wula wa mizabibu weabelili kukugulisila." 16 Ahabu peayuwini kuvya Naboti afwili, akayinuka na akahelela kuhamba kuutola mgunda wa mizabibu wa Naboti.

17 Kangi Bambu Chapanga akamjovela mlota Eliya wa kuhuma ku Tishibi, 18 "Helela ukakonganeka na Ahabu nkosi wa ku Isilaeli, mweitama ku Samalia, hinu avii mu mgunda wa mizabibu wa Naboti, weahambi kuutola. 19 Umujovela, ‘Bambu Chapanga ijova naha, Wu, umkomili lepi mundu na kutola vindu vyaki?’ Kangi umjovela, ‘Chenichi ndi cheijova Bambu Chapanga, Pandu mabwa pegalambili ngasi ya Naboti, ndi bahopo mabwa yati gilamba ngasi yaku.’ "

20 Ahabu peamuwene Eliya ndi akamjovela, "Ndava yeniyo ndi unipatili veve mweuvii wa likoko vangu!"

Eliya akayangula, "Ena! Nikupatili muni uhamwili wamwene kumbudila Bambu Chapanga.

21 Hinu Bambu Chapanga ijova naha, ‘Yati nikukuletela mang'aiso na kukukomakesa veve na kila mgosi wa munyumba yaku akavya mvanda amala wa mundu mweangavya mvanda. 22 Yati nikuyikita nyumba yaku yivya ngati yila ya Yeloboamu mwana wa Nebati na yila ya Baasha mwana wa Ahiya, muni uniyomisi ndava muni ukiti Vaisilaeli vanibudila.’ 23 Kangi ndava ya Yezebeli, Bambu Chapanga ijova, ‘Mabwa yati gakumulya Yezebeli papipi na luwumba lwa Yezileeli.’ 24 Mabwa yati gakumulya mundu yoyoha wa munyumba ya Ahabu mweifwilila kubomani, na vala vevifwilila kumigunda yati vidonyolewa na videge."

25 Katu pahumalili lepi na mundu mweabudili neju ngati Ahabu, mweahamwili kumbudila Bambu Chapanga, kwa kukulukiswa na Yezebeli mdala waki. 26 Akitili uhakahu neju kwa kufugamila michapanga ya vimong'omong'o, ngati Vaamoli. Vaamoli venava ndi vandu vevavingiwi na Bambu Chapanga pala Vaisilaeli pevahikili pa mulima wenuwo.

27 Ahabu peayuwini genago, akapapula nyula zaki, akawala nyula za magunila na akajihinisa kulya. Akagona na akajigubika nyula za magunila, na kuhamba kuni na kula cha ungolongondi.

28 Kangi Bambu Chapanga akamjovela mlota Eliya wa kuhuma ku Tishibi, 29 "Ulolili Ahabu cheajivikili ngolongondi palongolo yangu? Ndava muni ajihelisi mwene, yati nileta lepi gahakahu aga lukumbi lweavii mumi, nambu yati nikugaleta lukumbi mwana waki peitalalilayi na kukomakesa vandu va munyumba yaki."