1 Solomoni atumbwili kujenga nyumba ya kumfugamila Chapanga mumwaka wa miya mcheche na semanini, lukumbi Vaisilaeli pevavii vamali kuwuka ku Misili. Wenuwo ndi wavili mwaka wa mcheche tangia Solomoni peatumbwili kutalalila pa Isilaeli, mumwehi wa pili, wevikemela mwehi wa Zifu. 2 Nyumba yeniyo yeajengili nkosi Solomoni ndava ya Bambu ndi yavili na utali wa mita isilini na saba na upana wa mita tisa na kuhamba kunani mita kumi na hidatu na yapinga. 3 Sebuli ya palongolo ya nyumba yavili na upana wa mita mcheche na yapinga, kuhumila upandi umonga wa nyumba mbaka upandi wungi na utali waki wavii na mita tisa. 4 Nyumba yeniyo ayivikili madilisha gegatanwiki mugati nambu kuvala ngalingasi. 5 Solomoni ajengili vyumba vyevina dali zidatu vyeviwunganiswi na luwumba lwa nyumba ya kumfugamila Chapanga, kutumbula pelutumbukini luwumba mbaka pamwisu wa luwumba lwa nyumba ya kumfugamila Chapanga. 6 Chumba cha pahi chavili na upana wa mita hivili na lobo na chumba cha pagati chavili na upana wa mita zivili na lobo hidatu na chumba cha datu chavili na upana wa mita zidatu. Vyumba vya golofa vyalekangini upana, ndava Solomoni apungwizi chipimu cha luwumba lwa kuvala kutindila nyumba, muni luwumba lwa pahi luchitangatila chumba cha panani yaki changali kutegemela mapanda ga kukamulila nyumba yeniyo.

7 Lukumbi peyajengwayi nyumba, lwayuwaniki lepi lwami lwa nyundu na livagu, wala lwa chindu chochoha cha lyuma, muni yajengiwi kwa maganga gegahongoliwi na kutendekewa njwee tangia kula kwevagagimili.

8 Mulyangu wa kuyingilila pandu pa pahi mulijengu lelayongiswi muluvava lwa nyumba, wavili upandi wa kusini. Mugati yaki mwavili na ngazi ya kukwelela ku chumba cha pagati na cha mwisu kunani. 9 Penapo, Solomoni akamala kuyijenga nyumba ya kumfugamila Chapanga na yikavya bwina. Dali ya nyumba ayijengili kwa boliti za mielezi na panani yaki atandiki mbagalu za mikongo yeikemiwa mielezi. 10 Vyumba vila vyeajengili vya golofa vyavili na utali wa kuhamba kunani mita hivili na lobo, vyenivyo vyawunganiswi na nyumba ya Chapanga kwa mbagalu za mielezi.

11 Lukumbi lwenulo linenu la Bambu Chapanga likamubwelela Solomoni kujova, 12 "Ngati ukakita malagizu gangu na kulanda mihilu yangu, yati nikukukitila mambu goha genamuhaidili Daudi dadi waku. Kuyivala nyumba iyi yeukunijengela, 13 nene yati nitama pagati ya vandu vangu Vaisilaeli, na yati nikuvaleka lepi."

14 Penapo Solomoni ndi akamalakisa kuyijenga nyumba yeniyo ya kumfugamila Bambu Chapanga.

15 Upandi wa mugati wa luwumba lwa nyumba agubiki kwa mbao za mielezi, kuhumila paluhumba mbaka ku mbagalu za dali na pahi alugubiki kwa mbao za mibeloshi. 16 Na chumba cha mugati chechakemiwi Pandu Pa Musopi neju, chajengiwi ku upandi wa kuyetu ya nyumba ya Chapanga. Chajengiwi kwa mbao za mielezi kuhumila pahi mbaka ku dali, na utali waki wavii mita tisa. 17 Chumba chechavili palongolo ya Pandu Pamusopi neju, ndi chavii na utali wa mita kumi na nane. 18 Mbao za mielezi zezagubikwi muluwumba lwa chumba cha mugati, zacholwi ngati lidenge na maluva gegahomwili. Kawaka liganga lelawonikini muni kila pandu pagubikwi kwa mbao za mielezi.

19 Mu chumba chamusopi neju, Solomoni avikili Lisanduku la Lilaganu la Bambu Chapanga. 20 Chumba chenicho chavii na utali wa mita tisa na upana wa mita tisa na kunyoleka kwa mita tisa na chene vakilimi kwa zahabu yabwina. Mewa atengenizi pandu pa kuwusila teta kwa mbawu za mielezi. 21 Upandi wa mugati wa nyumba yeniyo Solomoni akilimi kwa zahabu yabwina, na kulongolo ya chumba chenicho cha mugati akavika minyololo yeabakili zahabu kuhuma upandi umonga mbaka upandi wungi. 22 Nyumba yoha cha mugati ayikilimi kwa zahabu, pamonga na pandu pa kuwusila teta pepavii muchumba cha pandu pamusopi neju.

23 Atenganizi hiumbi hivili yehina magwaba kwa mbao za Mielezi, kila chiumbi chavii na utali wa mita mcheche na yapinga, akavivika muchumba cha msopi neju. 24 Kila ligwaba lavili na utali wa mita hivili na yapinga, pena utali wa mkingisa wa ligwaba limonga mbaka ligwaba lingi ndi wavii mita mcheche na yapinga. 25 Chiumbi cha pili ndi chavii na utali wa mita mcheche na yapinga, viwumbi vyoha vivili ndi vyavili na hipimu yeyiwanangana na mlolekanu umonga. 26 Utali wa chiumbi chimonga wavili mita mcheche na yapinga, mewawa utali wa chiwumbi chingi ndi wavili wulawula. 27 Solomoniavivikili viumbi vyenivyo mugati ya chumba chamsopi neju, vyavili na magwaba gegatalambwiki, ligwaba la chiumbi chimonga likapamisa luwumba lumonga na ligwaba la chiumbi chingi likapamisa luwumba lungi, na magwaba gangi gala gakapamisana pagati ya chumba. 28 Hiumbi hyeniyo mewa ahinyalili zahabu.

29 Luwumba lwa chumba chamusopi neju na lwa chumba chamsopi azinyambisi kwa kuvika hiumbi yeyinamagwaba na mitende na micholo maluva gegahomwili. 30 Hata pahi ya vyumba vyenivyo anyalili zahabu, mu chumba chamsopi neju na muchumba chamsopi.

31 Pakuyingilila Pandu pa Msopi neju apatengenizili mulyangu wa mbawu za mizeituni. Uvaha wa kila mulyangu uyingila mala muhanu ya uvaha wa chumba. 32 Mumilyangu yeniyo hivili ya mizeituni, acholili viumbi vyevinamagwaba, mitende na maluva gegahomwili, micholo yeniyo ayinyalili zahabu. 33 Mewawa atenganizi hiyimilu ya mlyangu wa kuyingilila pa sebuli weunapandi mcheche zeziwaningini uvaha. Viyimilu vya mulyangu wenuwo vyavili vya mizeituni. 34 Kwavili na milyangu hivili yeyahotoliki kukunjuka yeyatengenizwi kwa mbao za mibeloshi na kila umonga wavili na bawabu zezauhotwisi ujikunja kila chipandi panani ya chingi. 35 Panani ya mbawu zenizo acholili viumbi vyevinamagwaba, mitende na maluva gegahomwili akahinyala kwa zahabu.

36 Ajengili luwumba kuyitindila nyumba ya Chapanga na luwumba lwaki lwavili na misitali hidatu ya maganga gegahongoliwi, na musitali umonga wa boliti za mielezi.

37 Mkingisa wa nyumba ya Chapanga wajengiwi mumwehi wa pili weukemiwa Zifu mumwaka wa mcheche wa utalalila wa nkosi Solomoni. 38 Nyumba ya Bambu Chapanga yamalakiswi kujengwa mumwehi wa Buli, manayaki mwehi wa nane, mumwaka wa kumi na umonga, amalakisi kuyijenga nyumba, na lihengu lamaliki ngati cheyapangiwi. Solomoni ajengili nyumba yeniyo mulukumbi lwa miyaka saba.