1 Penapo Lehoboamu akahamba ku Shekemu kwevakonganiki Vaisilaeli voha muni vamkita Lehoboamu avyayi nkosi. 2 Lukumbi lwenulo Yeloboamu mwana wa Nebati avili akona ku Misili tangia cheahambili peamutilayi Solomoni. Yeloboamu peayuwini genago akakiliwuka kuhuma ku Misili. 3 Nambu Vaisilaeli vakatuma ujumbi kumukemela Yelobohamu, kangi mwene pamonga na Vaisilaeli voha vakamuhambila Lehoboamu na kumujovela, 4 "Dadi waku Solomoni atihengisi mahengu geginonopa. Hinu tikukuyupa utipunguzilayi mahengu aga geginonopa, na tete yati tikukuhengela."

5 Lehoboamu akavajovela, "Muhambayi mukatama magono gadatu na muniwuyilayi kavili." Ndi vandu venavo vakahamba.

6 Mwanakandahi Lehoboamu akagana kulongela na vagogo vevamuhengili Solomoni dadi waki lukumbi peavili mumi, ndi akavakota, "Mukunishauli nivayangula kyani vandu venava?"

7 Vagogo vakamuyangula, "Lelu ukayidakilayi kuvya mkulu wabwina wa vandu ava, ukalongelayi navu mbolimboli na ukavapelayi cheviyupa, ndi yati vivya vahengaji vaku vasadikika magono goha."

8 Lehoboamu akavevesa liyangulo la vagogo, nambu akavakota vasongolo va ntanga yaki vevamuhengelayi na akagahengela lihengu mayangulo gavi. 9 Akavakota, "Nyenye mwijova tivayangulayi wuli vandu ava vevanijovili nivapunguzilayi lihengu levapewili na dadi wangu?"

10 Vasongolo venavo vakamuyangula, "Vandu venavo vevakujovili dadi waku avapelili mahengu geginonopa, vakakuyupa uvapunguzilayi mahengu genago, veve uvajovelayi naha, ‘Lungonji lwangu lweluvii ludebe ndi lukulupalili kuliku chiunu cha dadi wangu. 11 Dadi wangu avapelili mahengu geginonopa, nambu nene yati nikuvapela mahengu geginonopa neju. Dadi wangu avatovili kwa ndonga, nambu nene yati nikuvatova kwa ndonga yeyina minga!’"

12 Ndi ligono la datu Yeloboamu pamonga na vandu voha vakakiliwuka kwa Lehoboamu ngati cheavajovili. 13 Nkosi akavevesa malovi geapewili na vagogo, akavayangula vandu venavo cha kuvalakalila. 14 Akalanda malovi ga vasongolo vayaki, akavajovela, "Dadi wangu avapelili mahengu geginonopa, nambu nene yati nikuvapela mahengu geginonopa neju. Dadi wangu avatovili kwa ndonga, nambu nene yati nikuvatova kwa ndonga yeyinaminga." 15 Bambu Chapanga amkitili nkosi akoto kuvayuwanila vandu venavo muni atimilisa linenu leamjovili Yeloboamu mwana wa Nebati kwa njila ya Ahiya wa ku Shiloni.

16 Nambu vandu voha va Isilaeli pevaweni kuvya nkosi abelili kuvayuwanila, vakaywanga na kumjovela, "Tivii lepi pamonga na Daudi mewa tina uhali lepi kuhuma kwa mwenuyo mwana wa Yese. Muwuya kunyumba nyenye mwavandu va Isilaeli! Veve chiveleku cha Daudi uyiyungayi nyumba yaku wamwene."

Penapo ndi vandu va Isilaeli vawuya kunyumba zavi.

17 Nambu vandu va Isilaeli vevatamayi ku miji wa Yuda, ndi venavo ndu vevasigalili muutalalila wa Lehoboamu.

18 Nkosi Lehoboamu amutumili Adolamu, mweavili kolokoloni mkulu wa mumahengu ga kung'ang'anisa ahamba kwa vandu voha va Isilaeli, nambu vakamutova maganga, vakamukoma. Na mwene Lehoboamu akakwela mutuka yaki ya kuhutwa na falasi, akatilalila ku Yelusalemu. 19 Tangia penapo vandu va Isilaeli vitama cha umakoko na lukolo lwa Daudi mbaka lelu.

20 Vandu voha va pa Isilaeli pevayuwini kuvya Yeloboamu awuyili kuhuma ku Misili, vakamukemela palibanji la vandu voha, vakamukita avyayi nkosi wa pa Isilaeli poha. Kawaka likabila lelajiwungili na lukolo lwa Daudi nambu nga likabila la Yuda.

21 Lehobohamu peahikili pa Yelusalemu, akavakonganesa manjolinjoli vakekesi va makabila ga Yuda na Benjamini laki yimonga na elufu semanini, ndava ya kutovana na ulongosi wa pa Isilaeli, muni ahotolayi kuuwuyisa kangi unkosi kwa mwene Lehoboamu, mwana wa Solomoni. 22 Nambu Bambu Chapanga akalongela na mlota Shemaya, 23 na kumujovela, "Mjovela Lehoboamu mwana wa Solomoni, nkosi wa Yuda, na vandu voha va likabila la Yuda na la Benjamini, 24 kuvya nene Bambu Chapanga nijova naha, ‘Mkotoka kuhamba, na mkotoka kutovana na valongo vinu, vandu va pa Isilaeli. Muwuyayi kila mundu ahamba kunyumba yaki, muni goha gegahumalili ndi gahumalili kwa kugana kwangu.’ " Ndi vakaulanda ujumbi uwu wa Bambu Chapanga, vakawuya kavili kunyumba, ngati chevalagizwi na Bambu Chapanga.

25 Mwanakandahi nkosi Yeloboamu akajenga kangi muji wa Shekemu. Muji wenuwu uvi ku mlima wa hitumbi ya Efulaimu, akatama kwenuko. Kangi akawuka na akahamba kujenga muji wa Penueli. 26 Yeloboamu akaholalela mumutima waki, "Hinu yihotoleka unkosi yati uwuya mu nyumba ya Daudi, 27 muni vandu ava yati viyendelela kuhamba kuwusa luteta kwa Bambu Chapanga ku Yelusalemu. Mitima yavi yati hikumuwuyila Lehoboamu bambu wavi nkosi wa ku Yuda, na vene yati vakunikoma nene."

28 Ndi pealongili na vandu vangi, akatengeneza himong'omong'o hivili ya mipapakasi ya ng'ombi yeyitenganizwi kwa zahabu. Kangi akavajovela vandu, "Nyenye mwavandu va Isilaeli, yeniyi ndi michapanga yinu yeyavawusili ku Misili! Kawaka chindu cha kutikita tihamba ku Yelusalemu tikawusa teta." 29 Chimong'omong'o chimonga cha zahabu akachivika ku muji wa Beteli na chingi akachivika ku muji wa Dani. 30 Hinu vandu vamubudili Bambu Chapanga muni vahambili kuifugamila michapanga yeniyo ku Beteli na ku Dani. 31 Mewawa Yeloboamu akajenga pandu pa kufugamilila kuhitumbi, akahagula vamteta kuhuma muvandu va namuna yoha, nambu lepi kuhuma kwa Valawi.

32 Yeloboamu mewa akalagisa ligono la kumi na muhanu la mwehi wa nane uvya mselebuko ngati mselebuko wula wewakitikayi ku Yuda. Awusili teta ku pandu pa kuwusila teta peajengili ku Beteli palongolo ya hila himong'omong'o hivili ya mipapakasi yeahitenganizi, akavavika vamteta veavahagwili vala vahengelayi kila pandu pa kuwusila teta peatenganizi. 33 Ligono lenilo la kumi na muhanu la mwehi wa nane, lealihagwili mwene, akahamba ku Beteli kuwusa teta ku pandu peapatenganizi. Chenicho ndi cheakitili mselebuko wenuwo weauvikili ndava ya vandu va Isilaeli, na mwene akakwela kuhamba ku pandu pa kuwusila teta, na kuhukisa ubani.