1 Lukumbi lwenulo, Abiya mwana wa nkosi Yeloboamu alwalayi. 2 Yeloboamu akamujovela mdala waki, "Wala nyula zingi muni ukoto kumanyikana kuvya veve wamdala wangu na uhambayi ku Shilo kweitama mlota Ahiya, mweajovili kuvya yati nivya nkosi wa pa Isilaeli. 3 Mpelekelayi mabumunda kumi pamonga na mambama, na wuchi libotolo limonga. Kamkota na akujovelayi gegakumuhumalila mwana witu."

4 Ndi mdala wa Yeloboamu akawuka na kuhamba kunyumba ya Ahiya ku muji wa Shilo. Lukumbi lwenulo, Ahiya ahotolayi lepi kulola bwina ndava ya ugogolo. 5 Bambu Chapanga amalili kumujovela Ahiya kuvya mdala wa Yeloboamu avii munjila ibwela kukukota kuvala mwana waki mtamu na goki gegakumkolelayi. Na Bambu Chapanga akamjovela Ahiya malovi geakumyangula mdala wa Yeloboamu.

Mdala wa Yeloboamu peahikili, akajikita kuvya mundu yungi.

6 Ahiya peayuwini chigigi chiyingila pamulyangu, akajova, "Yingila mugati mudala wa Yeloboamu. Nambu ndava kyani ukujikita kuvya wamundu yungu? Nivii na ukokoso wewangavya wabwina kwaku. 7 Hamba ukamujovela Yeloboamu kuvya, Bambu Chapanga, Chapanga wa Isilaeli, ijova naha, ‘Nakuhagwili pagati ya vanndu, na kukukita uvyayi wa chilongosi wa vandu vangu va Isilaeli. 8 Nikaupapula unkosi uwuka kwa viveleku vya Daudi, nikakupela veve. Nambu veve uvii lepi ngati muhengaji wangu Daudi mweakamwili malagizu gangu, akakita genigana kwa mtima waki woha na kukita gegiganikiwa palongolo ya mihu gangu. 9 Veve uhengili uhakau uvaha neju kuliku vankosi voha vevakulongolili. Veve uniyomisi kwa kutengeneza michapanga hingi na himong'omong'o ya lufumbu kwa zahabu, kangi unilekili. 10 Ndava ya lenili, yati nikuvaletela mang'aisu vandu va mu nyumba ya Yeloboamu, yati nikuvakoma vagosi voha va Isilaeli vevavii pamonga naku, mweavii mvanda amala mweangavya mvanda. Yati nikuvawusa vandu voha va Yeloboamu ngati mundu chaiyola mai mbaka gamalika. 11 Mlongo yoyoha wa Yeloboamu mweifwililayi pabomani, mabwa yati gakumlya, na yoyoha mweifwililayi kumigunda, hidege yati hikumuhonyola. Nene ndi Bambu Chapanga nijovili.’ "

12 Ahiya akamjovela mdala wa Yeloboamu, "Hinu yinukayi uwuya ku nyumba yaku. Peuyingilayi ndu mu muji, msongolo waku yati ifwa. 13 Vandu voha yati vikita malilu na kumzika. Nambu nga yuyo ndu wa lukolo lwa Yeloboamu ndi mweizikwa, muni mwene ndu mu lukolo lwa Yeloboamu ndi Bambu Chapanga, Chapanga wa Isilaeli achiweni chindu chabwina kuhuma kwaki. 14 Kangi lelu iyi, Bambu Chapanga yati ivika nkosi yungi pa Isilaeli mweakuvakoma vandu va lukolo lwa Yeloboamu tangiya hinu. 15 Bambu Chapanga yati akuvabuna vandu va Isilaeli, na vene yati vinyugusika ngati linyahi chelinyuguswa kumfuleni. Yati akuvawusa pa mulima uwu wabwina weavapelili vagogo vavi, na kuvapechengana kutali, kumwambu ya mfuleni Efulati, muni vamuyomisi Bambu Chapanga kwa kujitengenezela vimong'omong'o vya Ashela mchapanga wa chidala. 16 Bambu Chapanga yati akuutaga mulima wa Isilaeli ndava ya kuhoka kwa Yeloboamu na kuvakita vandu va isilaeli vamubudila Chapanga."

17 Penapo mdala wa Yeloboamu akawuka, na kuwuya ku Tiliza. Nambu peahikili ndu pamulyangu, mwana waki akafwa. 18 Vandu voha va Isilaeli vakamzika msongolo yula na kukita malilu ngati cheajovili Bambu Chapanga kupitila mlota Ahiya, muhengaji waki.

19 Mahengu gangi ga nkosi Yeloboamu, cheakomini ngondo na cheatalalili, goha gayandikwi mu Chitabu cha Ukumbuso wa Vankosi va Isilaeli. 20 Yeloboamu atalalili Isilaeli kwa lukumbi lwa miyaka ishilini na hivili, ndi akafwa na kuzikwa, na Nadabu mwana waki akavya nkosi wa Isilaeli.

21 Lehobohamu mwana wa Solomoni avili na miyaka alubaini na umonga lukumbi peatumbwili kutalalila pa Yuda. Na mwene atalalili kwa lukumbi lwa miyaka kumi na saba pa Yelusalemu, mulima wewahaguliwi na Bambu Chapanga pagati ya miji yoha ya makabila ga Isilaeli ndava vamuyupilayi mwenumo. Nyina waki Lehoboamu avili Naama kuhuma kwa Vaamoni.

22 Vandu va ku Yuda vahengili gahakahu palongolo ya Bambu Chapanga. Vamuyomisi kwa uhakahu wavi wavahengili wamahele kuliku wavahengili vagogo vavi. 23 Vajitenganizili mewa pandu pa kuwusila luteta na pandu pa kufugamilila michapanga hingi, na mapanda ga maganga na vimong'omong'o vya Ashela, kunani ya kila chitumbi chitali na pahi ya kila chikongo chivaha. 24 Kangi kwavili na fugama za ukemi kila pandu, vagosi na vadala vakitili mambu ga kuyomesa gegakitiki na vandu va milima hila yevavingiwi na Bambu Chapanga lukumbi Vaisilaeli pevayingilayi ku Kanaani.

25 Mumwaka wa muhanu wa utalalila wa Lehoboamu, Shishaki nkosi wa ku Misili, akauzangila muji wa Yelusalemu, 26 Akavitola vindu vyoha vyevivikiwi chibana munyumba ya kumfugamilila Bambu Chapanga na vya munyumba ya chinkosi. Akatola vindu vyoha, pamonga na vingwamba vya zahabu vyevitenganizi na Solomoni. 27 Pahala pa vingwamba vyenivyo, nkosi Lehoboamu akatengeneza vingwamba vya shaba na kuvivika viyangaliwayi na valonda va panyumba ya chinkosi. 28 Lukumbi lwoha nkosi peahambayi ku Nyumba ya Chapanga, valonda vagegayi vingwamba vyenivyo ndava ya kujidivalila, na mwanakandahi vavikiliwusayi pandu pa kuviyangalila.

29 Matendu gangi ga utalalila wa nkosi Lehoboamu na goha geahengili gayandikwi mu Chitabu cha Ukumbuso wa Vankosi va Yuda. 30 Lukumbi lwoha kwavili na ngondo pagati ya Lehoboamu na Yeloboamu. 31 Lehoboamu akafwa na akazikwa pamatinda ga vagogo vaki, kumuji wa Daudi nyina waki akemiwi Naama msikana wa Maaka. Abiya mwana waki akavya nkosi pahala paki.