1 Hilamu nkosi wa ku Tilo, mweavili mkozi wa Daudi, peayuwini kuvya Solomoni anyaliwi mahuta avya nkosi pahali pa dadi waki, akavatuma vahengaji vaki vahamba kwa Solomoni. 2 Penapo Solomoni akamuyangula Hilamu kwa kumpelekela ujumbi wenuwu. 3 "Umanyili kuvya Dadi wangu Daudi ahotwili lepi kumujengela Bambu, Chapanga waki nyumba ya kumfugamila, ndava ya kuvya na ngondo zamahele na vamakoko vaki va milima ya papipi mbaka pala Bambu Chapanga peampelili uhotola. 4 Nambu hinu, Bambu Chapanga wangu, anipelili uteke pandi zoha nivi lepi na makoko wala wogohi wa kuzangiwa. 5 Ndi niamwili kumujengela Bambu Chapanga wangu nyumba ya kumfugamila. Chenichi ndi chila Bambu Chapanga cheamulagazili Daudi dadi wangu na kumujovela, ‘Mwana waku mwenikumuvika pa chigoda chaku cha unkosi, ndi mweakunijengela nyumba ya kunifugamila.’ 6 Hinu uvalagasila vandu vaku vanidumulila mikongo ya mielezi ya ku Lebanoni. Na vandu vangu yati vakujiwunga na vandu vaku mulihengu lenilo, na nene yati nikuvapela luhuna vandu vaku ngati cheujova, muni ngati cheumanyili, kawaka mundu mweihotola kudumula hikongo ngati nyenye mwa Vasidoni."

7 Hilamu ahekalili neju peayuwini ujumbi wenuwu kuhuma kwa Solomoni, ndi akajova, "Lelu alumbiwa Bambu Chapanga, kwa kumpela Daudi mwana mweavii na luhala atalalilayi vandu ava vamahele." 8 Hilamu akampelekela kangi ujumbi Solomoni, kumujovela, "Nipokili ujumbi waku, na nene yati nikita cheugana kuzivala mbao za mielezi na za mibeloshi. 9 Vandu vangu yati vigegelela magogo pamonga na kugahelesa kuhuma ku Lebanoni mbaka kunyanja na kugakunga malundu malundu gayevela mumanji mbaka pandu peukunijovelayi. Kwenuko yati giwopolewa na veve yati ukugapokela, mewa veve yati uganikiwa kuvapela chakulya vandu vangu."

10 Penapo, Hilamu akamupela Solomoni mbao zoha za hikongo ya mielezi na ya mibeloshi zeaganili, 11 na mwene Solomoni akampela Hilamu nganu madebe laki hivili na elufu alubaini, na mahuta gabwina madebe miya zivili mukila mwaka ndava ya vandu vaki.

12 Ndi Bambu Chapanga akampela Solomoni luhala ngati cheamujovili. Pakavya na uteke pagati ya Solomoni na Hilamu, vakavika mapatanu pagati yavi.

13 Nkosi Solomoni akavavika pamonga vagosi elufu selasini kuhuma pandi zoha za pa Isilaeli, vahenga mahengu ga kulazimiswa. 14 Vandu venavo akavavagula misambi hidatu ya vandu elufu kumikumi, akahipeleka misambi yeniyo kwa lukumbi ndalindali, mwehi umonga ku Lebanoni na miehi hivili visigalila kumahengu ga kunyumba, na chilongosiwavi ndi avii Adolamu 15 Mewa Solomoni avili na vandu elufu semanini va kubayulana maganga, na vandu elufu sabini va kugega maganga genago, 16 na vandu vangi elufu hidatu na miya hidatu vevayimamili lihengu lenilo pamonga na vahengaji voha. 17 Ndava ya malagizu ga nkosi, vagimulini maganga gavahagavaha gegavii gabwina, muni gahongolewayi ndava ya kujengela mkingisu wa nyumba. 18 Chenicho ndi vajengaji va Solomoni na Hilamu pamonga na vandu va muji wa Gebali chevatendekihi mbawu pamonga na maganga ga kujengela nyumba ya kumfugamila Chapanga.