1 Abiya atumbwili kutalalila ku Yuda mu mwaka wa kumi na nane wa utalalila wa nkosi Yeloboamu, mwana wa Nebati, peatalalilayi Isilaeli. 2 Atalalili ku Yelusalemu kwa lukumbi lwa miyaka hidatu. Nyinawaki ndi avii Maaka msikana wa Abusalomu. 3 Abiya akitili uhakahu wulawula weakitili dadi waki, avili lepi na mtima wa uchakaka kwa Bambu Chapanga, Chapanga waki, ngati cheavili Daudi gogo waki. 4 Pamonga na genago, Bambu Chapanga ampelili Abiya mwana mweitalalilayi pahala paki na kwakuyikita Yelusalemu yivyayi ngangali ndava ya Daudi. 5 Bambu Chapanga akitili chenicho ndava Daudi akitili gabwina palongolo yaki na alekili lepi kuhenga gealagiswi na Bambu Chapanga magono goha ga wumi waki, nambu ndu wula muhalu wa Ulia mweahumalili kwa Vahiti. 6 Lukumbi lwoha lwa Abiya kwavili na ngondo pagati ya unkosi wa Lehoboamu na unkosi wa Yeloboamu. 7 Matendu gangi ga Abiya na goha geahengili, gayandikwi mu Chitabu cha Ukumbuso cha vankosi va Yuda, na lukumbi lwoha kwavili na ngondo pagati ya Abiya na Yeloboamu.

8 Na mwene Abiya akafwa na akazikwa pa Muji wa Daudi, na pahala paki atalalili Asa mwana waki.

9 Mu mwaka wa ishilini wa utalalila wa Yeloboamu, nkosi wa Isilaeli, Asa atubwili kutalalila ku Yuda, 10 atalalili kwa lukumbi lwa miyaka alubaini na umonga. Nyina waki avili Maaka mwana wa Abusalomu. 11 Nkosi Asa amkitili gabwina Bambu Chapanga, ngati cheakitili Daudi dadi waki. 12 Akavavinga pamulima vakemi voha vevakita ukemi pandu pa kuwusila teta pa himong'omong'o yavi, akahitaga himong'omong'o yoha vyevavikili vagogo vaki. 13 Asa akamuwusa Maaka nyina waki makakala geavili nagu ga kuvya ngati nyina wa nkosi, muni atenganizi chimong'omong'o cha Ashela cha kuyomesa. Ndi Asa akachidumula chimong'mongo chenicho na kuchitinyisa kwa motu mumuhana mwa mfuleni Kidiloni. 14 Pamonga kuvya apahalabisi lepi pandu pa panani pa kuwusila teta, nambu Asa avili msadika kwa Bambu Chapanga magono gaki goha. 15 Awuyisi mu Nyumba ya Chapanga vindu vyoha vyevyawusiwi ndava ya Bambu Chapanga. Vindu vyevyavili vya madini ga feza na vya zahabu vyevyawusiwi na mwene pamonga na vadadi vaki.

16 Kwavili na ngondo pagati ya Asa nkosi wa Yuda na Baasha nkosi wa Isilaeli, mulukumbi lwoha lwa utalalila wavi. 17 Baasha nkosi wa Isilaeli akauzangila mulima wa Yuda na kuukita muji wa Yelusalemu uvya ngangali muni kudivalila vandu vakoto kuhuma na kuyingili mu mulima wa Yuda weitalalila Asa. 18 Ndi nkosi Asa akatola madini ga feza pamonga na zahabu zoha zezasigalili mu Nyumba ya Chapanga na mu nyumba yaitama nkosi, akavapela vahengaji vaki, na kuvajovela vahambayi ku Damasiko kwa Beni Hadadi mwana wa Tabilimoni mjukulu wa Hezioni nkosi wa ku Silia, vakamjovelayi, 19 "Tikitayi mapatanu pagati yaku na nene ngati chevakitili dadi wangu na dadi waku, lola nikuletili njombi ya madini ga feza na zahabu, hamba kadenyayi mapatanu gegavili pagati yaku na Baasha nkosi wa ku Isilaeli, muni alekayi kunizangila nene."

20 Penapo nkosi Benihadadi akayidakila luyupu lwa nkosi Asa na kuvatuma vakekesi va ngondo va misambi ya manjolinjoli gaki, vahambayi vakahibunayi miji ya Isilaeli. Navene vakahitola miji ya Iyoni na Dani na Abeli Beti Maaka na pandu poha papitindila nyanja Galilaya pamonga na mulima woha wa likabila la Nafutali. 21 Nkosi Baasha peayuwini mambu ga ngondo yeniyo ndi akaleka kuukangamalisa muji wa Lama, na akahamba kutama ku Tilisa.

22 Penapo nkosi Asa akalagisa kwa vandu voha va ku Yuda, changali kumuleka hati mundu mmonga, vakatolayi maganga ku Lama pamonga na mbao, vindu vyeahengalili Baasha kujengela. Na mwene nkosi Asa akahengela vindu vyenivyo kujengela ku Mizipa na muji wa Geba weuvi mu mulima wa likabila la Benjamini.

23 Matendu gangi goha geahengili nkosi Asa na ukekesi waki na miji yoha yeahijengili, goha gayandikwi mu Chitabu cha Ukumbuso cha Vankosi va Yuda. Nambu mulukumbi lwa ugogolo waki, Asa ang'aiswi na utamu wa magendelu. 24 Asa akafwa na vakamzika pamatinda ga chinkosi ku Muji wa Daudi, na Yehoshafati mwana waki akavya nkosi pahala paki.

25 Mu mwaka wa pili wa utalalila waki Asa ku Yuda, Nadabu mwana wa Yeloboamu, atumbwili kutalalila ku Isilaeli. Atalalili kwa lukumbi lwa miyaka hivili. 26 Nadabu akamkitila gahakahu Bambu Chapanga, kwa kukita ngati dadi waki cheamubudili Bambu Chapanga na kuvakita vandu va Isilaeli vakita gahakahu.

27 Baasha mwana wa Ahiya, wa likabila la Isakali, akakita mpangu uhakahu ndava ya Nadabu na kumkoma ku Gibetoni, muji wa Vafilisiti. Lukumbi Nadabu pamonga na manjolinjoli gaki pevauzangili muji wenuwo. 28 Baasha akamkoma Nadabu mu mwaka wa datu wa utalalila wa Asa nkosi wa ku Yuda, na mwene Baasha akavya nkosi wa ku Isilaeli pahala pa Nadabu. 29 Lukumbi ndu peatumbwili kutalalila, Baasha akavakoma vandu voha va lukolo lwa Yeloboamu, amulekili lepi hati mundu mmonga. Yakitiki chenicho ngati cheajovili Bambu Chapanga kupitila Ahiya, muhengaji waki wa ku Shilo. 30 Mambu genago gahengiki ndava Yeloboamu amuyomisi Bambu Chapanga, Chapanga wa Isilaeli, kwa kubuda kwaki na ndava ya kuvakita Vaisilaeli vavya vabudanu.

31 Matendu gangi goha ga Nadabu, gayandikwi mu Chitabu cha Ukumbuso cha Vankosi va Isilaeli. 32 Asa nkosi wa ku Yuda na Baasha nkosi wa ku Isilaeli vavili na ngondo pagati yavi lukumbi lwoha lwa utalalila wavi.

33 Mu mwaka wa datu wa utalalila wa Asa nkosi wa ku Yuda, Baasha mwana wa Ahiya ndi akavya nkosi wa Isilaeli yoha ku Tilisa, na mwene ndi akatalalila kwa lukumbi lwa miyaka ishilini na mcheche. 34 Baasha akamkitila gahakahu Bambu Chapanga, ngati cheakitili Yeloboamu dadi waki mweambudili Bambu Chapanga na kuvakita vandu va Isilaeli vakita gahakau kwa Bambu Chapanga.