1 Ligono limonga Yelobohamu ayimili pamuhana ya pandu pa kuwusila teta ku Beteli ndava ya kugana kuhukisa ubani. Ndi akamubwelela mundu wa Chapanga kuhuma ku Yuda agegili ujumbi wa Bambu Chapanga. 2 Mundu yula akajova chila cheajoviwi na Bambu Chapanga achijovayi, na mwene akakwesa lwami na kujova, "Veve pandu pa kuwusila teta, Bambu Chapanga ijova naha, ‘Yati ivelekewa mwana mweikemiwa Yosia kuhuma mu chiveleku cha Daudi, mwene yati akuvakoma vamteta vaviwusa luteta na kuhukisa ubani pandu penapa na majege ga vandu yati akugatinyisa panani yaku.’" 3 Mundu yula akawusa ulangisu ligono lilalila na kujova, "Wu ndi ulangisu weajovili Bambu Chapanga kuvya, pandu pa kuwusila teta yati pibomoka na malyenge gegavili panani yaki yati giyitika yati wimanya kuvya Bambu Chapanga alongili na nene."

4 Nkosi Yeloboamu peayuwini malovi genago ga mundu wa Chapanga ku Beteli ndava ya pandu pa kuwusila teta, akagololosela chiwoko chaki na kujova, "Mumkamulayi mundu mwenuyo!" Bahopo chiwoko chenicho cheachigolwisi chikagogodala, ahotwili lepi kavili kuchiwuyisa. 5 Mewa pandu pa kuwusila teta pakabomoka na malyenge gaki gakayitika pahi, ngati ulangisu weauwusili mundu wa Chapanga kwa malovi ga Bambu Chapanga. 6 Penapo nkosi Yeloboamu akamujovela mundu wa Chapanga, "Chondi, uniyupilayi kwa Bambu Chapanga, Chapanga waku, chiwoko changu chilama kavili." Na mwene mlota akamuyupa Bambu Chapanga, ndi chiwoko cha nkosi chikalama, chikavya bwina ngati pakutumbula.

7 Penapo nkosi akamujovela mundu wa Chapanga, "Tiyeni kunyumba yangu tikalyayi chakulya na nene yati nikukupela njombi ndava ya lijabu leunikitili."

8 Nambu mundu wa Chapanga akamujovela, "Hati ngati ukanipelayi yapinga ya vindu vyaku, nihamba lepi pamonga na veve. Yati nilya lepi wala kunywe manji pandu apa. 9 Muni Bambu Chapanga anilagisi nikotoka kulya chakulya wala kunywa manji, mewa nikiliwukayi kwa njila yingi, lepi yenikabwelili." 10 Na awuyili lepi kwa njila yeabwelalili pa Beteli, nambu awuyili kwa njila yingi.

11 Lukumbi lwenulo kwavili na mlota mmonga mgogolo wa pa Beteli. Vakamuhambila vana vaki na vakamukokosela mambu goha geahengili mundu wa Chapanga ligono lila, ku Beteli. Mewa vakamukokosela malovi gala mundu wa Chapanga geamujovili nkosi Yeloboamu. 12 Dadi wavi akavakota, "Awuyili kwa ndila yoki?" Na vene vakamulangisa njila yeapitili mundu wa Chapanga mweahumili ku Yuda. 13 Na mwene akavajovela vana vaki, "Munitandikilayi lipunda." Na vene vakamutandikila lipunda na gogo akakwela panani yaki. 14 Akamulanda mundu wa Chapanga yula. Akamukolela atamili pahi ya chikongo chechikemiwa mwaloni. Ndi akamukota, "Wu, veve ndi wa mundu wa Chapanga mweuhumili ku Yuda?"

Na mwene akamuyangula, "Ena, ndi nene."

15 Mlota mgogolo mwenuyo akamujovela, "Tihamba kunyumba yangu ukalya chakulya."

16 Nambu mwene akamujovela, "Nihotola lepi kuwuya pamonga na veve, wala kuyingila munyumba yaku. Nihotola lepi kulya chakulya amala kunywa manji pandu apa, 17 muni Bambu Chapanga anilagisi nikotoka kulya chakulya wala kunywa manji pandu apa, na nikotoka kukiliwuka kwa njila yenabwelalili."

18 Mlota mgogolo wa ku Beteli akamujovela, "Nene mewa namulota ngati veve, na Bambu Chapanga alongili na nene kwa njila ya vamitumu vaki va kunani akajova, ‘Mkiliwusayi mwenuyu kunyumba yaku akalya chakulya na kunywa manji.’" Nambu mlota mgogolo amukongayi muyaki.

19 Ndi mundu wa Chapanga akakiliwuka pamonga nayu, akalya chakulya na akanywa manji kwa mlota mgogolo mwenuyo. 20 Pevavili vakona vilya, linenu la Bambu Chapanga likamubwelela mlota mgogolo, 21 na mwene akamujovela kwa lwami luvaha mundu wa Chapanga mweahumi ku Yuda, "Bambu Chapanga ijova naha, ‘Veve ulekili kulanda malagizu gaki, veve walandili lepi malagizu geakupelili Bambu Chapanga, Chapanga waku. 22 Nambu ukiliwiki apa ulili chakulya na unywili manji pandu pewajoviwi ukotoka kulya chakulya wala ukotoka kunywa manji. Hinu, higa yaku yati yizikwa lepi kwevazikiwi vagogo vaku.’"

23 Pevamalili kulya, mlota mgogolo akamutendelekela lipunda mundu wa Chapanga kuhuma ku Yuda, ndi akahamba. 24 Lukumbi peahambayi, akakonganeka na lihimba munjila, likamukoma na higa yaki yikavya panjila, lipunda laki pamonga na lihimba vyayimili pamuhanna yaki. 25 Vandu pevapilitili penapo na kuyiwona higa yivii pahi panjila, na lihimba liyimili pamuhana ya higa yila, vakahamba mbaka kubomani kukokosa genago kwa vandu.

26 Mlota mgogolo yula mweamuwuyisi kuhuma mulugendu lwaki peayuwini genago, ndi akajova, "Mwenuyu ndi yulayula mundu wa Chapanga mweabelili kulanda linenu la Chapanga! Bambu Chapanga alitumili lihimba, limuzangili na kumukoma ngati cheamjovili." 27 Penapo akavajovela vana vaki, "Munitendekelayi lipunda." Na vene vakamutendelekela. 28 Mlota mgogolo yula akahamba akayikolela higa ya mundu wa Chapanga yula yivii panjila, lihimba na lipunda laki vivili pamuhana yaki, lihimba lenilo lalili lepi higa yila wala lalizangili lepi lipunda lila. 29 Penapo mlota mgogolo mwenuyo akayiwusa higa ya mundu wa Chapanga, akayivika panani ya lipunda laki, akaukiliwusa kumuji wa Beteli, kukita malilu na kumuzika. 30 Ndi akamzika mulitinda laki, mwene pamonga na mwana waki vakavembeneka ndava kufwa kwaki kuni vijova, "Yoyoo mulongo wangu! Mlongo wangu!" 31 Pevamalili kumzika, mlota mgogolo mwenuyo akavajovela vana vaki, "Nikafwayi, munizikayi mulitinda lilili leazikiwi mundu wa Chapanga, mahupa gangu gavya pamuhana ya mahupa gaki. 32 Mambu goha gealagiswi na Bambu Chapanga ndava ya pandu pa kuwusila teta ku Beteli, na pandu poha pa kuwusila teta kuhitumbi ya Samalia, chakaka yati gitimila."

33 Hati pegamali kuhumalila genago, Yeloboamu alekili lepi ubudanu waki, ayendalili kuvakita vandu vangaganikiwa vavyayi vamteta, vahengelayi pandu pa kuwusila teta kuhitumbi. Mundu yoyoha mweaganili kuvya mteta ndi amunyambisi avya mteta wa kutetela michapanga pandu pa kunani. 34 Chenicho ndi chewavili uhakahu wewavakitili vandu va lukolo lwa Yeloboamu vakomakeswayi.