1 Linenu la Bambu Chapanga likamubwelela Yehu mwana wa Hanani, muni amjovela Baasha kuvya, 2 "Veve Baasha wavili mundu wangamanyikana, nakuyinwili na kukukita uvya chilongosi wa vandu vangu va Isilaeli. Veve umuyigili Yeloboamu, ukavakita vandu vangu va Isilaeli vakitayi gahakahu na kuniyomesa kwa kubuda kwavi. 3 Hinu yati nikukukomakesa veve pamonga na valongo vaku voha, yati nikuvakitila vandu vaku ngati chenavakitili vandu va Yeloboamu mwana wa Nebati. 4 Mundu yoyoha pagati ya valongo vaku mweifwilila kubomani, mabwa yati gakumulya, na yoyoha mweifwilila ku mugunda yati ihonyolewa na videge."

5 Matendu gangi goha geahengili Baasha pamonga na ukekesi waki, gayandikwi mu Chitabu cha Ukumbuso cha Vankosi va Isilaeli. 6 Baasha akafwa akazikwa ku Tiliza. Ela mwana waki akavya nkosi pahala paki.

7 Linenu la Chapanga likamubwelela kavili Baasha pamonga na vandu vaki kupitila mlota Yehu mwana wa Hanani, ndava ya uhakahu weamkitili Bambu Chapanga. Baasha akamuyomesa Bambu Chapanga ndava ya mambu gaki, muni akitili uhakau ngati cheakitili Yeloboamu na ndava ya kuvakoma vandu voha va munyumba ya Yeloboamu.

8 Mumwaka wa ishilini na sita wa utalalila wa Asa nkosi wa ku Yuda, Ela mwana wa Baasha, atumbwili kutalalila ku Isilaeli kuni itama ku Tiliza kwa lukumbi lwa miyaka hivili. 9 Zimli mweavili muhengaji waki mweayimamila yapinga ya mutuka za ngondo za kuhutwa na falasi za nkosi, akakita mpangu uhakahu wa kumukoma Ela. Ligono limonga Ela avili ku Tiliza, anywayi na kugala munyumba ya Alisa. Alisa avili muyimamila wa nyumba ya chinkosi. 10 Zimli akayingila mugati akamukoma Ela. Kangi Zimli akatalalila pahala paki Ela. Genago gahumalili mu mwaka wa isilini na saba wa utalalila wa Asa nkosi wa ku Yuda.

11 Peatumbwili ndu kutalalila, Zimli avakomili vandu voha va Baasha, amulekili lepi hati mugosi mumonga pagati ya vandu vaki, hati ngati avi mlongo amala mkozi wa Baasha. 12 Penapo Zimli akavakoma vandu voha va Baasha, ngati Bambu Chapanga cheamjovili Baasha kupitila mlota Yehu. 13 Mambu genago gahengiki ndava ya uhakahu weahengili Baasha na Ela mwana waki. Vamuyomisi Bambu Chapanga, Chapanga wa Isilaeli, kwa kukita gahakahu na kuvakita vadu va Isilaeli vakitayi gahakahu ndava ya kuifugamila michapanga ya himong'omong'o yavi. 14 Matendu gangi goha geahengili Ela mu utalalila waki, gayandikwi mu Chitabu cha Ukumbuso cha Vankosi va Isilaeli.

15 Mumwaka wa ishilini na saba wa utalalila wa Asa nkosi wa ku Yuda, Zimli atumbwili kutalalila ku Isilaeli kuni itama ku Tiliza, atalalili kwa lukumbi lwa magono saba. Lukumbi lwenulo manjolinjoli va Isilaeli vavikili kambi kuutindila muji wa Gibetoni wa Vafilisiti. 16 Manjolinjoli va Isilaeli pevayuwini kuvya Zimli akitili mpangu na akamukoma nkosi, ndi voha vakamunyambisa Omili mweavili chilongosi wa manjolinjoli, avya nkosi ligono lilolo. 17 Penapo Omili pamonga na manjolinjoli vaki vakawuka ku Gibetoni, vakahamba kuuzangila muji wa Tiliza. 18 Zimli peaweni kuvya muji uzangiwi, akayingila mu chumba cha mugati cha munyumba ya chinkosi, akayiyocha motu na mwene akafwilila mumo. 19 Yakitiki chenicho ndava ya uhakahu weamkitili Bambu Chapanga, muni akitili uhakau ngati cheakitili Yeloboamu na kuvakita vandu va Isilaeli vakita uhakahu. 20 Matendu gangi goha geahengili Zimli na mpangu weakitili, gayandikwi mu Chitabu cha Ukumbuso cha Vankosi va Isilaeli.

21 Penapo vandu va pa Isilaeli vakajigava vakavya misambi hivili, msambi umonga ukagana Tibini mwana wa Ginati avya nkosi na msambi wungi ukagana Omili ayendelelayi kuvya nkosi. 22 Nambu ukahotola msambi wewaganili Omili avya nkosi, muni wavili na makakala neju kuliku vala vevaganayi Tibini mwana wa Ginati avya nkosi, Tibini akafwa na Omili akavya nkosi. 23 Omili akatumbula kutalalila mumwaka wa selasini na umonga wa utalalila wa Asa nkosi wa ku Yuda. Atalalili kwa lukummbi lwa miyaka kumi na hivili, miyaka sita atalalilayi kuni itama ku Tiliza. 24 Pa genago, achigulili chitumbi cha Samalia kwa hipandi elufu sita ya madini ga feza kuhuma kwa mundu mmonga mweikemiwa Shemeli, panani yaki akajenga lindanda na muji. Akaukemela muji wenuwo Samalia, ndava ya kumtopesa Shemeli mweatumbwili kutama pa chitumbi chenicho.

25 Omili ambudili Bambu Chapanga, akitili gahakahu neju kuliku vankosi voha vevamulongolili. 26 Muni akitili uhakau ngati cheakitili Yeloboamu mwana wa Nebati, akamuyomesa Bambu Chapanga, Chapanga wa Isilaeli, kwa kuvakita vandu va Isilaeli vabuda kwa kufugamila michapanga ya himong'omong'o. 27 Matendu gangi goha geakitili Omili na ukekesi waki, gayandikwi mu Chitabu cha Ukumbuso wa Vankosi va Isilaeli. 28 Omili akafwa, akazikwa ku Samalia, na Ahabu mwana waki akavya nkosi pahala paki.

29 Mu mwaka wa selasini na nane wa utalalila wa Asa nkosi wa ku Yuda, Ahabu mwana wa Omili akavya nkosi wa ku Isilaeli kwa miyaka ishilini na hivili kuni itama ku Samalia. 30 Ahabu mwana wa Omili akamkitila gahakahu Bambu Chapanga kuliku vankosi voha vevamulongolili. 31 Kangi pamonga na kukita uhakau neju ngati cheakitili Yeloboamu mwana wa Nebati, uhakahu wa Ahabu wayonjosiki neju ndava ya kumgega Yezebeli msikana wa Etibaali nkosi wa ku Sidoni, na kutumbula kuufugamila mchapanga Baali. 32 Akajenga nyumba ya kumfugamila mchapanga Baali ku Samalia, na mugati yaki ajengili pandu pa kuwusila teta. 33 Mewa atenganizi na chimong'omong'o cha Ashela mchapanga wa chidala. Ahabu akitili gahakahu gamahele kuliku vankosi voha va pa Isilaeli vevamulongolili. Ahabu akamuyomesa neju Bambu Chapanga, Chapanga wa Isilaeli. 34 Lukumbi lwa utalalila wa Ahabu, Hieli kuhuma ku Beteli, aujengili kavili muji wa Yeliko. Lukumbi lwa kuivika mikingisu ya Yeliko, Hieli akafiwa na mwana waki mgosi wa kutumbula mweikemiwa Abilamu, na lukumbi lwa kuvika mamilyangu gaki, akafiwa kangi na mwana waki mgosi wa mwishu mweikemiwa Segubu. Genago goha gahumalili kuwanangana na linenu la Bambu Chapanga lelabwelili kupitila Yoshua mwana wa Nuni.