1 Solomoni ajengili nyumba yaki ya chinkosi, amalili kuyijengili mulukumbi lwa miyaka kumi na hidatu. 2 Mewawa akajenga nyumba yingi yeyakemiwi nyumba ya Dasi ya Lebanoni. Yavii na utali wa mita alubaini na mcheche na yapinga, upana waki mita ishilini na hivili na lobo, na utali waki wa kuhamba kunani wavii mita kumi na hidatu na yapinga. Yajengwili panani ya misitali mcheche ya mapanda ga mielezi, mapanda gegakamulili mbagalu za mielezi kwa upandi wa kunena. 3 Kila musitali wavili na mapanda kumi na muhanu pena goha ndi gavili mapanda alubaini na muhanu, azipamindi dali za mbawu za mielezi. 4 Mupandi zivili za luwumba kila upandi wavili na misitali hidatu ya madilisha gegilolesana. 5 Milyangu yoha yawanangini uvaha pandi zoha, na felemu za madilisha genago gegalolisini mewa zavili zezinauvaha weuwanangana pandi zoha.

6 Ajengili libanji la mapanda, utali waki wavili mita ishilini na lobo, na upana waki mita kumi na hidatu na yapinga. Palongolo ya nyumba yeniyo kwavili na libanji.

7 Solomoni ajengili libanji la chigoda cha unkosi, mwenumo ahamwili mihalu ya vandu. Lenilo lakemiwi Libanji la Uhamula. Lanyambiswi kwa mbawu za mielezi kuhumila pahi mbaka kudali.

8 Nyumba yaki ya kutama mwene, yeyavili kuyetu ya Libanji la Uhamula, yajengiwi ngati zingi zila. Solomoni ajengili kangi nyumba ngati Libanji lenilo ndava ya mdala waki mweavii msikana wa Falao nkosi wa ku Misili.

9 Nyumba zenizo zoha zajengiwi kwa maganga gabwina kutumbula pahi mbaka kunani, maganga gegahongoliwi kwa chipimu chechiganikiwa, na kudumuliwa kwa musumenu kuvala na mugati. 10 Mkingisa wavili wa maganga gavaha na gabwina na geganautali wa mita hidatu na yapinga, na upana mita mcheche. 11 Pandu pa kunani pajengiwi kwa maganga gangi gegahongoliwi kwa hipimu yeyiganikiwa, na kuvikwa mbao za mielezi. 12 Libanji la nkosi lavili na luhuka lweluna musitali umonga wa mbao za mielezi na misitali hidatu ya maganga gegahongoliwi, ngati cheyavili munyumba ya Chapanga na muchumba chaki cha mugati.

13 Kangi nkosi Solomoni amukemili Hulamu mundu wa ku Tilo. 14 Mwenuyo avili mwana wa lipwela wa likabila la Nafutali, na dadi waki ndi avili mkolonjinji wa ku Tilo, mweikita lufumbu shaba. Hulamu avili na umanya wamahele na luhala, na mweamanyili kutengeneza chindu chochoha kwa kuhengela shaba. Pena ndi abwelili kwa nkosi Solomoni, akamuhengela mahengu gaki goha.

15 Hulamu atenganizi mapanda gavili ga shaba, na kila limonga lavili na utali wa mita nane, na utindilu wa mita muhanu na yapinga. 16 Mewa akawumba njingwa zivili za shaba, kila yimonga yavili na utali wa mita hivili na lobo, akazivika munani ya mapanda genago. 17 Panani ya kila lipanda kwanyambiswi na ngwanda. 18 Mewa atenganizi matunda gegalolikini ngati makomamanga, akagapanga misitali hivili kutindila njingwa zila mukila lipanda.

19 Na njingwa zila zezavili munani ya mapanda gegavili palongolo ya sebuli, zapabwili luhumu lwa mauwa gabwina gegimela na kuyevela mumanji, kunyolika kwaki ndi mita yimonga na lobo zidatu. 20 Njingwa zenizo zavili panani ya mapanda gavili genago, na mewa zavili panani ya mtindilu wewahumalili papipi na ngwanda zila, mewa pavili na vindu vyeviwanangana na makomamanga mia mcheche vyevipangiwi kwa misitali hivili kwa makomamanga miya zivili mu kila mutu wa lipanda limonga.

21 Hulamu agavikili mapanda genago pandu pa kuyingilila mu libwanji la nyumba ya Chapanga, lipanda la upandi wa kulyelela lakemiwi Yakini na lipanda la upandi wa kumangeha lakemiwi Boazi. 22 Mitu ya mapanda genago yapambiwi kwa luhumu lwa mauwa gegimela na kuyevela mumanji.

Penapo ndi lihengu la kutengeneza mapanda likamalika.

23 Pagenago, Hulamu akatengeneza chihulu chivaha cha shaba chechikemiwa Bahali. Lavili lamuvilingu lelinaupana wa mita mcheche na yapinga kuhumila ukingu mbaka ukingu, na utali wa mita zivili na lobo na mtindilu wa mita kumi na hidatu na yapinga. 24 Pahi ya chihulu kwatindili misitali hivili ya ndeve zezihumbiwi kwa shaba, ndeve zenizo zatengenizwi pamonga na chihulu. 25 Chihulu chavikiwi panani ya himong'omong'o kumi na hivili ya ng'ombi higosi hidatu yalolili ku kasikazini na hidatu yalolili kwelitipama lilanga na hidatu yalolili kusini na hidatu yalolili kwelihumila lilanga. Kuni vibuna vyavi vigegili chihulu chenicho. 26 Unene wa mulomo waki wavili sentimita saba na yapinga, wenuwo wawanangini na mulomo wa chikombi na ngati liluva lelimela na kuyevela mumanji. Chihulu chavili na uhotola wa kumema manji lita elufu alubaini.

27 Mewa Hulamu atenganizi matololi kumi ga shaba, kila litololi lavili na utali wa mita yimonga na lobo hidatu na upana wa mita yimonga na lobo hidatu na kunyoleka kwa mita yimonga na lobo. 28 Matololi genago zatenganizwi kwa mabamba ga shaba gegakamuliwi na felemu za shaba zezivi na utali na upana weuwanana. 29 Mumihana ya mabamba genago gegakauliwi na felemu, kwavili na himong'omong'o ya lihimba na ng'ombi zigosi na viumbi vyevina magwaba. Himong'omong'o yeniyo ya mahimba na ya ng'ombi higosi hyagubikwi na kutandikwa mapambu gegalukiwi bwina. 30 Mewa kila litololi lavili na maguludumu mcheche ga shaba, na chindu chechikita maguludumu gagendayi ndi chavii cha shaba. Mukona zoha mcheche za matololi kwavili na vikamulilu vya shaba ndava ya kukamulila chihulu chivaha. 31 Kwavili na felemu ya mvilingu cha kunani ndava ya kutamila chihulu, utali wa kunani wavili mita yapinga na kuhamba pahi sentimita kumi na nane. Kuutindila mlomo wa chihulu walembiwi, na vitamilu vyaki ndi vyavili vya kona mcheche zeziwanangana. 32 Na maguludumu mcheche gala ndi gavili pahi ya mabamba ga hyuma na pagati ya maguludumu gala ndi yawunganiswi na litololi lene, na uvaha wa maguludumu genago ndi wavii sentimita sitini na sita. 33 Maguludumu genago gavili ngati maguludumu ga mutuka za ngondo za kuhutwa na hinyama, na hyuma hyaki ya pagati na mitindilu yaki na mataluma gaki na hikombi yaki, vyoha vyenivyo ndi vyavili vya shaba ya kukita lufumbu. 34 Kwavili na mkamulilu umonga mukila kona ya litololi vyevyawunganisi litololi na liguludumu. 35 Panani ya kila litololi pavili na utindilu wa shaba weuna uvaha wa sentimita ishilini na hivili pamonga na hikamulilu na mabamba gegavili upandi wa kunani ndi gakamulini na litololi lene. 36 Mu kila vikamulilu na mumabamba ga kila litololi, Hulamu anyambisi kwa kuchola viwumbi vyevina magwaba na mahimba na hikongo ya mitende, anyambisi kwa kutindisila na njingwa. 37 Chenicho ndi Hilamu cheatenganizi matololi gala kumi, goha atenganizi kwa shaba, na gawanangini kwa hipimu na kwa mlolekanu.

38 Mewa Hilamu atenganizi ihulu kumi ya shaba, chihulu chimonga mukila litololi. Kila chihulu chavili na upana wa mita yimonga na yapinga, na chahotwili kumema manji lita miya nane na semanini. 39 Matololi muhanu agavikili kuupandi wa kulyelela wa nyumba ya Chapanga, na muhanu akagavika kuupandi wa kumangeha wa nyumba ya Chapanga, na chihulu chivaha chechikemiwa Baali achivikili palongolo ku upandi wa kulyela wa nyumba ya Chapanga.

40 Mewa Hulamu awumbili hiviga, sepetu na chihulu chidebe. Penapo Hulamu akamala lihengu leapewili na nkosi Solomoni kuvala nyumba ya Chapanga. 41 Ajengili mapanda gavili na njingwa zivili zezivikiwi panani ya mapanda genago na ngwanda zivili ndava ya kugubika njingwa zivili zenizo, 42 na makomamanga miya mcheche ndava ya ngwanda zenizo zivili na misitali hivili ya makomamanga ndava ya kunyambisa njingwa zenizo zivili zezivikwi panani ya mapanda. 43 Mewa atenganizi matololi kumi, na vikamulilu kumi mu matololi genago, 44 na chihulu chivaha cha shaba chechikemiwa bahali chechigegiwi panani ya hibuna ya himong'omong'o ya ng'ombi zigosi kumi na hivili, pahi ya litengi lenilo. 45 Viviga vila na sepetu pamonga na chihulu chidebe. vindu vyenivyo vyoha Hulamu vyeamutenganizili nkosi Solomoni ndava ya mu nyumba ya Chapanga, vyoha vyavili vya shaba yeying'asima. 46 Vindu vyenivyo vyoha nkosi alagizi ku likemba la Yoludani, pandu pepana ludaka lwa kuwumbila viviga pavili pagati ya Sukoti na Saletani. 47 Solomoni apimili lepi kutopa kwa vindu vyenivi vyoha ndava muni vyavili vyamahele neju, hinu kutopa kwa shaba kwamanyikini lepi.

48 Mewa Solomoni alagizi vindu vyoha vyevyavili ndava ya mu nyumba ya Bambu Chapanga vitengenezwa kwa zahabu, pandu pa zahabu pa kuwusila teta na meza ya zahabu ndava ya kuvikila mabumunda gakuvika palongolo ya Chapanga, 49 hibokoselu ya hahi vya zahabu yabwina vyevyavikiwi palongolo ya Pandu pa Musopi neju, muhanu upandi wa kusini na muhanu upandi wa kasikazini, maluva na hahi na koleu. 50 Hikombi ya zahabu yabwina na mikasi ya kulinganisila utambi za hahi na mankeve ga kunyunyisila na hiyokolelu ya motu na himbani vya kuhukisila ubani, na bawaba za zahabu ndava ya milyangu ya Pandu pa Msopi neju, na mewa ndava ya milyangu ya libanji livaha la mu nyumba ya Chapanga vyenivyo vyoha vyavili vya zahabu.

51 Ndi nkosi Solomoni akamala lihengu loha la mu Nyumba ya Bambu Chapanga. Penapo Solomoni akaleta vindu vyoha vyevyavaguliwi na Daudi dadi waki ndava ya Chapanga, ndi vyavii madini ga feza, na zahabu na hyombo hingi, akavivika muvibana vya Nyumba ya Bambu Chapanga.