1 Solomoni avii nkosi wa mulima woha wa Isilaeli. 2 Vatumisi vakulu vangi vevamutangatilayi muutalalila waki ndi,

Azalia mwana wa Sadoki mwenu avii mteta.

3 Eliholefu na Ahiya vana va Shausha venavo vavili vayandikaji,

Yehoshafati mwana wa Ahiludi mwenuyu avili wa kuvika ukumbuso.

4 Benaya mwana waki Yehoyada, avili mkulu wa msambi wa manjolinjoli,

Sadoki na Abiatali venavo vavili vamteta.

5 Azalia mwana wa Natani, avili chilongosi mkulu wa vahengaji voha,

Mteta Zabudi mwana wa Natani avili mundu wa papipi wa kulongela na nkosi.

6 Ahishali avili mkulu wa munyumba ya chinkosi,

Adonilamu mwana wa Abuda, avili myimamila wa mahengu ga kulazimisa.

7 Mewa Solomoni ahagwili vakulu vatalalila kumi na vavili va mulima woha wa Isilaeli. Venavo vapewili lihengu la kulonda chakulya ndava ya nkosi pamonga na nyumba yaki kila mumonga aletili chakulya kuhuma kweatalalilayi mu mwehi umonga mu kila mwaka. 8 Maina gavi ndi aga,

Benihuli atalalilayi pandu pa hitumbi ya Efulaimu,

9 Benidekeli atalalili miji ya Makai, Shaalibimu na Beti Shemeshi pamonga na Eloni Beti Hanani.

10 Benihesedi ayimamili muji wa Aluboti, mewa ayimamili muji wa Soko na pandu pa mulima wa Hefeli.

11 Beniabinadabu, mngana wa Tafati msikana wa Solomoni, ayimamili upandi woha wa Nafati Doli.

12 Baana mwana wa Ahiludi, ayimamili miji ya Taanaki na Megido na pandu poha pa muji wa Beti Sheani weuvii papipi na muji wa Zaletani, kusini mwa muji wa Yezileeli, na kuhuma ku Beti Sheani mbaka ku miji ya Abeli Mehola, na hati kupita muji wa Yokimeamu.

13 Benigebeli, ayimamili muji wa Lamoti Gileadi pamonga na hijiji ya Gileadi vyevyavi vya Yaili, wa chiveleku cha Manase, mewa ayimamili mukoa wa Aligobu weuvili ku Bashani wewavi na miji sitini yeyatindisiwi luhumba na kuvikwa vidindilu vya shaba mumamilyangu.

14 Ahinadabu, mwana wa Ido, ayimamili muji wa Mahanahimu.

15 Ahimaasi, mngana wa Basemati msikana wa Solomoni, ayimamila pandu pa likabila la Nafutali.

16 Baana mwana wa Hushai, ayimamili pandu pa likabila la Asheli na muji wa Bealoti.

17 Yehoshafati mwana wa Palua, ayimamili pandu pa likabila la Isakali.

18 Shimei mwana wa Ela, ayimamili pandu pa likabila la Benjamini.

19 Gebeli mwana wa Uli, ayimamili muji wa Gileadi, pakutumbula muji wenuwu watalaliwi na nkosi Sihoni wa Vaamoli, na nkosi Ogu wa ku Bashani.

Pamonga na kuvya na vakulu voha ava kumi na vavili, kwavili na mkulu mmonga mweayimamili mulima woha.

20 Vandu va pa Yuda na va pa Isilaeli vavili vamahele ngati msavati wa kumbwani, vene valyayi na kunywega na kusangaluka. 21 Solomoni atalalili nkosi zoha kutumbula mfuleni Efulati mbaka ku mulima wa Vafilisiti, mbaka kumibaka ya ku Misili. Vandu va milima yeniyo yoha vamuhengili na kulipa kodi kwaki lukumbi lwoha lwa wumi waki.

22 Chakulya chevalyayi munyumba ya Solomoni kwa ligono limonga, ndi chavili uhembe wa nyilinyili madebe miya hidatu na sitini, na uhembe wangayagika bwina madebe miya saba na ishilini, 23 ng'ombi zezikulupalili kumi za muchivaya, na ng'ombi za kudimwa ishilini, mambelele miya yimonga pamonga na ngolombo na mbavala na nguku zazikulupalili.

24 Solomoni atalalili mulima woha wa ku upandi welitipama lilanga ya mfuleni Eufulati, kuhumila ku Tifuna mbaka ku muji wa Gaza na atamili cha uteke na vandu va milima yoha yeyimtindila. 25 Lukumbi lwa wumi wa Solomoni mlima wa Yuda na Isilaeli kutumbula ku Dani mbaka ku Beeli Sheba, vatamili kwa uteke kila mmonga pahi ya mikongo yaki ya mizabibu na ya mitini.

26 Solomoni avili na mandanda elufu alubaini ndava ya kuvika mutuka zaki za ngondo za kuhutwa na falasi, na manjolinjoli vakwela falasi elufu kumi na vavili. 27 Vachilongosi kumi na vavili veavahagwili vala kila mmonga akapeleka chakulya kwa nkosi Solomoni, kulandana na mwehi weapangiwi kupeleka ndava ya nkosi pamonga na vandu vevavii munyumba ya nkosi. Solomoni na vandu va munyumba yaki vapatili vindu vyoha vyevaganili. 28 Kila mmonga peyahikili zamu yaki, ndi aletili mewa shayili na manyahi ga kulisila falasi mewa valetili na falasi zezihuta mutuka za ngondo, vindu vyenivyo vyoha vavipeliki pandu pepiganikiwa.

29 Chapanga amupelili Solomoni umanya na luhala lwamahele, umanya waki wavii lepi na chipimu ngati msavati wa kumbwani. 30 Luhala lwa Solomoni lwavili luvaha neju ya vandu voha vevana luhala va kwelihumila lilanga na lwavahotwili vandu voha va ku Misili. 31 Solomoni avahotwili vandu voha kwa luhala, avahotwili Etani, yula mundu wa ku Ezilahi, Hemani na Kalikoli na Dalida vana va Maholi. Na kulumbiwa kwaki kwadandasiki mumilima yoha ya papipi. 32 Solomoni azijovili misali elufu zidatu na kuyimba nyimbu neju ya elufu yimonga. 33 Alongalili mambu ga hikongo yoha kutumbula muelezi weuvili ku Lebanoni, na husopo weumela na kulandala muluhuka. Mewa alongalili kuvala hinyama na hidege na viumbi vyevikwava vyevitagila makang'a, na kuvala somba. 34 Vandu kuhuma kumilima yoha, na vankosi voha vevayuwini mambu ga kuvala luhala lwa Solomoni, vabwelili kumuyuwanila.