1 Beni Hadadi nkosi wa ku Silia akavavika pamonga manjolinjoli vaki voha. Kuni ilandana na vankosi selasini na vevakweli falasi na mutuka za ngondo, vakahamba kuuzangila muji Samalia. 2 Akavatuma vajumbi kumuji wa Isilaeli kwa nkosi Ahabu, kujova, "Nkosi Beni Hadadi ijova naha, 3 ‘Nipela madini gaku ga feza na zahabu ndi vyangu, nipela na vadala vaku na vana vaku voha ndi vangu.’"

4 Nkosi wa Isilaeli akayangula, "Yivyayi ngati cheujova wa bambu wangu nkosi. Nene pamonga na vyoha vyenivii navyu ndi vyaku."

5 Vajumbi vala vakawuya kavili kwa Ahabu na kujova, "Chenichi ndi cheijova nkosi Benihadadi, ‘Nitumili ujumbu kujova nipela madini ga feza na zahabu na vadala vaku na vana vaku. 6 Nambu chilau lukumbi ngati ulu, yati nikuvatuma vatumisi vangu, vabwela kwaku kuyisakula nyumba yaku ya chinkosi, na nyumba za vilongosi vevavii pahi yaku. Yati vitola chochoha chabwina cheuvinachu.’"

7 Nkosi wa Isilaeli akavakemela vilongosi vagogo voha va pamulima na akavajovela, "Mulola mundu uyu cheavii na luhonda! Lukumbi peatumili apelekewayi vadala vangu na vana vangu na madini ga feza na zahabu zangu, nene namubelalili lepi."

8 Vagogo na vandu voha vakayangula, "Kotoka kumuyuwanila, na kotoka kukita cheigana."

9 Penapo Ahabu akavayangula vajumbi va Benihadadi, "Mumjovelayi bambu wangu nkosi, ‘Muhengaji waku yati nikita ndu gala gewaganili pa kutumbula, nambu ili lewigana hinu yati nihotola lepi kulikita.’"

Vajumbi vala vakawuka na kupeleka liyangulo kwa Benihadadi.

10 Benihadadi akamutumila Ahabu ujumbi uwu, kujova, "Michapanga hinikomayi ngati yati nikuyikomakesa lepi njwe muji wa Samalia, na kuleka lububu lwa kumema mumawoko ga vandu vangu vevakunilanda."

11 Nkosi Ahabu akayangula, "Mumjovela nkosi Benihadadi, ‘Linjolinjoli mweihamba kungondo akotoka kujilumba, nambu ajilumba lukumbi peiwuya kuhuma kungondo.’"

12 Benihadadi ayuwini mayangulo genago lukumbi mwene na vankosi vanywayi mulindanda lavi, ndi akavalagisa manjolinjoli vaki, "Mujitendekehayi kuuzangila muji wa Samalia." Ndi vakajitendekeha kuutova muji wenuwo.

13 Lukumbi lulalula mlota mmonga akambwelela Ahabu nkosi wa Isilaeli na kukokosa, "Chenichi ndi cheijova Bambu Chapanga, ‘Wu, uwona manjolinjoli ava chevavi vamahele? Lelu yati nikukita uvatova, na veve ndi yati umanya kuvya nene ndi Bambu Chapanga.’"

14 Ahabu akakota, "Ndi yani mweakugakita genaga?"

Mlota akamuyangula, "Bambu Chapanga ijova naha, ‘Kwa utangatila wa manjolinjoli vasongolo vevavii pahi ya vakulu va wilaya yati vikita lenili.’"

Nkosi Ahabu akakota, "Ndi yani mweitumbula ngondo?"

Mlota akamuyangula, "Veve yati utumbula."

15 Penapo nkosi Ahabu akavakemela manjolinjoli vasongolo vala pahi ya vakulu va wilaya, manjolinjoli miya hivili na selasini na vavili. Kangi akavakemela pamonga manjolinjoli voha vevasigalili, vakavya manjolinjoli elufu saba.

16 Manjolinjoli vasongolo vala vakawuka lukumbi lwa muhi, lukumbi Benihadadi pamonga na vankosi selasini na vavili vevawungini nayu pevavili mumandanda gavi vinywega na kugala. 17 Vakatumbula kuwuka manjolinjoli vasongolo vevalongoswayi na vakulu va wilaya. Lukumbi lwenulo Benihadadi atumili vajumbi kuhamba kung'omesa, na vene vakabwela kujova kuvya, "Manjolinjoli vibwela kuhumila ku Samalia." 18 Benihadadi akavajovela, "Muvakamulayi kuni vavii mumi changali kulola ngati vabwelili kwa uteke amala kwa ngondo."

19 Manjolinjoli vasongolo vavilongoswa na vakulu va wilaya, vahumili kuvala ya muji kuni manjolinjoli vibwela mumbele yavi. 20 Kila mumonga akamukoma likoko mweikomana nayu. Chenicho ndi chechakitili Vasilia vatilayi, kuni Vaisilaeli vakuvalandalila. Nambu Benihadadi nkosi wa ku Silia akatoloka kuni akwelili falasi waki pamonga na manjolinjoli vaki vevikwela falasi. 21 Nkosi wa ku Isilaeli akahotola ngondo, na kutola falasi na mutuka za ngondo za kuhutwa na falasi na kuvakoma manjolinjoli vamahele va ku Silia.

22 Kangi mlota akahamba kwa nkosi wa Isilaeli na kumjovela, "Ujitendekeha bwina na ukaholalelayi cha kukita, muni mwaka weubwela nkosi wa Silia yati ibwela kukuzangila kavili."

23 Lukumbi lulalula, vakulu vevavii pahi ya nkosi Benihadadi vakamjovela naha, "Michapanga yavi ndi michapanga ya muhitumbi. Nambu tikatovana navu mumtambu, chakaka yati tikuvahotola. 24 Kita chenichi, vawusa vankosi selasini na vavili avo na vakoto kuvya vilongosi va manjolinjoli na pahala pavi vavika manjolinjoli vakekesi muni vavayimamila manjolinjoli voha. 25 Mewa yiganikiwa utendekehayi manjolinjoli vangi ngati vala vevakomiwi, na falasi ndava ya mutuka za ngondo, muni tihotolayi kutovana na Vaisilaeli ku mtambu, na lukumbi ulu yati tikuvahotola."

Nkosi Benihadadi akayidakila na akakita chenicho.

26 Mwaka wewalandili, lukumbi lwa mbepu, Benihadadi akavavika pamonga manjolinjoli vaki akahamba mbaka ku Afeka ndava ya kutovana na Vaisilaeli. 27 Vaisilaeli pevamalili kuvikwa pamonga na kupewa vindu vyavi vya ngondo, vakahamba kutovana na Vasilia. Vaisilaeli vawonakini ngati misambi idebe hidebe ya mene, nambu Vasilia vadandasiki pamulima woha.

28 Mlota wa Chapanga akahamba kwa nkosi Ahabu na kumjovela, "Bambu Chapanga ijova naha, ‘Ndava Vasilia vijova kuvya nene ndi Chapanga wa mu hitumbi, na lepi wa mu mitambu, yati nikukita uvahotola manjolinjoli ava vamahele, na veve yati umanya kuvya nene ndi Bambu Chapanga.’"

29 Mumagono saba vavikili kambi vilolesana, na ligono la saba yikatumbula ngondo. Vaisilaeli vakavakoma manjolinjoli va Vasilia laki yimonga kwa ligono limonga. 30 Vasilia vevasigalili vakajumbalila kumuji wa Afeka, luwumba lwa muji wenuwo lukavagwilila, na vandu elufu ishilini na saba vakafwa. Na mwene Benihadadi akajumbalila ku muji wuwowo wa Afeki na kujihiha mu chumba cha mugati.

31 Vatumisi vaki vakamuhambila na kumjovela kuvya, "Ndava muni vankosi va Isilaeli vana lipyana, tihambayi kwa nkosi wa Isilaeli kuni tiwalili nyula za magunila muviwunu vitu na kunyemba nyosi mu hingu. Pangi yati akukuleka mumi." 32 Vakawala magunila muhiwunu na nyosi kutindiha muhingu yavi ndi vakamuhambila nkosi wa Isilaeli na kujova, "Muhengaji waku Benihadadi ijova, ‘Chondi, niyupa unileka mumi.’"

Nkosi Ahabu akayangula, "Wu, akona avii mumi? Mwenuyu ndi mulongo wangu."

33 Vandu vala vakalitola linenu lila kuvya ulangisu wa uteke na vene vakaliyidakila linenu lila kanyata vakajova, "Ena, Benihadadi ndi mulongo waku!"

Nkosi Ahabu akavajovela, "Muhamba mukamuleta." Benihadadi peabwelili, Ahabu akamkwesa mu mutuka yaki ya ngondo.

34 Ndi Benihadadi akajova "Yati nikuhiwuyisa miji yila yeahitolili dadi wangu mumawoko ga dadi waku. Uhotola kuvika pandu paku pa liguliyu ku Damesiki, ngati dadi wangu cheakitili ku Samalia."

Ahabu akajova, "Ndava ya kuvikilana mapatanu ndi yati nikuleka mumi." Ndi akavika mapatanu nayu, na akamuleka ahamba mumi.

35 Kwa lilagizu la Bambu Chapanga, mlota mmonga pagati ya vamlota akamujovela muyaki, "Nitova kwa chindu chaku cha kutovanela ngondo," Nambu mlota yula akabela. 36 Ndi mlota yula akajova, "Ndava wamuyidakili lepi Bambu Chapanga, lukumbi ndu petilekana yati uliwa na lihimba."Na mundu yula peawukili, likamwangila lihimba likamukoma.

37 Mlota akamukolela mlota yungi na akamujovela, "Chondi nitova." Mundu mwenuyo akamtova na kumulemasa. 38 Ndi mlota akahamba kuyima pamuhana ya njila kumulindalila nkosi. Akajing'anamusa kwa kuhelesa chitambala chaki cha kumutu mbaka pamihu muni akoto kumanyikana. 39 Nkosi peapitili penapo, mlota yula akamukemela na kumjovela, "Veve bambu, mtumisi waku nahambili ku ngondo na lukumbi ngondo peyatumbwili, mundu mumonga akanibwelela na mundu mweamukamwili akanijovela, ‘Muyunga mundu uyu. Ngati akakutolokayi yati ulipa wumi waki kwa wumi waku, amala hipandi elufu hidatu ya madini ga feza.’ 40 Nambu panahengayi mahengu gangi mundu yula akatila."

Nkosi wa Isilaeli akamjovela, "Wenuwo ndi uhamula waku. Ujihamwili wamwene kwa malovi gaku."

41 Kangi mlota yula akajigubukula mihu gaki kanyata, na nkosi wa Isilaeli ndi akamumanya kuvya mumonga wa vamlota. 42 Mlota yula akamujovela nkosi, "Bambu Chapanga ijova naha, ‘Umulekili mumi mundu mwenaganili afwayi. Hinu wumi waki yati ukuulipa kwa wumi waku na wumi wa vandu vaki yati ukuulipa kwa wumi wa vandu vaku.’"

43 Nkosi wa Isilaeli akahamba ku nyumba yaki ya chinkosi ku Samalia kuni avii ngolongondi na ligoga.