1 Pegapitili magono gamahele, mumwaka wa datu tangia fula peyalekili kutonya, Bambu Chapanga akamujovela Eliya, kujova, "Hamba ukajilangisayi kwa nkosi Ahabu, penapo na nene yati nitonyesa fula." 2 Ndi Eliya akahamba kujilangisa kwa Ahabu. Lukumbi lwenulo kwavili na njala neju ku Samalia.

3 Mwene Ahabu akamkemela Obadia myimamila wa nyumba ya chinkosi. Obadia avili mundu mweakumfugamila neju Chapanga. 4 Lukumbi Yezebeli peavakomili vamlota va Bambu Chapanga, Obadia avatolili vamlota miya yimonga akavahiha mumagodi gavili na kila ligodi vamlota amusini, avapelekelayi chakulya na manji. 5 Kangi Ahabu akamujovela Obadia, hamba ukalondayi pepavii na vikapela na pepavii na vinyepa mugati ya mulima wuwuwu, "Pangi yati tipata manyahi na penapo yati tikuhisangula falasi na punda falasi zitu." 6 Ndi vakagavana ndima yevaganayi kulonda manyahi, Ahabu akahamba upandi umonga na Obadia akahamba kuupandi wungi.

7 Lukumbi Obadia peavili munjila, akakonganeka na Eliya. Obadia akamumanya kuvya ndi Eliya akamugundamila mbaka pahi na kumkota, "Wu, ndi chakaka kuvya veve wa bambu wangu Eliya?"

8 Eliya akamuyangula, "Ena, ndi nene, hamba ukamujovela bambu waku Ahabu kuvya, ‘Nene Eliya avii baha.’"

9 Obadia akamukota, "Wu, nibudi kyani, mbaka ugana nene nikomiwa na Ahabu? 10 Nilapa kwa Bambu Chapanga, Chapanga waku mweavii mumi, nkosi avatumili vandu vakulondayi mumilima yoha. Lukumbi lwoha nkosi amala vandu va mulima nunuyu vakajovayi timuweni lepi kuni Ahabu avakitili valapayi kuvya chakaka vakuweni lepi. 11 Na veve hinu ukunijovela nihamba kwa bambu wangu nikamujovelayi kuvya veve uvii apa! 12 Na nene nimanyili lepi Mpungu wa Bambu Chapanga kweakupeleka nene paniwuka pandu penapa. Nikahamba na kumjovela Ahabu kuvya veve uvi penapa akabwelayi na kubela kukukolela yati akunikoma. Pamonga na naha nene namuhengaji waku nimufugamili Bambu Chapanga tangia usongolo wangu. 13 Wu, wayuwini lepi kuvya nakitili kiki lukumbi Yezebeli peakomayi vamlota va Bambu Chapanga? Navahihili vamlota va Bambu Chapanga miya yimonga mumalindi gavili, hamusini mukila lilindi, na nene navapelekelayi chakulya na manji. 14 Hinu veve ukunijovela nihambayi kwa bambu wangu nikamujovela, ‘Eliya avii apa.’ Mwene yati akunikoma!"

15 Eliya akajova, "Nikulapila kwa Bambu Chapanga Mweavi na Makakala, mwene mwenikumuhengela, chakaka lelu yati nikujilangisa kwa Ahabu."

16 Ndi Obadia akahamba kukonganeka na Ahabu na kumujovela kuvya Eliya awonikini, na mwene Ahabu akahamba kukonganeka na Eliya. 17 Ahabu peamuweni Eliya ndi akamujovela, "Wu, veve ndi mweukuvang'aha Vaisilaeli?"

18 Eliya akamuyangula, "Pehe! nene lepi mwenikuvang'aha Vaisilaeli. Nambu veve na vandu va dadi waku ndi mwemukitili chenicho. Mugalekili malagizu ga Bambu Chapanga na mukalanda michapanga Mabaali. 19 Hinu vakemelayi vandu kuhuma pa Isilaeli yoha tikonganekayi pa chitumbi Kalimeli. Mewawa na veve uvaletayi vamlota va mchapanga Baali miya mcheche na hamusini na venavo vamlota va mchapanga wa chidala mweikemiwa Asheli miya mcheche, vevilya chakulya pamonga na Malikia Yezebeli."

20 Penapo ndi Ahabu akatuma ujumbi vakemelewayi vandu pa Isilaeli yoha pamonga na vamlota venavo panani ya chitumbi Kalimeli. 21 Eliya akayima palongolo ya vandu na kuvajovela, "Ndali yati muhamula kuvya yani ndi Chapanga winu? Yikavyayi Bambu Chapanga ndi Chapanga winu, mumulandayi mwenuyo nambu yikavyayi Baali ndi Chapanga winu, ndi mumulanda mwene." Nambu vandu vayangwili lepi chindu. 22 Kangi Eliya akavajovela, "Ndi nene ndu namlota wa Bambu Chapanga mwenisigalili, nambu vamlota va mchapanga Baali vavii miya mcheche na hamusini. 23 Muleta ng'ombi zigosi zivili. Na vene vajihagulila ng'ombi yimonga, vayihinja na kuyidumula hipandi hipandi na vavika panani ya sagala nambu vakotoka kupambika motu. Na nene yati nikuyitendekela yeyisigalili na kuyivika panani ya sagala, mewa yati nipambika lepi motu. 24 Kangi mulikemelayi liina la bambu chapanga winu, na nene yati nikulikemela liina la Bambu Chapanga wangu, yula mweiyangulayi kwa motu, mwenuyo ndi Chapanga."

Kangi vandu voha vakajova, "Laujovili ili ndi labwina."

25 Eliya akavajovela vamlota va mchapanga Baali, "Muhagulayi ng'ombi yigosi yimonga pagati ya ihii hivili na mutumbula nyenye kuyitendekeha, muni nyenye muvi mwavamahele neju. Mumkemela chapanga winu nambu mukotoka kupambika motu."

26 Hinu vamlota va mchapanga Baali vakahagula ng'ombi yigosi yimonga na kuyitendekela.

Kangi vakatumbula kumkemela mchapanga Baali tangia lukela mbaka chimihi, kuni vihumbahumba na kutindila pandu pa kuwusila teta kuni vijova, "Vee Baali utiyangulayi!" Nambu mchapanga Baali avayangwili lepi chindu.

27 Lukumbi lwa muhi, Eliya akatumbula kuvavevesa, kuni ijova, "Mkwesa lwami neju! Chakaka mwene ndi chapanga! Pangi avii mumaholo geginonopa, amala ahambili kutunda, amala ahambi pandu. Pangi agonili lugono lyoo, na mwene yiganikiwa ayimuswayi." 28 Penapo ndi vakayongesa lwami na ngati cheyivili mivelu yavi, vakajidumudumula kwa kutumila hipula na hijembe, mbaka ngasi zikavahulula. 29 Vakayendelela kumkemela mchapanga Baali mbaka muhi lukumbi lwa kuwusa teta, nambu kawaka mweavayangwili na chahumalili lepi chindu chochoha.

30 Kangi Eliya akavajovela vandu voha, "Munihegelela nene papipi." Vandu voha vakamuhegelela, na mwene akatendekeha pandu pa kuwusila teta pa Bambu Chapanga, pala pepadenyiwi. 31 Eliya akatola maganga kumi na gavili, kila liganga limonga ndava ya likabila limonga la vana va Yakobo. Bambu Chapanga amjovili Yakobo, "Liina laku yati ukemiwa Isilaeli." 32 Kwa kutumila maganga genago akajenga pandu pa kuwusila luteta lwa Bambu Chapanga, na akagima mfeleji kutindila pandu penapo pepana uvaha wa kuyingila manji lita kumi na mcheche. 33 Akapanga sagala pandu pa kuwusila teta, akayidumula ng'ombi yila hipandi hipandi na akavipanga panani ya sagala. Kangi akavajovela, "Mmemesa manji mumapipa mcheche na mugayitayi panani ya sagala na panani ya teta." 34 Akavajovela, "Mukita chenicho kavili." Na vene vakakita chenicho kavili. Akalagisa, "Mukitayi kwa mala ya datu." Na vene vakakita chenicho kwa mala ya datu. 35 Manji gagendili pahi kutindila pandu pa kuwusila luteta na kuumemesa mfeleji.

36 Lukumbi lwa kuwusa teta ya muhi, mlota Eliya akahegelela palongolo ya pandu pa kuwusila teta na kuyupa, kuni ijova, "Veve Bambu Chapanga, Chapanga wa vadadi vitu Ibulahimu na Isaka na Isilaeli, yimanyikanayi lelu kuvya veve ndi wa Chapanga pagati ya Isilaeli na ya kuvya nene ndi namuhengaji waku na nihengili mambu aga goha ndava unilagizi nikita chenicho. 37 Uniyangulayi nene, veve Bambu Chapanga, niyangulayi nene, ndava vandu ava vamanyayi kuvya veve ndi Bambu Chapanga, na kuvya ukuying'anamusa mitima yavi hikuwuyilayi kavili."

38 Penapo Bambu Chapanga akahelesa motu na kuyitinyisa teta yila na sagala zila na maganga gala na ludaka lula na mewa ukayumisa manji gala gegavili mumfeleji. 39 Vandu voha pevaliweni lenili, vakagwa cha kukupama na kuvemba, "Bambu Chapanga, mwene ndi Chapanga! Bambu Chapanga mwene ndi Chapanga!"

40 Kangi Eliya akavalagiza vandu, "Muvakamulayi vamulota voha va mchapanga Baali. Mukotoka kumuleka hati mumonga atoloka!" Vakavakamula, na mwene Eliya akavaleta mbaka pa kapela ka Kishoni na kuvahinja kwenuko.

41 Eliya akamujovela Ahabu, "Hamba ukalyayi na kunywa, muni kuvii na lwami lwa hula yamahele." 42 Penapo Ahabu akawuka na kuhamba kulya na kunywa. Nambu Eliya akakwela kuchituvilu cha chitumbi Kalimeli, akafugama na kugundama mbaka pahi, mutu waki akauvika pagati ya mafugamilu gaki. 43 Akamujovela muhengaji waki, "Hamba ukalola kuupandi wa nyanja." Muhengaji yula akahamba na kulola.

Akajova, "Kawaka chindu kwenuko."

Eliya amtumili mtumisi waki mala saba, akajova, "Hamba kalolayi."

44 Muhengaji waki peahambili mala ya saba, akabwela na kumujovela, "Lihundi lidebe ngati chiwoko cha mundu likwela lihumila kunyanja."

Eliya akajova, "Hamba ukamujovela Ahabu, ‘Atendekeha mutuka yaki ya ngondo ya kuhutwa na falasi ahelelayi kwakona hula yangakudivalila.’"

45 Lukumbi lulalula kunani kukavya na lihundi la fula, kukavya na mpungu na hula yivaha yikatonya, na mwene Ahabu akakwela mutuka yaki ya ngondo ya kuhutwa na falasi na kuhamba ku Yezileeli. 46 Makakala ga Bambu Chapanga gakamuyingila Eliya, na mwene akakangamala, akakunga bwina nyula yaki, akajumba palongolo ya mutuka ya ngondo yakuhutwa na falasi ya Ahabu munjila yoha mbaka pevahikili pa kuyingalila mu Yezileeli.